VOV4.ÊđêLeh đru mguôp dŭm êtuh ton djam mtam, boh kroh kơ mnuih ƀuôn sang dôk hlăm krĭng mâo klei ruă tưp ti kwar Dhŭng, lu mnuih ƀuôn sang ti Dak Nông lŏ dơ̆ng rah pla dŭm mjeh djam čiăng hmao đru kơ mnuih ƀuôn sang ti krĭng mâo klei ruă tưp.

Leh đru êbeh 2 ton trŏng dlông leh anăn lu djam tam, hbei, boh kroh, gŏ sang ayŏng Trịnh Văn Khởi, ti alŭ Thuận Hải, să Thuận Hạnh, kdriêk Dak Song, čar Dak Nông lŏ dơ̆ng pla êbeh 7 sao djam tam dŭm mta čiăng đru klei dleh dlan hŏng mnuih ƀuôn sang krĭng mâo klei ruă tưp. Ayŏng Khơỉ brei thâo, khă gơ̆ bruă duh mkra gŏ sang hmaĭ kyua klei ruă tưp ƀiădah hlăk mmông anei ti lu anôk lŏ dleh dlan hĭn anăn kâo čiăng hrăm mbĭt bi đru kơ digơ̆ hơĭt ai tiê leh anăn hnưm hgao klei ruă tưp.

“Gŏ sang dôk hli kuai anôk lăn dôk huâng pla thiăm dŭm mta djam tam čiăng đru kơ mnuih ƀuôn sang ti anôk dleh dlan. Tơdah klei ruă tưp sui kâo srăng iêu jak phung ayŏng adei, mnuih ƀuôn sang pla čiăng êdei anei dŭm anôk hmaĭ kjham kyua klei ruă tưp drei lŏ dơ̆ng đru kơ digơ̆.”

Ăt msĕ snăn mơh, Nguyễn Thị Năm, ti să Quảng Tâm, kdriêk Tuy Đức leh iêu mkrum êbeh 20 ton djam tam, hbei, boh kroh mơĭt kơ dŭm čar mâo klei ruă tưp, ñu lŏ mañ thiăm lăn pla êbeh 1 ha djam tam čiăng lŏ dơ̆ng mâo dŭm gưl mnơ̆ng dhơ̆ng đru kơ mnuih ƀuôn sang krĭng mâo klei ruă tưp.

“Ară anei hnơ̆ng boh mnga ăt dơ̆ng jih, kyua anăn kâo lŏ dơ̆ng mañ lăn nah djiêu hma kâo, bi mguôp hŏng Êpul hgŭm phung mniê pla djam mtam, êtak čiăng đru mkăp gưl êdei pral hĭn. Kâo bi mĭn bruă ngă anei srăng đru msir mgaih klei hdĭp mnuih ƀuôn sang ti krĭng mâo klei ruă tưp leh anăn phung mă bruă ƀun”.

Ti să krĭng taih kbưi Dak Som, kdriêk Dak Glong, anôk mâo giăm 70% mnuih ƀuôn sang djuê ƀiă, ƀiădah mnuih ƀuôn sang ƀuôn prŏng Hồ Chí Minh tuôm hŏng klei dleh dlan kyua bi ktlah yang ƀuôn, grăp čô mnuih bi mguôp djam tam, boh kroh mơĭt brei. Bùi Ngọc Tân, Khua Knơ̆ng bruă sang čư̆ êa să Dak Som brei thâo, truh ară anei, mnuih ƀuôn sang hlăm să čŏng iêu mkrum êbeh 5 ton djam mtam, boh kroh mơĭt kơ mnuih ƀuôn sang krĭng mâo klei ruă tưp ƀuôn prŏng Hồ Chí Minh. Lu gŏ sang pla thiăm dŭm mta djam mtam lŏ dơ̆ng đru kơ mnuih ƀuôn sang hlăm krĭng mâo klei ruă tưp.

“Să Dak Som jing să krĭng 3, krĭng dleh dlan, lu mnuih ƀuôn sang jing mnuih djuê ƀiă, krĭng dleh dlan, ƀun lu. Hlăm dŭm thŭn êgao, mnuih ƀuôn sang hlăm să mâo klei đru hdruôm hră, braih, mnơ̆ng ƀơ̆ng mơ̆ng phung mâo ai tiê kmah, êpul bruă ti ƀuôn prŏng Hồ Chí Minh. Hlăk êjai ƀuôn prŏng Hồ Chí Minh tuôm hŏng klei dleh dlan kyua klei ruă Covid-19 dŭm gŏ sang, mnuih khă gơ̆ tuôm hŏng klei dleh dlan ƀiădah hŏng ai tiê bi khăp bi đru mtei, djam mtam, boh kroh čiăng mâo gưl mdiăng ba ti ƀuôn prŏng Hồ Chí Minh.

 Dŭm êtuh ton mnơ̆ng dhơ̆ng lŏ hma, mnơ̆ng yua aguah tlam đru kơ mnuih ƀuôn sang hmaĭ dưi ba nao, mbĭt hŏng djam tam mrâo lŏ pla jing ai tiê mnuih ƀuôn sang dŭm djuê ana čar Dak Nông mđing kơ krĭng mâo klei ruă tưp ti dŭm čar nah Dhŭng hŏng klei čang hmăng klei ruă tưp hnưm jih, klei hdĭp mda lŏ wĭt msĕ aguah tlam./.

Pô mblang: H’Zawut Ƀuôn Yă