VOV4.Êđê - Hŏng klei čang hmăng đru kơ mnuih ƀuôn sang hlăm wăl bi ktlah hjăn kwang dar dưi ƀiă klei dleh dlan, mnuih ƀuôn sang dŭm djuê ana ti čar Dak Nông hrui êmiêt leh dŭm êtuh ton boh mnga dŭm mta mơĭt kơ ƀuôn prŏng Hồ Chí Minh leh anăn dŭm čar Nah Dhŭng đru gang mkhư̆ klei ruă tưp Covid-19.

Ayŏng K’Tư, dôk ti anôk taih kbưi Sê Rê A, să Dak Som, kdriêk Dak G’Long, čar Dak Nông đru bi guôp jih jang mtei hlăm gŏ sang pô lehanăn lŏ nao pĕ dŭm mta djam hlăm dliê jing mnơ̆ng jăk yâo mơĭt kơ mnuih ƀuôn sang dŭm čar krĭng dhŭng dôk čuăl krĭng kyua klei ruă tưp. Ayŏng K’Tư brei thâo: “Kâo mơĭt leh 200 kg mtei lehanăn dŭm mta djam msĕ si knăt hbei tao, djam biăp. Kyua hlăm alŭ wăl mâo dŭm mta djam anăn, kyuanăn yơh gŏ sang kâo nao pĕ hlăm dliê čiăng mơĭt kơ mnuih ƀuôn sang hlăm ƀuôn prŏng. Hruê mmông kơ anăp, gŏ sang kâo srăng lŏ mơĭt boh ƀơr lehanăn êbŭng. Ară anei mâo wăt êbŭng dliê lehanăn êbŭng pô pla, gŏ sang kâo srăng lŏ đru dŭm bruă điêt kơ mnuih ƀuôn sang hlăm ƀuôn prŏng.”

Ăt msĕ hŏng anăn, ti krĭng knông lăn alŭ Thuận Hải, să Thuận Hạnh, kdriêk Dak Song, gŏ sang ayŏng Trịnh Văn Khởi mơĭt leh 2 tôn djam mtam msĕ si trong dlông awan, djam bei đŭng, mtei, boh ƀơr truh kơ anôk mâo klei ruă tưp. Ayŏng lŏ iêu mthưr kơ mnuih ƀuôn sang hlăm alŭ đru bi mguôp boh mnga bruă lŏ hma čŏng pla mjing hlăm gŏ sang pô mơĭt kơ mnuih ƀuôn sang anôk mâo klei ruă tưp, đru kơ diñu dưi găn klei dleh dlan: “Gŏ sang kâo mâo dŭm mta djam mtam, hbei, boh kroh msĕ si: trong dlông awan, boh giêt, boh plei, êdak, mtei, boh ƀơr ăt mơĭt jih leh mơh. Hlăm dŭm hruê giăm anei, klei ruă tưp dôk dleh dưi ksiêm dlăng, anăn 2 ung mô̆ kâo nao mtrŭt mjhar mnuih ƀuôn sang bi mguôp čô ƀiă boh mnga bruă lŏ hma mơ̆ng gŏ sang pô lehanăn mơ̆ĭt kơ mnuih ƀuôn sang hlăm anôk mâo klei ruă. Hruê anei hmei ăt nao ba mguôp mtei, boh tei hŭng, djam supler giăm 4 tôn čiăng dưm hlăm êdeh nao mmăt anei ba truh kơ mnuih ƀuôn sang ti ƀuôn prŏng Hồ Chí Minh lehanăn Bình Dương”.

Ti să Dak Bŭk So, kdriêk Tuy Đức, čar Dak Nông, mnuih ƀuôn sang ăt ngă klei bi mguôp êbeh 30 tôn boh mnga bruă lŏ hma mơĭt kơ mnuih ƀuôn sang anôk mâo klei ruă tưp. Nguyễn Văn Anh, khua bruă Đảng, khua bruă sang čư̆ êa să Dak Bŭk So brei thâo: “Alŭ wăl jing krĭng knông lăn, klei hdĭp mnuih ƀuôn sang dôk hlăm klei dleh dlan. Ƀiădah dŭm gưl, dhar bruă, bruă Đảng nah gŭ iêu mthưr kơ mnuih ƀuôn sang bi mguôp dŭm mta mnơ̆ng dhơ̆ng ăt ƀuôn sang sa ai mơh. Mnuih ƀuôn sang čŏng mdiăng ba djam mtam, boh mnga truh kơ anôk bruă sang čư̆ êa să, mâo dŭm gŏ sang brei êpul hđeh êdam êra nao pĕ hlăm hma pô, čiăng bi đru kơ mnuih ƀuôn sang ti ƀuôn prŏng dưi găn klei dleh dlan.”

Khădah krĭng Lăn Dap Kngư dôk mdrơ̆ng hŏng klei ruă tưp dleh ktuê dlăng, ƀiădah hŏng klei khăp, “sa kpăt êjai êpa knar hŏng sa hruh leh trei”, mnuih ƀuôn sang jing mnuih djuê ƀiă ti nei ăt mâo klei đru “kah êsei brei djam” hŏng dŭm mnơ̆ng pô čŏng pla mjing, đru kơ mnuih ƀuôn sang ti ƀuôn prŏng Hồ Chí Minh dưi găn dŭm klei dleh dlan.