VOV4.Êđê- Aduôn Rơ Châm H’Déo mnuih djuê ana Jrai, jing khua kiă kriê bruă mặt trận čar Gia Lai hơ̆k mơak kyua dưi jao bruă klam cuăn ruah 9 bĕ ana knia mơ̆ng krĭng Lăn Dap Kngư na ba truh kơ ƀuôn prŏng phŭn Hà Nội čiăng pla ti wăl tač msat khua gĭt gai Hồ Chí Minh. Hruê knăm pla ana kyâo ti wăl tač msat Awa jing sa klei yuôm bhăn lehanăn mgei ai tiê hŏng mnuih ƀuôn sang djuê ana čar Gia Lai. Êpul bi ala mơ̆ng aduôn Rơ Châm H’Déo ngă khua êpul mâo phung khua mduôn, phung djă bruă klei đăo knang, pô bi ala grăp djuê ana dôk hdĭp mda ti čar Gia Lai. Hlăm ai êwa krưh k’ang mgei ai tiê, aduôn Rơ Châm H’Déo dưi bi ala leh kơ mnuih ƀuôn sang dŭm djuê ana čar Gia Lai bi êdah klei hdơr knga hŏng bruă ngă yuôm bhăn mơ̆ng Đảng, Awa Hồ. 10 thŭn êgao, dŭm bĕ ana knia ƀrư̆ hruê ƀrư̆ hriê kơ prŏng, mâo êyui ti djiêu msat Awa, jing klei bi hmô mơ̆ng ai tiê siă suôr mơ̆ng dŭm djuê ana krĭng Lăn Dap Kngư tui hluê Awa Hồ, tui Hluê Đảng. Hruê anei 2/9, bi hdơr 76 thŭn hruê mkŏ mjing ala čar, aduôn Rơ Châm H’Déo bi êdah ai tiê pô:

“Hruê 2/9/1945, Awa Hô hưn mdah klei hnŭk êngiê, mkŏ mjing ala čar. Mơ̆ng hruê anăn truh kơ ară anei mâo 76 thŭn leh. Kyua mâo klei êngiê, mnuih djuê ana Jrai, Banhar dưi mâo klei hdĭp jak siam. Leh thŭn 1945 truh kơ thŭn 1946 mâo klei kƀin kluôm dŭm djuê ana, bi mklih jih jang djuê ana hlăm ala čar Việt Nam, hrăm mbĭt bi kdơ̆ng hŏng Prăng, sua wĭt klei êngiê djuê ana. Ti čar Gia Lai mtam, mnuih ƀuôn sang Jrai, Banhar, msĕ awa Hô tuôm lač: “Mnuih Yuan, amâodah mnuih Thổ, Mường, êman, Jrai, Banhar, Êđê, Xơdang jing ayŏng adei sa amĭ, mâo klei bi mguôp, đru hlăm klei bi blah lehanăn răng mgang ala čar jig ala čar mbĭt. Kyuanăn yơh grăp čô hlăm ala čar jing ayŏng adei sơăi, amâo lui sa čô kơ tluôn, mnuih mduôn khua, êwiên êwu, mnuih knap mñai bi đru lehanăn rŭ mdơ̆ng ala čar.”

Pô mblang: Y-Ƀel Êban