VOV4.Êđê- Msĕ hŏng hmei hưn leh, leh 12 thŭn mkŏ mjing knơ̆ng kdơ̆ng êa truh 4.400 êklai prăk akŏ Krông Pač Truh kơ mlan 3 leh êgao, mnuih ƀuôn sang krĭng ênao êa dưi ba mđuê̆ truh leh anôk dôk mrâo. Hŏng êbeh 700 gŏ sang lehanăn 4.000 čô mnuih, bruă ngă čiăng mbĕ mđuê̆ mnuih ƀuôn sang nao ti anôk dôk mrâo jing lu êdi. Phŭn kčưm êpul êya ngă bruă mâo bruă klam đru kơ mnuih ƀuôn sang. Khădah, kyua klei ruă tưp Covid-19 dleh dưi ksiêm dlăng, dŭm êpul êya dôk nao ngă bruă gang mkhư̆ klei ruă tưp. Mmông anei, mnuih ƀuôn sang mâo klei bi mguôp, pô hriê êlâo đru rŭ mdơ̆ng pưk sang kơ pô hriê êdei, bi hơĭt klei hdĭp.

Gŏ êsei Ma Thị Sìn ti alŭ 9, să Čư̆ San, kdriêk Mdrak nao dôk ti anôk dôk mrâo mrô 1 mơ̆ng knơ̆ng kdơ̆ng êa Akŏ krông Pač, să Čư̆ Êlang, kdriêk Êa Kar hlăm wưng klei ruă Covid 19 dôk mâo dleh dưi ksiêm dlăng ti 2 kdriêk dôk lehanăn nao. Dŭm êpul djŏ tuôm êlâo anăn păn bruă klam đru kơ mnuih ƀuôn sang nao mkŏ anôk dôk mrâo păt čiăng jing mđing kơ hdră gang mkhư̆ klei ruă tưp s’aĭ. Ƀiădah myun mơh, dŭm gŏ êsei nao dôk êlâo, mbĭt alŭ, mbĭt să, mbĭt ƀuôn, jing găp djuê, gŏ êsei riêng gah hrăm mbĭt bi đru rŭ mdơ̆ng pưk sang. mơ̆ng anăn, knŏng hlăm brô 1 hruê kăm, sang dưi rŭ mdơ̆ng leh, gŏ êsei ñu bi h’ĭt leh klei hdĭp ti anôk dôk mrâo.

“Hlăm ƀuôn, arăng đru pô mdơ̆ng pưk sang, bi đru dŭ mnơ̆ng dhơ̆ng, ngă djăp bruă yơh. Mnuih ƀuôn sang mđing dlăng lu êdi, kâo ƀuh jăk mơh ai tiê”.

Mnuih ƀuôn sang ti anôk dôk mrâo mơ̆ng knơ̆ng kdơ̆ng êa Akŏ krông Pač bi đru mdơ̆ng sang hlăm yan klei ruă tưp Covid-19

    Vàng Seo Pao, k’iăng khua kiă kriê êjai hlăm alŭ ti anôk dôk mrô 1, să Čư̆ Êlang brei thâo, thâo săng kơ hdră gang mkhư̆ klei ruă tưp ti wưng ară anei jing yuôm bhăn êdo, hlăk dŭm êpul djŏ tuôm dôk mđing kơ hdră gang mkhư̆ klei ruă tưp, mnuih ƀuôn sang thâo bi đru kơ hdơ̆ng găp. Hŏng hlăm brô 130 gŏ êsei nao dôk leh kơ anôk mrâo, grăp gŏ êsei bi tiŏ nao 1, 2 čô nao đru rŭ mdơ̆ng pưk sang, bi h’ĭt klei hdĭp mrâo:

          “Ăt mkŏ mjing 9 êpul kăp pŭ, dŭ mnơ̆ng dhơ̆ng, mdơ̆ng pưk sang. Dŭm gŏ êsei hriê êdei hmei mâo ayŏng adei riêng gah bi đru rŭ mdơ̆ng amâo mâo klei dleh dlan ôh. Mdơ̆ng pưk sang mâo 30 – 40 čô gơ̆ mdơ̆ng leh mơh hlăm hruê, bi hdră bruăđiêt mkăn, gŏ êsei anăn ngă hjăn yơh. Si tô hmô mgi mâo gŏ êsei Lý Seo Cháo hriê dôk, ayŏng Đông hưn mthâo leh hŏng khua alŭ, ñu ăt hưn mthâo kơ ayŏng adei mkăn bi nao đru leh.

Mnuih ƀuôn sang ti anôk dôk mrâo mơ̆ng knơ̆ng kdơ̆ng êa Akŏ krông Pač bi đru mdơ̆ng sang hlăm yan klei ruă tưp Covid-19

         Trần Văn Đông, K’iăng khua adŭ bruă lŏ hma mđĭ kyar krĭng ƀuôn sang kdriêk Êa Kar, anôk bruă pô mtam nao drông mnuih ƀuôn sang nao dôk ti anôk dôk mrâo mơ̆ng knơ̆ng kdơ̆ng êa Akŏ Krông Pač brei thâo, klei mnuih ƀuôn sang bi đru rŭ mdơ̆ng pưk sang đru ruh mtlaih leh klei dleh dlan kơ kdriêk hlăk klei ruă dôk mâo dleh dưi ksiêm dlăng, amâo dưi tiŏ nao êpul nao đru kơ mnuih ƀuôn sang. Êlâo hĭn, kdriêl đru kơ êpul rŭ mdơ̆ng sang prăk blei êa mnăm, huă ƀơ̆ng, čhiăm guôm ƀô̆ kñăm gang mkhư̆ klei ruă tưp. Ƀiădah hŏng ênoh gŏ êsei nao mkŏ anôk dôk mrâo lu, hlăm brô 230 gŏ êsei ti anôk dôk mrô 1 lehanăn giăm 500 gŏ êsei ti anôk dôk mrô 2, hlăk klei ruă tưp huĭ srăng mâo hlăm wưng sui, anôk bruă sang čư̆ êa kdriêk lehanăn Anôk kriê dlăng bruă knuă mơ̆ng čar dôk bi hgŭm, čih mkra hdră kčah ngă bruă, đru kơ dŭm êpul rŭ mdơ̆ng sang. Klei anei srăng rơ̆ng kjăp kơ ai tiê mă bruă mơ̆ng mnuih ƀuôn sang lehanăn đru mtrŭt mđĭ ai mnuih ƀuôn sang čiăng kơ hdră mkŏ anôk dôk mrâo dưi bi leh mta kñăm mâo kčah mtrŭn hlăm boh klei ară anei:

“Ênoh prăk đru ară anei snăn Anôk kriê dlăng bruă knuă čar dôk ksiêm tĭng, kdriêk srăng mkŏ mjing klei bi kƀĭn kñăm bi mklă ênoh prăk duh kơ bruă anei. Lehkơnăn, tơdah dưi bi mklă hmei srăng ba yua ênoh prăk anei pioh tĭng tla kơ dŭm gŏ êsei mnuih ƀuôn sang nao hgŭm đru kơ dŭm gŏ êsei mrâo nao dôk, mâo 200.000 prăk/hruê.

          Hlăk klei ruă dôk mâo dleh dưi ksiêm dlăng, hdră mkŏ anôk dôk mrâo mơ̆ng knơ̆ng kdơ̆ng êa Akŏ krông Pač kreh tuôm hŏng lu klei dleh dlan. Hŏng ai tiê bi hgŭm mguôp, mnuih ƀuôn sang tinei dôk bi đru hdơ̆ng găp čiăng kơ bruă mkŏ anôk dôk mrâo dưi bi leh mta kñăm mâo kčah mtrŭn jing hnưm bi h’ĭt klei hdĭp kơ mnuih ƀuôn sang./.

                                                    Pô mblang: H’Nêč Êñuôl