VOV4.Êđê - Wăl dliê knŭk kna mkuôm An Toàn mâo ênhă 22.500 ha ti să An Toàn, kdriêk An Laõ, čar Bình Định. Dŭm kdrăn dliê hrông, lu mnơ̆ng hdĭp mâo êpul bruă djŏ tuôm leh anăn mnuih ƀuôn sang Bahnar bi hgŭm răng mgang kjăp. Mơ̆ng năn, amâo djŏ knŏng mâo thiăm prăk hrui wĭt ôh ƀiădah lŏ dưi răng mgang ngăn dŏ dliê kmrơ̆ng mơ̆ng ala čar.

Mlan 7, mlan nao mă êa hnuê, mâo dŭm čô mnuih ƀuôn sang kreh nao mŭt hlăm Wăl dliê knŭk kna mkuôm An Toàn, kdriêk An Lão čiăng mă êa hnuê. Lu mnuih tlĕ yua pui čiăng mă êa hnuê kyua anăn huĭ srăng mâo klei pui ƀơ̆ng dliê. 230 gŏ êsei mnuih djuê ana Bahnar ti să An Toàn, kdriêk Lão An dưi phăn jao kriê dlăng 7.500 ha dliê tinei kreh nao hiu suang dlăng mnuih nao mŭt hlăm dliê. Hồ Văn Kem ti alŭ 1, să An Toàn, kdriêk An Lão dưi phăn jao răng mgang 60 ha dliê ti Wăl dliê knŭk kna mkuôm An Toàn. Mâo hnư hrui wĭt mơ̆ng bruă răng mgang dliê, Kem mâo nanao klei đua klam mơ̆ng pô hlăm bruă kriê dlăng ênhă dliê mâo jao. Kem mbĭt hŏng 5 čô mnuih Bahnar hlăm alŭ mkŏ mjing leh sa êpul hiu suang dlăng dliê mbĭt. Grăp mlan, hiu suang dlăng 2 blư̆ hlăm dliê, pral hmao ƀuh mnuih mkăn nao mŭt hlăm dliê. “Nao hiu suang dlăng grăp mlan, grăp hruê kăm tơdah ƀuh arăng nao mŭt hlăm dliê kâo nao hưn mtam hŏng Anôk bruă kriê dlăng, Anôk bruă sang čư̆ êa să kñăm msir mghaih, mă kơ̆ng phung anăn. Knŭk kna mđing uêñ, mnuih ƀuôn sang kriê dlăng, răng mgang dliê snăn pô ăt m’ak mơh, ăt mâo prăk hrui wĭt grăp thŭn kơ klei hdĭp.

Wăl dliê knŭk kna mkuôm An Toàn siă knông hŏng dŭm să krĭng dlông kdriêk Hoài Ân, Vĩnh Thạnh, čar Bình Định lehanăn dŭm kdriêk čư̆ čhiăng ti čar Quảng Ngãi, Gia Lai. Êngao dŭm ktuê êlan mlir să, mlir kdriêk, tinei lŏ mâo lu êlan điêt kyua anăn dleh dưi ksiêm dlăng mnuih nao mŭt hlăm dliê. Anôk kriê dlăng dliê An Toàn brei leh 20 čô knuă druh dôk gak ti 3 anôk, hiu suang dlăng, ksiêm dlăng nanao čiăng pral gang mkhư̆ klei bi rai dliê. Nguyễn Phước Thiện, Anôk bruă răng mgang dliê An Toàn 1, Anôk kriê dlăng dliê An Toàn, kdriêk An Lão brei thâo, khădah hruê mdei amâo dah mlam mâo nanao phung knuă druh dôk gak răng čiăng ksiêm dlăng mnuih, kdrăp mnơ̆ng mŭt kbiă hlăm dliê, mtă kơ mnuih ƀuôn sang nao mă êa hnuê dliê amâo dưi djă yua pui ôh. “Anôk bruă hmei mkŏ mjing nanao hdră hiu suăng êwăng, ksiêm dlăng hluê gưl hlăm grăp mlan. Bi hgŭm hŏng êpul kriê dlăng, răng mgang dliê mơ̆ng alŭ tui ksiêm. Anôk bruă ăt gak răng, ksiêm dlăng mnuih, kdrăp mnơ̆ng găn êrô, arăng duah mdiăng mnơ̆ng dhơ̆ng hlăm dliê kmrơ̆ng soh hdră bhiăn mơ̆ amâo dah h’aĭ. Truh kơ yan boh ươi hmei mtô mblang, dôk huă ƀơ̆ng hŏng mnuih ƀuôn sang, hrăm mbĭt hŏng mnuih ƀuôn sang nao mŭt hlăm dliê hiu ksiêm dlăng. Truh kơ ară anei, mnuih ƀuôn sang tinei amâo duah yua anuă druôm ana ươi ôh.

Truh kơ ară anei, Anôk kriê dlăng dliê An Toàn kuôl kă leh hdră bi hgŭm răng mgang dliê hŏng dŭm pô dliê siă knông; mkŏ mjing dŭm êpul răng mgang dliê ti alŭ wăl čiăng mtô mblang mđĭ klei thâo săng kơ mnuih ƀuôn sang hlăm bruă răng mgang dliê. Anôk kriê dlăng dliê An Toàn ăt phăn jao, kriê dlăng dliê kơ êbeh 230 gŏ êsei jing mnuih djuê ana Bahnar ti să An Toàn hŏng ênhă 7.500 ha, mơ̆ng anăn mđĭ lar bruă klam mơ̆ng êpul êya alŭ wăl hlăm bruă răng mgang dliê.

Khiếu Đức Thịnh, K’iăng khua anôk bruă kriê dlăng dliê An Toàn brei thâo, wăl anôk anei mâo lu mta hlô mnơ̆ng yuôm hin brei răng mgang msĕ si: Kuêñ miêng kñĭ, hlô rang, đruah, mnŭ dliê…. brei răng mgang kjăp. Hlăm wưng êgao, bruă phăn jao răng mgang dliê kơ êpul êya mnuih ƀuôn sang mđĭ leh klei thâo săng lehanăn klei đua klam mơ̆ng mnuih ƀuôn sang hlăm bruă răng mgang dliê: “Čiăng dưi răng mgang kjăp dliê knŭk kna jao, Anôk bruă kriê dlăng dôk čih mkra hdră kriê dlăng dliê h’ĭt kjăp, ba mdah kơ Anôk bruă sang čư̆ êa čar bi mklă. Hŏng dŭm hdră msir kriê dlăng êngao wăl dliê, anôk bruă kuôl kă leh hdră bi hgŭm kriê dlăng, răng mgang dliê hŏng pô dliê siă knông hlăm kluôm kdrêč dliê pô kriê dlăng. Bi hgŭm hŏng bruă sang čư̆ êa alŭ wăl mtô mblang hlăm grăp thŭn, grăp mlan čiăng mđĭ klei thâo săng mơ̆ng êpul êya hlăm bruă răng mgang dliê. Brei hluê ngă kjăp hdră răng mgang dliê, mđĭ hnư hrui wĭt ăt msĕ mơh bi mklă klei đua klam mơ̆ng mnuih ƀuôn sang hlăm bruă răng mgang dliê.

Nguyễn Thị Tố Trân, K’iăng khua knơ̆ng bruă Lŏ hma mđĭ kyar krĭng ƀuôn sang čar Bình Định brei thâo, Anôk kriê dlăng wăl dliê mbĭt hŏng bruă sang čư̆ êa alŭ wăl lehanăn mnuih ƀuôn sang răng mgang leh kjăp kdriêl dliê mâo phăn jao kriê dlăng: “Kluôm čar mâo wăl dliê An Toàn anei hŏng ênhă prŏng êdi, dôk tal 2 kơ klei lu jơr ana kyâo mtâo, mnơ̆ng dhơ̆ng hdĭp. Anôk kriê dlăng dliê An Toàn dôk ngă jăk hdră bi hgŭm hŏng bruă sang čư̆ êa alŭ wăl mơ̆ng gưl kdriêk truh kơ să ăt msĕ mơh ngă jăk hdră bi hgŭm hŏng êpul êya hlăm bruă răng mgang wăl dliê An Toàn.