VOV4.Êđê - Aguah anei 17-8, ti Sang kƀĭn ala, mphŭn pŏk klei bi kƀĭn tal 2 mơ̆ng Dhar bruă kƀĭn ala. Mkŏ mjing hlăm 2 hruê, klei bi kƀĭn anei, Dhar bruă kƀĭn ala srăng brei klei blŭ mguôp hlăm 4 boh phŭn prŏng, hlăm anăn mâo klei blŭ mguôp tal êlâo kơ bruă mprăp Klei bi kƀĭn tal 2, bruă kƀĭn ala gưl 15. Hlăm klei bi kƀĭn anei, Dhar bruă kƀĭn ala brei klei blŭ mguôp kơ klei hưn mdah mơ̆ng Knŭk kna kơ boh klei hluê ngă klei bhiăn, hdră êlan kơ ênua ala ƀuôn, kriê dlăng leh anăn ba yua keh ênua ala ƀuôn thŭn 2020; ksiêm bi mklă kơ klei bhiăn, hnơ̆ng kčah leh anăn hnơ̆ng mbha mĭn tĭng bi liê prăk knŭk kna thŭn 2022. Hlăm klei bi kƀĭn, Dhar bruă kƀĭn ala srăng ksiêm wĭt Klei bi kƀĭn tal sa, bruă kƀĭn ala gưl 15 leh anăn brei klei blŭ mguôp tal êlâo kơ bruă mprăp kơ klei bi kƀĭn tal 2, bruă kƀĭn ala gưl 15, brei klei blŭ hlăm hră čih Hdră mtrŭn kčah klei bhiăn mă bruă bi hmô mơ̆ng Êpul hgŭm djuê ana, dŭm Dhar bruă mơ̆ng bruă kƀĭn ala, ksiêm dlăng, bi mklă bruă mkŏ mjing, ruh mgaih Anôk bruă ksiêm dlăng êpul lĭng kahan leh anăn bi knar, Anôk bruă ksiêm dlăng klei ngă soh krĭng wăl hlăm Êpul kahan yang ƀuôn…

H Zawut pô mblang