VOV4.Êđê- Tlam 1-8, Khua dlăng bruă Đảng ƀuôn prŏng Hồ Chí Minh leh anăn Khua phŭn bruă mdrao mgŭn Nguyễn Thanh Long ksiêm dlăng leh hnơ̆ng mkŏ mjing dŭm Anôk bruă krŭ wĭt klei suaih pral mdrao klei ruă Covid-19. Phŭnb bruă mdrao mgŭn mtă mjêč drông mnuih ruă Covdi-19 ti 4 anôk bruă krŭ wĭt klei suaih pral anei, jao Sang êa drao Sang hră gưl prŏng mdrao mgŭn ƀuôn prŏng Hồ Chí Minh rơ̆ng dŭm bruă klam tinei.

Wăl mdrao mgŭn kơ mnuih ruă Covdi-19 srăng dưi ba yua mơ̆ng dŭm anôk bruă mâo leh mơ̆ng sang êa drao msĕ si masin bi êwa, jhưng đih mdrao. Êlâo hĭn srăng mâo 70 jhưng, mĭn tĭng mdĭ 500 jhưng krŭ wĭt klei suaih pral. Mhŭn mơ̆ng hruê 2-8, sang êa drao srăng mphŭn drông mnuih ruă Covid-19. Êpul mă bruă ăt nao ksiêm dlăng leh Anôk krŭ wĭt klei suaih pral 500 jhưng đih mdrao ti Sang êa drao jing jao mrô 16 (Kdiêk čar 7, ƀuôn prŏng Hồ Chí Minh), anôk sang êa drao Bạch Mai dôk dưi jao ngă bruă gĭt gai. Khua gĭt gai ƀuôn prŏng Hồ Chí Minh Nguyễn Văn Nên brei mđing mđĭ bi hrŏ hră mơar, mbŏ pral hĭn dŭm klei adôk kƀah čiăng dŭm anôk bruă drông mtam mnuih ruă kjham mŭt đih mdrao.

Pô mblang: H’Zawut Ƀuôn Yă