VOV4.Êđê - Hluê si klei tĭng mơ̆ng Phŭn bruă Sang hră m’ar mtô bi hriăm, klei bi lông gưl 3 thŭn 2021 srăng mkŏ mjing mơ̆ng hruê 7 – 9/7 anăp truh. Klei bi lông thŭn anei dưi mkŏ mjing hlăk klei ruă tưp Covid 19 dôk mâo dleh dưi ksiêm dlăng kyua anăn dŭm hdră hlăm bruă mkŏ mjing klei bi lông brei rơ̆ng kjăp klei êđăp ênang gang mkhư̆ klei ruă. Ti krĭng lăn dap kngư, hlăm wưng êgao, anôk bruă mtô bi hriăm alŭ wăl mtrŭt mđĭ leh hdră bi leh klei hriăm kơ adŭ 12 lehanăn mkŏ mjing hdră bi hriăm mbŏ klei thâo bi lông djŏ guôp, tŭ dưn kơ phung hđeh.

Ti anăp klei dleh ktuê dlăng mơ̆ng klei ruă Covid-19, bruă sang hră Dak Lak hlăk gĭr pŏk ngă lu hdră bi hriăm mjuăt, đru hđeh sang hră adŭ 12 mprăp jăk hĭn kơ klei bi lông hriăm jih gưl tlâo.Thŭn anei, Dak Lak mâo êbeh 19.800 čô hđeh hriăm hră čih anăn bi lông. Hlăm anăn mâo êbeh 4.700 čô hđeh čih anăn bi lông hriăm jih gưl tlâo. 14.400 čô hđeh bi lông hriăm jih gưl tlâo mŭt hriăm Đại học, Cao đẳng. Ti anăp klei ruă tưp Covid-19 dleh ktuê dlăng, hlăk čar Dak Lak mâo leh đa đa phung djŏ klei ruă Covid-19, bruă Sang hră leh anăn mjuăt bi hriăm Dak Lak pral mâo hdră čiăng bi hriăm mjuăt leh anăn mkŏ mjing klei bi lông djŏ guôp hŏng boh sĭt mkŏ mjing klei bi lông.

Hŏng phung hđeh hriăm adŭ 12, Knơ̆ng bruă sang hră leh anăn mtô bi hriăm gĭt gai leh dŭm sang hră mơ̆ng hdră kčah bi hriăm pral mkŏ mjing hdră, ba nao jih êpul kơ bruă hriăm mjuăt bi lông hriăm jih gưl 3. Hlăm anăn, dŭm boh sang hră mbha kơ khua gĭt gai klam bruă hluê si mta klei hriăm amâo dah hluê si adŭ, mđĭ ai, pah mni hŏng mnuih, êpul bruă ngă jăk, lač, ƀuah ăl kơ phung, êpul ngă ngơi mang hlăm bruă hriăm mjuăt bi lông. Khă gơ̆ hmaĭ mơ̆ng klei ruă Covid-19, ƀiădah phung hđeh adŭ 12 hlăm kluôm čar ăt nao sang hră msĕ aguah tlam mguôp hŏng hriăm trưc tuyến leh anăn bruă sang hră Dak Lak mprăp leh dŭm hdră hriăm, hdră hriăm mjuăt hlăm boh klei ruă tưp Covid-19, sĭt čiăng êdi ba ngă bruă mtam. Phạm Đăng Khoa, Khua Knơ̆ng bruă sang hră - mtô bi hriăm Dak Lak brei thâo:“Hmei hlăk dôk gĭt gai jih ai tiê dŭm boh sang hră hlăm bruă mkŏ mjing klei hriăm mjuăt, mbĭt anăn hlăk gĭr kčĕ hŏng Knơ̆ng bruă sang čư̆ êa čar kơ bruă mkŏ mjing anôk bruă gĭt gai bi lông gưl čar, pŏk ngă hdră kčah mkŏ mjing klei bi lông, ksiêm dlăng dŭm klei găl mkŏ mjing klei bi lông čiăng dưi mkŏ mjing hŏng klei êđăp ênang, bi jăk, djŏ klei bhiăn čiăng mâo hnơ̆ng jăk, klei tŭ bi lông hriăm jih gưl 3 jăk hĭn thŭn hriăm 2019-2020”.

Mrâo êgao, Knơ̆ng bruă sang čư̆ êa čar Lâm Đồng mâo leh hră mơar tŭ ư hdră êlan brei hđeh sang hră gưl 3, sinh viên dŭm sang hră ti alŭ wăl mkŏ mjing klei bi lông gưl tal 2 leh anăn bi leh êlâo hruê 21-5. Mjưh ruê̆ gưl bi lông anei, phung hđeh sang hră, sinh viên ti čar lŏ dơ̆ng mdei sang hră čiăng gang mkhư̆ Covid-19. Hjăn hđeh sang hră adŭ 12, Knŏng bruă sang čư̆ êa čar Lâm Đồng mră kơ Knŏng bruă sang hră mtô bi hriăm ktrâo lač mkŏ mjing hriăm mjuăt bi lông hriăm jih gưl 3 hŏng hdră trực tuyến. Hŏng dŭm alŭ wăl dleh dlan, krĭng mnuih djuê ƀiă, amâo mâo klei găl kdrăp mnơ̆ng čiăng bi hriăm trực tuyến snăn dưi mkŏ mjing hriăm sa anôk ƀiădah brei bi doh, mdjiê kman hlăm sang hră, adŭ hriăm, kdrăp mnơ̆ng mtô bi hriăm êlâo kơ hđeh sang hră nao ti sang hră. Hlăm wưng phung hđeh nao sang hră, amâo bi kƀĭn êbeh 30 čô hđeh/adŭ leh anăn truă čhiăm guôm ƀô̆, mdjiê kman, hưn klei suaih pral, dôk bi kbưi, rơ̆ng dŭm hdră kčah gang mkhư̆ klei ruă tưp.

Hlăm klei bi kƀĭn mơ̆ng Anôk bruă gĭt gai gưl Ala čar bi lông hriăm jih gưl 3  thŭn 2021 mrâo anei, K’iăng Khua Phŭn bruă sang hră mtô bi hriăm Nguyễn Hữu Độ,  Khua anôk bruă gĭt gai mtă hlăm dŭm êpul ksiêm dlăng brei mâo klei bi hgŭm mơ̆ng êpul mdrao mgŭn. Anei jing klei mtă yuôm bhăn snăk, kyua klei bi lông thŭn anei mkŏ mjing hlăm boh klei ruă tưp Covid-19 dleh ktuê dlăng anăn jih jang bruă hlăm klei bi lông brei rơ̆ng gang mkhư̆ klei ruă tưp. Hluê si klei hâo hưn mơ̆ng Nguyễn Đức Cường,

Khua ksiêm dlăng hlăm Phŭn bruă sang hră mtô bi hriăm, klei bi lông thŭn anei ăt dưi krơ̆ng hơĭt, dưi dưn leh anăn mâo klei bi mlih bi djŏ guôp hŏng klei găl mkŏ mjing klei bi lông hlăm boh klei ruă tưp. Hluê anăn, mă klei hriăm mơ̆ng klei bi lông thŭn 2020, bruă ksiêm dlăng jih jang dŭm hdră mkŏ mjing klei bi lông thŭn 2021 dưi ngă mơ̆ng gưl dlông truh jih jang dŭm alŭ wăl. Hŏng dŭm alŭ wăl mâo ênoh phung bi lông lu, dŭm klei bi lông êlâo kơ bluh mâo lu mta bruă thŭn anei srăng dưi mkŏ mjing klei ksiêm dlăng tliêr kjăp mơ̆ng bruă mprăp kơ klei bi lông. Nguyễn Đức Cường, Khua ksiêm dlăng hlăm Phŭn bruă sang hră mtô bi hriăm brei thâo:“Kơ bruă brei puăng bi lông snăn anei jing klei bi mlih bi djŏ guôp hĭn, hluê si klei kčah mtrŭn mơ̆ng Hdră bhiăn ksiêm dlăng snăn thŭn anei hrô kơ bruă ksiêm dlăng bruă brei puăng hlăm wưng brei puăng bi lông hŏng bruă ăt mkŏ ming klei ksiêm dlăng brei puăng hlăm jih wưng êpul hgŭm brei puăng. 63 êpul ksiêm dlăng mơ̆ng Phŭn bruă ti 63 êpul hgŭm brei puăng hlăm jih wưng brei puăng čiăng rơ̆ng klei djŏ. Dŭm êpul anei snăn hmei ăt ba nao dŭm êpul mơ̆ng Phŭn bruă leh anăn phung nao mŭt Đại học.

 Hluê si klei ksiêm yap mơ̆ng Phŭn bruă sang hră mtô bi hriăm, truh ară anei mâo leh êbeh 1 êklăk čô bi lông čih anăn bi lông hriăm jih gưl  thŭn 2021, hlăm anăn mâo êbeh 41 êbâo čô bi lông êngiê. Hlăm ênoh êbeh 1 êklăk čô čih anăn bi lông hriăm jih gưl 3 thŭn anei, mâo êbeh 222 êbâo čô bi lông knŏng ksiêm dlăng hriăm jih gưl 3, êbeh 33 êbâo čô bi lông knŏng ksiêm dlăng akâo mŭt hriăm gưl dlông. Ênoh phung bi lông ksiêm dlăng hriăm jih gưl 3 leh anăn akâo mŭt hriăm gưl dlông mâo êbeh 758 êbâo čô, mâo 74%. Ênoh phung bi lông ruah klei bi lông kreh knhâo ala ƀuôn ăt mâo lu hĭn hŏng 541 êbâo čô.