VOV4.Êđê- Ka truh mơh 1 mlan, êbeh sa êklăk čô hđeh kluôm ala srăng mŭt hlăm klei bi lông gưl 3 thŭn 2021. Truh kơ ară anei, dŭm alŭ wăl hlăm kluôm ala pŏk ngă leh kjăp hdră mprăp kơ klei bi lông anei, hlăm anăn mâo bruă mđĭ klei đua klam mơ̆ng pô kiă kriê dŭm anôk bruă sang hră m’ar mtô bi hriăm, dŭm dhar bruă, khua anôk bruă sang čư̆ êa alŭ wăl, mđing truh kơ mta kñăm mkŏ mjing sa klei bi lông êđăp ênang, klă mngač.

Truh wưng anei, dŭm alŭ wăl mkŏ mjing Anôk bruă gĭt gai Klei bi lông hriăm jih gưl 3 thŭn 2021 mơ̆ng čar, mbha klă bruă klam kơ grăp anôk bruă djŏ tuôm, hlăm anăn Knơ̆ng bruă sang hră mtô bi hriăm klam bruă mkŏ mjing dŭm hdră bi lông bi djŏ guôp hŏng klei ruă Covid-19. Đa đa alŭ wăl msĕ si Hải Phòng; Dak Lak… lŏ mkŏ mjing Anôk bruă gĭt gai klei bi lông gưl kdriêk, wăl krah, ƀuôn prŏng čiăng đru kơ bruă mkŏ mjing klei bi lông mơ̆ng dŭm sang hră ti alŭ wăl. Hlăm boh klei ruă tưp, êngao kơ dŭm anôk bi lông klă sĭt, dŭm čar, ƀuôn prŏng bi mĭn tĭng mkŏ mjing dŭm anôk bi lông hjăn kơ phung F1 čiăng rơ̆ng klei dưi kơ phung hđeh. Dŭm anôk bi lông dưi mprăp djăp ênŭm kdrăp mnơ̆ng pioh gang mkhư̆ klei ruă tưp.

Nguyễn Văn Long, K’iăng Khua Knơ̆ng bruă sang hră mtô bi hriăm čar Gia Lai brei thâo, čar mâo êbeh 14 êbâo čô hđeh čih anăn bi lông, dưi mkŏ mjing ti 39 anôk bi lông. Alŭ wăl mkŏ mjing leh hdră bi lông hriăm jih gưl 3 hŏng 4 gưl čiăng gang mkhư̆ klei ruă Covid-19. Ară anei mbĭt hŏng bruă mkŏ mjing klei bi hriăm mjuăt kơ hđeh sang hră, alŭ wăl mđĭ ktang bruă hâo hưn, hmao mkăp klei hâo hưn kơ knuă druh, nai mtô, mnuih mă bruă leh anăn phung bi lông, amĭ ama kơ boh klei ruă tưp mbĭt hŏng klei hưn răng mơ̆ng dŭm anôk bruă djŏ tuôm kơ hdră gang mkhư̆ klei ruă tưp.

“Knơ̆ng bruă sang hră mtô bi hriăm gĭt gai leh dŭm anôk bruă pŏk ngă dŭm bruă kơ klei bi lông djŏ hdră bhiăn, mâo hdră kčah, rơ̆ng dŭm klei mtă gang mkhư̆ klei ruă tưp hlăm boh klei ruă tưp dleh ktuê dlăng. Hlăk anăn mâo 4 hdră mkŏ mjing klei bi lông hŏng 4 gưl hnơ̆ng klei ruă tưp. Klei bi lông ăt dưi mkŏ mjing hluê hdră mbĭt mơ̆ng Phŭn bruă sang hră mtô bi hriăm, Knơ̆ng bruă ăt mâo leh hră mơar mtă kơ phung hđeh sang hră nao hlăm klei bi lông, phung knuă druh dlăng klei bi lông leh anăn phung mă bruă hlăm klei bi lông brei hưn klei suaih pral êlâo 7 hruê mkŏ mjing klei bi lông. Leh anăn ba jih klei hâo hưn kơ dŭm anôk čih anăn nao hlăm klei bi lông, dŭm anôk bi lông čiăng hlak mblang, msir mgaih.”

 Jing sa hlăm dŭm alŭ wăl mâo ênoh hđeh čih anăn bi lông hriăm jih gưl 3 lu hĭn kluôm ala, hŏng êbeh 88 êbâo čô hđeh, Lê Hoài Nam, K’iăng Khua Knơ̆ng bruă sang hră mtô bi hriăm ƀuôn prŏng Hồ Chí Minh brei thâo, Knơ̆ng bruă mtrŭn leh dŭm hră mơar ktrâo lač mkŏ mjing klei bi lông kơ kdrăp mnơ̆ng ăt msĕ mơh mnuih mă bruă čiăng ngă bruă kơ klei bi lông, wăt tơdah ênoh bi liê kơ klei bi lông luič liê lu hĭn kyua čiăng rơ̆ng klei êđăp ênang gang mkhư̆ klei ruă tưp:

“Hmei mâo leh hdră msir leh anăn ƀuôn prŏng ăt duh bi liê mkăp ngăn prăk čiăng mprăp kdrăp mnơ̆ng gang mkhư̆ klei ruă tưp ti 160 anôk bi lông anei, mkăp êbeh 1 êklai kdrăp mnơ̆ng rao kngan, msĕ si čhiăm guôm ƀô̆ leh anăn rơ̆ng grăp boh adŭ bi lông bi lông mâo sơaĭ êa rao kngan, mkă hnơ̆ng hlơr asei mlei, ngă djŏ 5 mta klei mtă gang mkhư̆ klei ruă tưp”.

 Hlăm klei bi kƀĭn online kơ bruă mkŏ mjing Klei bi lông hriăm jih gưl 3 thŭn 2021 mrâo Phŭn bruă sang hră mtô bi hriăm mkŏ mjing hŏng 63 čar, ƀuôn prŏng mrâo anei, khua gĭt gai Phŭn bruă sang hră mtô bi hriăm čih yap klei mprăp jăk mơ̆ng dŭm alŭ wăl hlăm klei mprăp mkŏ mjing klei bi lông. Mñă klă hnơ̆ng yuôm bhăn wăt hlăm klei bi lông, K’iăng Khua phŭn bruă sang hră mtô bi hriăm Nguyễn Hữu Độ ăt mtă kơ dŭm êpul hgŭm mkŏ mjing klei bi lông mprăp kdrăp mnơ̆ng, boh nik mnuih mă bruă djăp knhuah hdĭp čiăng mkŏ mjing klei bi lông rơ̆ng klei êđăp ênang, jăk leh anăn djŏ hdră bhiăn:

“Ruah djŏ mnuih, jao djŏ bruă. Drei ăt mă bruă klam phŭn jing mkŏ mjing klei bi lông klă sĭt jing kpă ênuah, mâo hnơ̆ng jăk, rơ̆ng mtăp mđơr snăn ruah djŏ mnuih jing sa bruă yuôm bhăn. Phung mâo knuih jăk, mâo klei thâo, mâo bruă klam, bi jăk hlăm hdră mkŏ mjing leh anăn ruah pô djă akŏ, boh nik jing dŭm sang hră mkŏ mjing klei bi lông, leh anăn phung khua gĭt gai - Khua anôk bruă dlăng klei bi lông brei puăng. Ƀiădah pô djă akŏ ngă bi jăk snăn klei bi lông srăng jăk.”

 Mprăp bi jăk kơ bruă mkŏ mjing Klei bi lông hriăm jih gưl 3 thŭn 2021, Phŭn bruă sang hră mtô bi hriăm mbĭt hŏng dŭm alŭ wăl ngă mprăp leh jăk, rơ̆ng djŏ hnơ̆ng. Khădah giăm anei, klei ruă Covid-19 mkŏ mjing hŏng lu hdră dleh ktuê dlăng. Mă klei hriăm mơ̆ng thŭn dih, Phŭn bruă sang hră mtô bi hriăm mbĭt hŏng dŭm alŭ wăl srăng mkŏ mjing Klei bi lông hriăm jih gưl 3 thŭn anei hluê si hdră kčah, ƀiădah knŏng mkŏ mjing gưl bi lông hlăm 2 hruê 7 leh anăn 8 mlan 7 ti dŭm anôk êđăp ênang leh anăn phung bi lông jing F0, F1, F2.  Mai Văn Trinh,  Khua Knơ̆ng bruă kriê dlăng hnơ̆ng jăk, Phŭn bruă sang hră mtô bi hriăm brei thâo:

“Truh giăm wưng anei, tơdah ăt mâo dŭm anôk ngă klei kwang dar amâo dah bi ktlah yang ƀuôn hluê si Asăp mtrŭn mơ̆ng Khua Knŭk kna čiăng gang mkhư̆ klei ruă Covid-19 snăn gưl bi lông hruê 7 - 8/7/2021 knŏng mkŏ mjing kơ dŭm anôk êđăp ênang leh anăn kơ phung bi lông amâo djŏ jing F0, F1, F2. Snăn, klă sĭt, Phŭn bruă sang hră mtô bi hriăm srăng mbĭt hŏng dŭm alŭ wăl mkŏ mjing thiăm gưl bi lông tal 2 kơ phung bi lông ka dưi bi lông hlăm gưl tal 1”.

 Hŏng bruă hrŏng ruah mŭt hriăm sang hră gưl prŏng, gưl krah, boh nik hŏng phung bi lông hrŏng ruah mŭt hriăm hlăm dŭm sang hră gưl prŏng, gưl krah hŏng klei ba yua klei tŭ bi lông hriăm jih gưl 3 thŭn 2021, Phŭn bruă sang hră mtô bi hriăm srăng gĭt gai dŭm anôk bruă sang hră gưl prŏng mkra mlih hdră, mmông, hnơ̆ng hrŏng ruah čiăng rơ̆ng klei dưi kơ phung bi lông mŭt hriăm hŏng klei yua boh tŭ bi lông hriăm ruê̆ gưl 3 thŭn 2021 hlăm lu gưl mdê mdê. Phŭn bruă sang hră mtô bi hriăm ăt srăng mkŏ mjing klei bi lông kơ hnơ̆ng dleh čiăng rơ̆ng klei dưi kơ phung bi lông ti dŭm gưl bi lông mdê mdê.

                                                    Pô mblang: H’Nêč Êñuôl