VOV4.Êđê - K’iăng khua knŭk kna Lê Minh Khái, khua êpul gĭt gai mlih mrâo, mđĭ kyar bruă duh mkra mbĭt, êpul bi mguôp mrâo mâo leh hdră mtrŭn kơ hdră êlan bi mklin 10 thŭn tui ngă klei bhiăn êpul bi mguôp thŭn 2012. Bruă kñăm ti nei jing bi mklin, čih yap dŭm boh tŭ dưn dưi mâo, dŭn boh klei dôk mâo, klei kă djŏ lehanăn phŭn gha, mơ̆ng anăn dưi mă klei hriăm hlăm bruă tui ngă klei bhiăn êpul bi mguôp thŭn 2012. Đru kčĕ dŭm hdră êlan čiăng mgaih msir dŭm klei dleh dlan, kpăk êgun čiăng dưi mđĭ hnơ̆ng, mâo boh tŭ dưn hlăm bruă ksiêm dlăng mơ̆ng knŭk kna kơ bruă duh mkra mbĭt, êpul bui mguôp, hưn mthâo hŏng knŭk kna, bruă kbĭn ala dưi bi mlih, bi mbŏ klei bhiăn êpul bi mguôp lehanăn bi kluôm ênŭm dŭm hră mơar klei bhiăn djŏ hŏng klei čiăng hlăm bruă mđĭ kyar bruă duh mkra mbĭt, êpul bi mguôp. Êngao kơ năn, čih yap dŭm boh tŭ dưn dưi mâo dŭm boh klei dôk, klei ka thâo bi djŏ, ngă hrăm mbĭt dŭm klei bhiăn êpul bi mguôp thŭn 2012 hlăm klei bhiăn ala čar, thâo bĭt phŭn agha, klei hriăm lehanăn klei kčĕ, hưn mthâo dŭm hdră êlan mgaih msir, ruh mgaih dŭm klei dleh dlan, bi lar dŭm boh tŭ dưn dưi mâo, mđĭ hnơ̆ng tŭ dưn tui ngă klei bhiăn êpul bi mguôp.

Y Bel pô mblang