VOV4.Êđê - Ti anôk bi kƀĭn Anôk bruă ala čar gĭt gai hdră gang mkhư̆ klei ruă Covid 19 hlăm tlam hruê 12/3, phung khua Phŭn bruă mdrao mgŭn hưn mthâo leh kơ hdră bi trông, blei vaccine AstraZeneca. Mĭt tĭng, hlăm hruê 25/3, dŭm hnư vaccine tal êlâo mơ̆ng HDră bruă COVAX Facility (hlăm brô 1,37 êklăk hnư vaccine AstraZeneca) srăng truh kơ Việt Nam. Êlâo anăn, hdră bruă COVAX Facility ƀuăn srăng đru 30 êklăk hnư vaccine kơ Việt Nam hluê gưl hlăm thŭn 2021. Mbĭt anăn, Phŭn bruă mdrao mgŭn hlăk lehanăn dôk bi trông hŏng dŭm anôk bruă mkra mjing vaccine mkăn tar rŏng lăn msĕ si Pfizer, Moderna, Johnson & Johnson, Sputnik V… čiăng dưi mâo mkăp djăp, pŏk mlarr krĭng ba yua vaccine gang mkhư̆ COVID-19. Truh ară anei, kluôm ala tlŏ leh kơ êbeh 1.700 čô knuă druh, mnuih mă bruă mdrao mgŭn nao hgŭm hlăm hdră gang mkhư̆ klei ruă Covid 19 ti 10 čar, ƀuôn prŏng./.

H Nêč pô mblang