VOV4.Êđê -  Ară anei, ala čar drei dôk kƀah lu hnơ̆ng vaccine čiăng dưi tlŏ mgang hlăm yang ƀuôn. Mčhua hŏng klei čiăng tlŏ mgang vaccine mơ̆ng mnuih ƀuôn sang, hlăm êlan Internet mâo lu klei iêu jak mơ̆ng dŭm anôk bruă, êpul êya, knơ̆ng bruă mnia mblei vaccine klei ruă tưp Covid-19 amâodah tlŏ mgang vaccine kơ mnuih mă bruă, ƀĭng hgŭm… Čiăng dêč đuê̆ huĭ dah lĕ hlăm klei mplư luar bruă tlŏ mgang vaccine gang mkhư̆ klei ruă tưp Covid-19 jing mnơ̆ng mgưt, amâo thâo bĭt phŭn gha, amâo mâo hnơ̆ng tŭ jăk. Phŭn bruă mdrao mgŭn mtă kơ dŭm alŭ wăl, êpul êya, knơ̆ng bruă mâo klei čiăng blei vaccine gang mkhư̆ klei ruă tưp Covid-19 srăng mâo klei blŭ hrăm klă anăp hŏng dŭm anôk mkra mjing vaccine, mâo blei mơ̆ng dŭm čô dôk krah wah. Dŭm mta vaccine yua ti ala čar Việt Nam srăng dưi mâo klei tŭ ư mơ̆ng phŭn bruă mdrao mgŭn tơdah mâo klei čiăng mjêč hlăm bruă gang mkhư̆ klei ruă tưp. phŭn bruă mdrao mgŭn ăt mñă klă: vaccine tlŏ mgang amâo mâo liê prăk ôh kơ mnuih ƀuôn sang. Kyuanăn, mnuih ƀuôn sang amâo guôn ngă mjêč, dôk guôn truh kơ tuôr pô tlŏ vaccine gang mkhư̆ klei ruă tưp Covid-19 leh mâo klei hưn mdah mơ̆ng dŭm anôk bruă mdrao mgŭn. Mbĭt anăn, mâo nanao klei răng ti anăp dŭm klei iêu jăk nao tlŏ mgang vaccine gang mkhư̆ klei ruă tưp Covid-19 hlăm Internet amâo dah dŭm klei rang mdah mkăn.