VOV4.Êđê- Aguah mbrue (12/8), Êpul hgŭm bruă êdam êra gưl dlông Việt Nam mkŏ mjing leh klei 65 hrue bi ktưn kñăm kkuh mơak 65 thŭn Hrue knhuah gru Êpul hgŭm bruă êdam êra Việt Nam (15/10). Kyua dôk ngă klei bi kbưi hrue asăp mtrŭn mrô 16 mơ̆ng khua knŭk kna, bruă anei dưi ngă hlue hŏng hdră mđung clip mtrŭt mjhar hlăm hla pŏk yang ƀuôn, lehanăn hlăm hdră hâo hưn knŭk kna. Tui si Khua gĭt gai tal êlâo bruă Êdam êra Gưl dlông, Khua êpul hgŭm bruă êdam êra Việt Nam Nguyễn Anh Tuấn, gưl bi ktưn anei mkŏ mjing hlăm klei dleh dlan, snăn čiang bi mâo lu êdam êra nao hgŭm mkŏ mjing hlăm lu bruă. Siămdah, anei yơh jing hdră jăk hĭn, mâo klei yuôm bhăn hĭn anăn jing mtă mtăn kơ jih jang mnuih amâo mâo dưi ngă ngơi mang ôh ti anăp klei ruă tưp prŏng Covid 19, mtă kơ jih jang phung mda asei, hđeh êlăk hlăk ai brei mâo klei thâo gĭr nanao, bi ktưn lu hĭn hlăm wưng kơ anăp, čiăng hrăm mbĭt hŏng lăn čar dưi mdrơ̆ng hŏng klei ruă tưp prŏng lŏ ba wĭt klei hdĭp msĕ si aguah tlam hlăm klei êđăp ênang mrâo./.

Pô mblang: Y – Khem Niê