VOV4.Êđê- Wưng leh êgao mâo klei hưn 17 ha dliê ti čuê dliê 726, dôk hlăm să Ia Dal, kdriêk Ia Hdrai, čar Kontum tuôm hŏng klei phung ƀuôn sang bi rai pioh pla mjing, lehanăn giăm anei mrâo mâo klei ksiêm dlăng. Klei năng čiăng lač ti anei jing hdră mghaih msir hmao lŏ ƀuh lu mta klei bi mngăr, msĕ si ênhă dliê bi rai amâo mâo djŏ ênhă dliê ôh, mbĭt hŏng djăp mta klei mtŭk mtŭl kơ êpul bruă kiă kriê ênhă dliê anăn. Păt čiăng jih 17 ha anôk lăn dliê anei phung ƀuôn sang pla hbei ƀlang, lehanăn kñŭl.

Hlăm anăn mâo dŭm ana kñul dŭm thŭn leh, lehanăn mâo mơh ênhă mrâo bi rai, mrâo pla. Bruă 17 ha lăn dliê ti Ia Dal, kdriêk Ia Hdrai, čar kontum bi rai dliê pioh pla mnơ̆ng mâo leh asei khua bruă Đảng čar kontum Dương Văn Trang gĭt gai ngă bi mngač mơ̆ng akŏ mlan 6. Ƀiădah giăm 1 mlan leh êgao, klei anei mâo dŭm êpul bruă djŏ tuôm ăt adôk mtŭk mtŭl hlăm bruă mghaih msir. Siămdah, boh sĭt jing amâo mâo klei dưi lŏ hngah ôh hlăm alŭ wăl anei lu anak kyâo dliê arăng druôm leh jih, čuh kruh lehanăn klei anei mâo leh mơ̆ng sui ƀiădah amâo mâo klei bi gang mkhư̆, mghaih msir bi pral ôh./.

Pô mblang: Y-Khem Niê