VOV4.Êđê- Aguah mbrue (2/7) ti Hà Nội, mkŏ mjing leh klei bi kƀĭn online hlăm kluôm ala ksiêm wĭt klei kiă kriê bruă knuă 6 mlan akŏ thŭn lehanăn hlue ngă bruă kơ 6 mlan knhal jih thŭn. Khua phŭn bruă kiă kriê bruă knuă Phạm Thị Thanh Trà kiă kriê klei bi kƀĭn, 6 mlan êgao, Dhar bruă kiă kriê bruă knuă čŏng kăp kčĕ, đru leh hŏng jih ai tiê kơ klei tŭ jing bruă ruah phung bi ala bruă kƀĭn ala gưl 15, lehanăn pô bi ala Êpul gơ̆ng bruă ƀuôn sang dŭm gưl wưng păn bruă 2021 – 2026; amâo mâo mdei mlih mrâo boh phŭn bruă knuă, hdră kiă kriê bruă knuă, păn kjăp tui si hdră mtrŭn mơ̆ng klei bi kƀĭn prŏng Đảng 13 lehanăn klei bi kƀĭn prŏng Đảng alŭ wăl. Ti anôk bi kƀĭn, pô bi ala knơ̆ng bruă kiă kriê bruă knuă dŭm čar, ƀuôn prŏng bi trông kơ dŭm klei dleh dlan, klei kƀah hlăm bruă hlue ngă dŭm hdră mtrŭn mơ̆ng knŭk kna kơ bruă ngă, kơ klei bi mŭt mnuih ngă bruă, kơ ênoh mnuih ngă bruă; dăp knuă druh mnuih ngă bruă hlăm hră mơar bruă knŭk kna... Phung bi ala akâo kơ Phŭn bruă kiă kriê bruă knuă mâo hră mơar ktrâo atăt klă mngač hĭn pioh kơ dŭm alŭ wăl, phŭn dhar bruă mă bruă. Blŭ hrăm klah čŭn klei bi kƀĭn, Khua phŭn bruă kiă kriê bruă knuă Phạm Thị Thanh Trà mtă: Dŭm mlan knhal jih thŭn, Knơ̆ng bruă kiă kriê bruă knuă mă dŭm čar, ƀuôn prŏng bi păn kjăp hdră mtrŭn mơ̆ng klei bi kƀĭn prŏng Đảng 13, mơ̆ng phŭn bruă kiă kriê bruă knuă, dŭm alŭ wăl bi mlih hdră êlan mă bruă, mđing hmư̆ nah gŭ, mâo nanao klei bi trông hŏng Phŭn bruă kiă kriê bruă knuă mă čiăng mâo hdră ngă bruă bi djŏ./.

Pô mblang: Y-Khem Niê