VOV4.Êđê - Hrăm mbĭt hŏng êpul ba anăp nao hlăm hdră gang mkhư̆ klei ruă Covid 19, Anôk bruă pui kmlă Dak Nông mrâo ba jao giăm 500 hlâo čhum ao răng mgang asei mlei hŏng ênoh êbeh 65 êklăk prăk kơ Anôk bruă ksiêm dlăng klei ruă tưp čar lehanăn anôk bruă mdrao mgŭn Gia Nghĩa, Dak Song, Dak Mil. Êlâo anăn, hlăk mlan 6, anôk bruă ăt nao čuă lehanăn mđup brei kơ anôk bruă mdrao mgŭn ƀuôn prŏng Gia Nghĩa, anôk bruă mdrao mgŭn ƀuôn hgŭm Nghĩa Tân 4 kdrăp masin ksiêm dlăng hnơ̆ng hlơr asei mlei, kdrăp mdjiê kman lehanăn čhiăm guôm ƀô̆.

Mbĭt hŏng hdră mđup brei kdrăp mnơ̆ng yua hlăm bruă mdrao mgŭn, Anôk bruă pui kmlă Dak Nông ăt dôk pŏk ngă dŭm hdră msir kñăm rơ̆ng mkăp djăp pui kmlă kơ 155 anôk bruă mdrao mgŭn, krĭng bi ktlah hlăm čar. Dưi thâo, mơ̆ng leh klei ruă Covid 19 bluh mâo truh kơ ară anei, PC Dak Nông mâo nanao hdră đru kơ êpul êya, hgŭm kngan gang mkhư̆ klei ruă, đru mguôp hlăm Keh vaccine hŏng ênoh prăk giăm 300 êklăk prăk./.

H Nêc pô mblang