VOV4.Êđê- Tlam mmăt hruê 20/8, khua knŭk kna Phạm Minh Chính mâo leh klei blŭ hrăm hŏng khua gĭt gai, kua kiă kriê knơ̆ng bruă Pfizer, Albert Bourla kơ bruă bi mguôp vaccine. Khua knŭk kna Phạm Minh Chính mñă klă, knŭk kna Việt Nam dôk hlăk jih ai ngă hdră êlan vaccine, klei tlŏ mgang vaccine tar ala čar čiăng dưi ngă bruă kñăm truh kơ akŏ thŭn 2022 dưi tlŏ mgang kơ 70% mnuih ƀuôn sang, rơ̆ng kjăp klei hdĭp hlăm yang ƀuôn.

Kyuanăn, khua knŭk kna Phạm Minh Chính akâo kơ Pfizer mâo klei mđing tal êlâo, ngă hmar hĭn bruă ba jao vaccine kơ Việt Nam tui si klei kuôl kă. Khua gĭt gai knơ̆ng bruă Pfizer ƀuăn srăng gĭr jih at tiê, tui duah djăp hdră êlan čiăng ngă hmar bruă ba jao vaccine kơ ala čar Việt Nam hlăm mlan 8, mlan 9 lehanăn gưl 3 mlan tal 4 thŭn 2021. Mprăp klei đru, bi mguôp hŏng Việt Nam dưi mâo dŭm hdră ba jao vaccine, vaccine jang mơ̆ng ala čar mkăn, bi klă sa ai hŏng Mi đru kơ ala čar Việt Nam kơ vaccine.

Pô mblang: Y-Ƀel Êban