VOV4.Êđê - Hlăm wưng ti anăp, klei ruă Covid 19 ăt mâo dleh dưi ksiêm dlăng hŏng lu mta mlih mrâo, Phŭn bruă Hdră kčah Duh bi liê đăo tĭng srăng mâo lu klei lông dlăng hŏng anôk bruă duh mkra mbĭt anăn ba mdah leh 8 hdră msir, kñăm lŏ krŭ wĭt anôk bruă duh mkra. Hlăm anăn mđing kơ bruă “Mdrơ̆ng hŏng klei ruă tưp msĕ si bi kdơ̆ng hŏng phung roh”, dŭm gưl, dhar bruă, alŭ wăl brei mâo klei gĭr hĭn, mđing kơ djăp ai dưi, klei mâo čiăng ksiêm dlăng kjăp klei ruă Covid 19, mjing klei găl kơ anôk bruă duh mkra bi h’ĭt bruă duh mkra pla mjing, mnia mblei, lŏ krŭ wĭt lehanăn đĭ kyar. Hluê anăn, hluê ngă hdră gang mkhư̆ klei ruă Covid 19 hŏng klei pral tŭ dưn, mjing klei găl kơ anôk bruă duh mkra đĭ kyar h’ĭt kjăp lehanăn krơ̆ng kjăp bruă duh mkra mnia mblei; rơ̆ng hdră dŭ mdiăng mnơ̆ng dhơ̆ng nanao đrông, ba wĭt klei tŭ; đru bi hrŏ ênoh bi liê; ruh mtlaih klei dleh dlan klei kơ prăk kăk kơ anôk bruă duh mkra... Mbĭt anăn, Khua phŭn bruă Hdră kčah lehanăn Duh bi liê Nguyễn Chí Dũng brei thâo, Khua knŭk kna srăng hnưm mkŏ mjing Êpul ngă bruă mơ̆ng Khua knŭk kna kơ bruă ruh mtlaih klei dleh dlan kơ anôk bruă duh mkra lehanăn mnuih ƀuôn sang hmăi djŏ mơ̆ng klei ruă Covid 19./.

H Nêc pô mblang