VOV4.Êđê- Aguah anei, hruê 22/6, ti Hà Nội, Phŭn bruă kahan ksiêm mkŏ mjing leh Klei bi kƀĭn online ksiêm wĭt hdră mkŏ mjing, pŏk ngă bruă mrô ala čar kơ mnuih ƀuôn sang, hdră bruă duh mkra pla mjing; mkăp, kriê dlăng bruă mkăp Hră kak asei mrâo lehanăn knăm hưn mthâo srăng ba yua klă klơ̆ng hdră bruă anei mơ̆ng hruê 1/7/2021. Bruă mkŏ mjing mrô ala čar kơ mnuih ƀuôn sang jing sa hlăm dŭm bruă klam yuôm bhăn, mjing tur knơ̆ng kơ hdră kriê dlăng bruă ngă hră m’ar knŭk kna hluê hdră mrâo mrang, ba yua kdrăp mrâo lehanăn msir mghaih klei ngă hră m’ar kơ mnuih ƀuôn sang, kơ anôk bruă duh mkra kñăm mjing klei găl ênưih hlăm bruă ngă hră m’ar, bi hrŏ ênoh hră m’ar kơ mnuih ƀuôn sang, bi hrŏ hruê mmông lehanăn eneoh prăk bi liê hlăm bruă msir mghaih klei ngă hră m’ar, mđĭ boh tŭ kriê dlăng knŭk kna lehanăn đru mđĭ kyar bruă knŭk kna điện tử. Hŏng dŭm boh tŭ dưi mâo, Phŭn bruă kahan ksiêm klă klơ̆ng hưn mthâo bi leh jih mta kñăm kơ bruă mkŏ mjing mrô ala čar kơ mnuih ƀuôn sang lehanăn kơ hdră duh mkra pla mjing, mkăp lehanăn kriê dlăng bruă mkăp Hră kak asei. Dua kdrăp anei klă klơ̆ng srăng ngă bruă mơ̆ng hruê 1/7/2021 lehanăn mprăp bi hgŭm hŏng dŭm phŭn, knơ̆ng bruă, alŭ wăl mkăp kơ hdră mkŏ mjing knŭk kna điện tử kơ mnuih ƀuôn sang./.

Pô mblang: H’Nêč Êñuôl