VOV4.Êđê- Bi ala kơ phŭn bruă kđĭ čar, khua gĭt gai Đảng Nguyễn Phú Trọng bi klă leh hdră mtrŭn 02 mơ̆ng phŭn bruă kđĭ čar kơ bruă mlih mrâo êpul êya lehanăn bruă ngă mơ̆ng Công đoàn Việt Nam hlăm ênuk mrâo. Hŏng bruă kñăm kluôm jing srăng mkŏ mjing Công đoàn Việt Nam kjăp ktang, mâo klei thâo bi djŏ lehanăn mgaih msir dŭm boh klei dưi bi êdah leh, ngă jăk bruă klam hlăm ênuk mrâo, jing atur bruă kđi čar- yang ƀuôn kjăp kơ Đảng, knŭk kna, ngă kjăp bruă klam jing kban, rơ̆ng kơ klei jĕ giăm mơ̆ng Đảng, knŭk kna hŏng dŭm gưl mnuih mă bruă hlăm ala čar, đru kơ bruă mkŏ mjing êpul mnuih mă bruă Việt Nam ênuk mrâo, kjăp ktang, jing êpul ba anăp hlăm bruă klam mđĭ kyar lehanăn bi kjăp ala čar. Hdră mtrŭn bi êdah dŭm bruă kñăm klă klơ̆ng truh ti thŭn 2025: gĭr srăng mâo truh 13,5 êklăk čô đoàn viên hlăm Công đoàn, grăp knơ̆ng bruă mâo ƀiă êdi 25 čô mnuih mă bruă hlăm êpul Công đoàn, truh ti thŭn 2023 gĭr srăng mâo 12 êklăk čô đoàn viên. Truh ti thŭn 2030: mâo 16,5 êklăk čô đoàn viên hlăm Công đoàn...gĭr mâo 85% kơ dlông dŭm knơ̆ng bruă, anôk bruă mâo êpul êya bruă Công đoàn dưi bi mklă klei kuôl kă bruă mă. Truh thŭn 2045: grăp čô mnuih mă bruă dŭm anôk bruă jing đoàn viên Công đoàn Việt Nam, 99% knơ̆ng bruă, anôk bruă mâo êpul êya Công đoàn bi mklă klei kuôl kă bruă mbĭt.

Pô mblang: Y-Ƀel Êban