VOV4.Êđê- Tlam mbruê 25/6, khua gĭt gai Đảng Nguyễn Phú Trọng gĭt gai leh klei kƀĭn phŭn bruă kđi čar čiăng brei boh blŭ kơ hdră êlan đru kơ mnuih mă bruă lehanăn phung yua mnuih mă bruă mâo klei dleh dlan hlăm wưng klei ruă tưp Covid-19. Phŭn bruă kđi čar bi klă, dŭm gưl bluh đĭ klei ruă tưp Covid-19 hlăm thŭn leh êgao lehanăn thŭn anei ăt dôk dleh dưi ksiêm dlăng, mâo klei hmăi kjham truh kơ bruă mnia mblei, dŭm bruă mkăn, boh nĭk hlăm dŭm anôk bruă tuh tia, anôk mkra mjing.

Blŭ hlăm klei kƀĭn anăn, khua gĭt gai Đảng Nguyễn Phú Trọng brei thâo, phŭn bruă kđĭ čar tŭ ư leh hŏng hdră êlan đru kơ mnuih mă bruă lehanăn phung yua mnuih mă bruă mâo klei dleh dlan hlăm wưng klei ruă tưp Covid-19. Lŏ mñă klă, mă klei hriăm mơ̆ng bruă tui ngă hdră mtrŭn 42 mơ̆ng knŭk kna lehanăn lŏ mă klei hriăm mơ̆ng bruă leh găn. Dŭm hdră êlan đru mơ̆ng dŭm ala čar dlông rŏng lăn, kñăm kơ bruă ksiêm dlăng, bi mklă djŏ dŭm čô mnuih čiăng mâo klei đru hŏng hdră êlan klă mngač, mkŏ mjing ênoh đru djŏ, mâo klei kjăp, mtăp mđơr, klă mngač, mâo boh tŭ dưn lehanăn klă klơ̆ng. Khua gĭt gai Đảng mtă, klei ruă tưp ară anei dôk dleh dưi ksiêm dlăng, kyuanăn amâo dưi ngă ngơi mang, luič klei răng hlăm bruă gang mkhư̆ klei ruă tưp Covid-19.

Pô mblang: Y-Ƀel Êban