VOV4.Êđê- Tlam mbruê, ti Hà Nội, Phŭn bruă lĭng kahan mkŏ mjing leh klei kƀĭn trông bi êdah bruă klam gang mkhư̆ klei ruă tưp Covid-19 hlăm wưng klei aguah tlam mrâo. Hyuă kjăp hdră mtrŭn 128 mơ̆ng knŭk kna, hruê mmông kơ anăp, sa hlăm dŭm mtă phŭn mơ̆ng phŭn bruă lĭng kahan gĭt gai bi lar jing “4 sa anôk” nao hgŭm gang mkhư̆ klei ruă tưp Covid-19. Mbĭt anăn lŏ mprăp mdrơ̆ng hŏng klei truh, klei yan adiê ngă. Thượng tướng Vũ Hải Sản, k’iăng khua phŭn bruă lĭng kahan brei thâo: Mta phŭn kñăm hlăm bruă gang mkhư̆ klei ruă tưp Covid-19 jing ksiêm dlăng hdră êlan gang mkhư̆ klei ruă tưp, mtô mjuăt bi mbŏ klei thâo, bi kluôm ênŭm êpul ngă bruă, bi mbŏ kdrăp yua, êa drao gŭn, mnơ̆ng yua bruă mdrao mgŭn, mnơ̆ng yua hlăm dŭm anôk bi ktlah mbĭt, mprăp nao đru kơ dŭm alŭ wăl mâo klei ruă tưp bluh đĭ. Mbĭt anăn mtă kơ knơ̆ng gĭt gai lĭng kahan, dŭm alŭ kahan, sang êa drao mơ̆ng ară anei srăng mprăp mkŏ mjing dŭm êpul nai êa drao kahan, čiăng mđĭ êpul ngă bruă hlăm să, ƀuôn hgŭm tơdah mâo klei mtă.

Pô mblang: Y-Ƀel Êban