VOV4.Êđê - Aguah mbrue (26/3) ti anôk bi kƀĭn mjuăt bi hriăm kơ bruă tlŏ vaccine covid 19, Khua phŭnbruă mdrao mgŭn Nguyễn Thanh Long brei thâo, wưng leh êgao, drei dưi mkhư̆ leh ti gưl tal 3 klei ruă tưp covid 19. Klei bluh đĭ gưl tal 3 phŭn mâo mơ̆ng čar Hải Dương hŏng ênoh mnuih ruă lu hĭn, truh ti wưng anei ăt adôk mâo mnuih ruă hlăm đa đa anôk, ƀiădah kyua ngă jăk bruă bi ktlah, tiŏ duah mnuih mâo klei ruă, ƀiădah mâo hlăm đa đa anôk ka ngwa hŏng jih ai tiê ôh. Siămdah, k’iăng khua phŭn bruă mdrao mgŭn ăt dôk hyưt klei ruă tưp anei srăng lŏ bluh đĭ ti gưl tal 4 hlăm ala čar drei, kyua adôk mâo lu klei ênưih bi mtưp, kyuadah ară anei dŭm ala čar hlăm alŭ wăl klei ruă tưp ăt adôk lu. Kyuanăn, Phŭn bruă mdrao mgŭn mtă kơ djăp alŭ wăl ăt ngă nanao djăp hdră gang mkhư̆ klei ruă tưp djŏ hŏng klei knŭk kna, lehanăn khua knŭk kna, Êpul kiă kriê bruă mdrơ̆ng hŏng klei ruă tưp, mơ̆ng phŭn bruă mdrao mgŭn kơ klei ksiêm mkă, tui duah, ba bi ktlah lehanăn mdrao mgŭn mnuih ruă./.

Y Khem pô mblang