VOV4.Êđê-  Nai prŏng, nai prĭn Nguyễn Thanh Long – Khua phŭn bruă mdrao mgŭn mrâo bi tuôm, bi trông hŏng phung khua kiă kriê dŭm boh sang êa drao, anôk bruă mdrao mgŭn êngao knŭk kna ti alŭ wăl ƀuôn prŏng Hồ Chí Minh kơ hdră gang mkhư̆ klei ruă Covid 19. Khua phŭn bruă akâo kơ phung khua kiă kriê dŭm boh sang êa drao, anôk bruă mdrao mgŭn êngao knŭk kna lŏ dơ̆ng hgŭm kngan, hgŭm ai bi đru mbĭt hŏng ƀuôn prŏng hlăm hdră gang mkhư̆ klei ruă tưp, boh nik hlăm hdră dŏng mdrao, kriê dlăng klei suaih pral mnuih djŏ Covid 19 čiăng kơ ƀuôn prŏng dưi hgao wưng dleh dlan anei.

Khua phŭn bruă bi êdah klei čang hmăng dŭm boh sang êa drao, anôk bruă mdrao mgŭn êngao knŭk kna nao bi mklă hŏng Knơ̆ng bruă mdrao mgŭn ƀuôn prŏng Hồ Chí Minh ênoh jhưng đih mdrao mkăp kơ hdră kriê dlăng klei suaih pral mnuih ruă hlăm aguah tlam lehanăn mnuih ruă Covid 19. Hluê hŏng ênoh jhưng đih mdrao mâo bi mklă leh mơ̆ng anôk bruă mdrao mgŭn êngao knŭk kna, ƀuôn prŏng srăng thâo klă kơ ênoh jhưng pioh dŏng mdrao mnuih ruă Covid 19 lehanăn srăng kah mbha mnuih ruă hriê dŏng mdrao./.

Pô mblang: H’Nêč Êñuôl