VOV4.Êđê- Ăt ti anôk knŭk kna kreh bi kƀĭn kơ bruă mdrơ̆ng hŏng klei ruă tưp covid 19, Khua phŭn bruă mdrao mgŭn Nguyễn Thanh Long brei thâo, kluôm ala brei thâo; kluôm ala mâo tlŏ leh truh 20 êbâo 695 čô mnuih, hlăm anăn knŏng ƀiă đuič mâo klei amâo mâo jăk, lehanăn ară anei klei suaih pral jăk sơăi, boh nik ka ƀuh ôh klei amâo mâo jăk msĕ si bi êkŏ êrah msĕ si lu klei dôk bi hyưt. Khă snăn, čiăng dưi mâo klei êđăp ênang hĭn, phŭn bruă hlăk gĭt gai dŭm knơ̆ng bruă mdrao mgŭn, lehanăn ngă dŭm anôk tlŏ mgang bi djŏ guôp, rơ̆ng mâo klei êđăp ênang sĭt kơh bi tlŏ yơh. Êngao kơ vaccine blei mơ̆ng ala tač êngao, Phŭn bruă mdrao mgŭn hlăk dôk ksiêm duah, mkra mjing vaccine hlăm ala čar. Vaccine Nanocovax mơ̆ng knơ̆ng bruă NANOGEN mkra mjing mâo lông tlŏ leh gưl tal dua kơ mnuih hrue 26/2/2021. Vaccine mơ̆ng IVAC mkra mjing lông tlŏ leh mơ̆ng hrue 15/3/2021. Vaccine Việt Nam mkra mjing srăng dưi ba yua hlăm thŭn 2022 kñăm mâo djăp vaccine pioh tlŏ mgang, rơ̆ng dưi mdrơ̆ng hŏng klei ruă tưp hlăm mgi dih./.

Pô mblang: Y-Khem Niê