VOV4.Êđê - Tlam mbruê, êpul ngă bruă mơ̆ng phŭn bruă mdrao mgŭn, adŭ bruă kƀĭn ala leh anăn êpul gơ̆ng bruă djuê ana mơ̆ng bruă kƀĭn ala mâo leh klei mă bruă ti čar Dak Lak kơ bruă gang mkhư̆ klei ruă tưp Covid-19 leh anăn ksiêm dlăng, čih yap klei găl kơ hdră mkăp mkŏ mkra sang êa drao prŏng gưl dlông alŭ wăl krĭng Lăn Dăp Kngư.

Blŭ hlăm klei mă bruă anăn, khua phŭn bruă mdrao mgŭn lač, Dak Lak mâo lu klei gĭr hlăm bruă gang mkhư̆ klei ruă tưp Covid-19, čar mâo leh klei ngă bruă djŏ, mgaih msir djŏ. Hluê anăn dưi bi hrŏ jih hnơ̆ng ênoh mnuih djiê kyua klei ruă tưp Covid-19 ti čar, knŏng knar 1/5 ênoh kah knar hlăm ala čar, čar Dak Lak srăng dưi hnưm wĭt hlăm wưng msĕ yăng đar. Bi kơ bruă mkŏ mkra sang êa drao prŏng gưl dlông alŭ wăl krĭng Lăn Dăp Kngư, khua phŭn bruă mdrao mgŭn brei thâo, êngao kơ krĭng Lăn Dăp Kngư, jih jang krĭng mkăn mâo leh sơăi sang êa drao mơ̆ng phŭn bruă. Krĭng Lăn Dăp Kngư ară anei jing anôk kƀah kơ hnơ̆ng tŭ jăk bruă mdrao mgŭn, bruă mkŏ mkra sang êa drao gưl dlông jing mjêč êdi.

Y-Ƀel pô mblang