VOV4.Êđê - Phŭn bruă Sang hră m’ar mtô bi hriăm mrâo mâo hră m’ar ba m’ĭt kơ Khua anôk bruă sang čư̆ êa dŭm čar, ƀuôn prŏng kơ bruă mkŏ mjing Klei bi lông hriăm jih gưl 3 thŭn 2021 hlăm wưng dôk bluh mâo klei ruă tưp. Hluê anăn, Phŭn bruă Sang hră m’ar mtô bi hriăm bi mklă srăng mkŏ mjing klei bi lông hlăm 2 gưl. Klă klơ̆ng, gưl 1 klei bi lông hriăm jih gưl 3 thŭn 2021 dưi mkŏ mjing hlăm hruê 7,8/7, Phŭn bruă Sang hră m’ar mtô bi hriăm srăng mkŏ mjing klei bi lông gưl 2 kơ phung hđeh hmăi mơ̆ng klei ruă Covid 19, mâo phung hđeh jing F0, F1, F2 hluê si klei kah mbha mơ̆ng anôk bruă mdrao mgŭn, phung hđeh dôk hlăm krĭng kwang dar, hluê ngă hdră bi ktlah yang ƀuôn hluê si Asăp mtrŭn mơ̆ng Khua knŭk kna čiăng hluê ngă hdră gang mkhư̆ klei ruă Covid 19. Kơ wưng mkŏ mjing klei bi lông gưl 2, Phŭn bruă srăng bi mklă wưng mkŏ mjing klei bi lông hluê gŏng klei mâo mơ̆ng alŭ wăl. Phŭn bruă ăt mtă kơ dŭm alŭ wăl ksiêm dlăng, thâo klă phung hđeh hmăi djŏ mơ̆ng klei ruă Covid 19 amâo dưi nao bi lông hlăm gưl 1, ba m’ĭt kơ Phŭn bruă êlâo kơ hruê 5/7./.

H Nêč pô mblang