VOV4.Êđê - Ară anei kluôm ala adôk êbeh 26 êbâo čô hđeh hlăm 42 čar, ƀuôn prŏng ka bi lông hriăm jih gưl 3. Anei jing phung F0, F1, F2 amâodah dôk hdĭp hlăm wăl bi ktlah hjăn, kwang dar kyua hmaĭ mơ̆ng klei ruă Covid-19. Phŭn bruă sang hră mtô bi hriăm mrâo mâo hră mơar mơĭt kơ Knơ̆ng bruă sang čư̆ êa dŭm čar, ƀuôn prŏng hlăm gưl dlông kơ bruă mkŏ mjing gưl bi lông hriăm jih gưl 3 tal 2. Hluê anăn, gưl 2 klei bi lông hriăm jih gưl 3 dưi mkŏ mjing hlăm dŭm hruê 6 leh anăn 7-8 kơ phung ka bi lông amâodah ka dưi bi leh klei bi lông tal 1 mrâo êgao. Pô čih klei mrâo Sang mđung asăp blŭ Việt Nam mâo klei êmuh K’iăng Khua Phŭn bruă sang hră mtô bi hriăm Nguyễn Hưũ Độ kơ boh phŭn anei.

-Ơ k’iăng khua phŭn bruă Nguyễn Hữu Độ! Ti anăp klei ruă tưp hlăk hlê dôk đĭ lar ktang, akâo kơ ih brei thâo si Phŭn bruă sang hră mơar mâo leh hdră čiăng rơ̆ng klei tŭ dưn kơ hđeh hriăm hră ka bi lông ôh jih gưl 3 ri gưl tal sa anăn?

Nguyễn Hữu Độ: Drei dưi lač hlăm klei ruă tưp hlăk hlê dleh dưi ksiêm dlăng, lehanăn dôk tưp lar măng ai msĕ hŏng ară anei, ênoh mnuih mâo klei ruă tưp đĭ leh dŭm êbâo čô mnuih hlăm sa hrue, Phŭn bruă sang hră mơar brei ƀuh bruă mkŏ mjing klei bi lông gưl tal 2, klă sĭt jing sa mta klei bŏ hŏng dleh dlan. Khă snăn, gưl sa mâo mkŏ mjing leh êbeh 96% ênoh phung hđeh mâo bi lông, dŭm ênoh phung hđeh adôk ka bi lông ôh srăng bi lông ti gưl tal 2, tui si ênoh alŭ wăl hâo mdah mâo hlăm brô êbeh kơ 26 êbâo 254 čô hđeh hlăm 42 boh čar, ƀuôn prŏng. Hŏng klei msĕ snăn, ênoh anei srăng nao hlăm klei bi lông gưl ta 2 yơh. Phŭn bruă sang hră mơar srăng mkŏ mjing hŏng dua hdră kñăm rơ̆ng klei êđăp ênang, lehanăn brei jih jang phung hđeh ka bi lông ôh gưl tal sa dưi bi lông, knŏng hŏng hlei phung hđeh ngă klei mplư mplêč amâo mâo dưi bi lông ôh.

-Snăn si hdră mkŏ mjing klei bi lông jih gưl 3 srăng mkŏ mjing ti gưl tal 2 mâo mprăp leh?

Nguyễn Hữu Độ: Kơ hdră bi lông ti gưl tal 2, snăn Phŭn bruă sang hră mơar mâo leh klei bi kƀĭn hŏng 42 boh čar, ƀuôn prŏng, lehanăn mâo leh klei bi tŭ ư hŏng knơ̆ng bruă sang čư̆ êa dŭm boh čar, ƀuôn prŏng bi lông hlăm hrue 5;6;7/8 leh kơ anăn dŭm knơ̆ng bruă mâo leh klei hâo mdah hŏng knơ̆ng bruă sang čư̆ êa dŭm čar, lehanăn ară anei mâo leh Phŭn bruă sang hră mơar mâo tŭ mă leh hră mơar mơ̆ng khua knơ̆ng bruă sang čư̆ êa dŭm čar, ƀuôn prŏng anôk mâo klei ruă tưp akâo mkŏ mjing klei bi lông hlăm hrue 5;6;7. Kyuanăn yơh, Phŭn bruă sang hră mơar mâo leh hră mtrŭn bi tŭ ư mkŏ mjing klei bi lông jih gưl 3 gưl tal 2 hlăm dŭm hrue 5; 6; 7/8/2021 lehanăn mơ̆ng anăn ăt mâo mơh klei mtă kơ dŭm alŭ wăl ngă djăp bruă djŏ tuôm hlăm hdră mă bruă.

Msĕ si mâo bi ênŭm anăn phung hđeh, lehanăn mprăp kơ dŭm klei huĭdah mâo klei bi mlih kơ Êpul gơ̆ng kiă kriê klei bi lông. Tôhmô mâo lu čar knŏng mâo mă mơ̆ng 1;2 čô hđeh đuič bi lông jih gưl tlâo ti gưl tal 2, mâo đa đa čar mâo truh 100 čô hđeh, snăn dưi mơĭt nao kơ dŭm čar mkăn čiăng bi hrŏ klei dleh hlăm bruă mkŏ mjing Êpul gơ̆ng kiă kriê klei bi lông, snăn kơh jing găl. Phung hđeh mâo klei mĭn čiăng msĕ snăn, hŏng klei bi tŭ ư plah wah 2 Êpul Gơ̆ng kiă kriê klei bi lông snăn phŭn bruă sang hră mơar srăng mâo klei bi tŭ ư, lehanăn srăng mkăp phần mềm pioh mkŏ mjing ênoh anăn hđeh nao bi lông, adŭ bi lông čiăng kơ phung hđeh dưi nao bi lông hŏng klei jăk hĭn. Ară anei, Phŭn bruă sang hră mơar klă klơ̆ng mâo leh hră mtrŭn mtă kơ dŭm alŭ wăl hâo mdah hdră mă bruă kơ klei bi lông ti dŭm alŭ wăl, čiăng rơ̆ng dưi mâo klei êđăp ênang hŏng klei ruă tưp, lehanăn mâo klei êđăp ênang kơ bruă mkŏ mjing mơh.

-Hŏng dŭm alŭ wăl dôk mâo klei ruă tưp ktang, ênoh mnuih ruă đĭ nanao êtuh, tăp năng truh êbâo čô mnuih hlăm sa hrue, snăn si hdră Phŭn bruă sang hră mơar mâo leh?

Nguyễn Hữu Độ:  Hŏng dŭm alŭ wăl mâo klei ruă tưp ktang, snăn Phŭn bruă sang hră mơar ăt mdưm klei suaih pral mơh jing tal êlâo, kyuanăn knŏng mkŏ mjing klei bi lông, tơdah klă sĭt mâo klei êđăp ênang sĭt. Khă snăn, čiăng rơ̆ng dưi mâo klei êđăp ênang sĭt, êjai klei ruă tưp hlăk đĭ lêč prŏng, kyua amâo lŏ thâo bĭt ôh phŭn agha F0 klă sĭt jing dleh dlan êdi. Snăn yơh hŏng dŭm anôk amâo lŏ dưo mkŏ mjing ôh kyua ƀuh jing dleh thâo răng, snăn akâo kơ phŭn bruă sang hră mơar mâo hdră đru kơ phung hđeh. Năng ai srăng ksiêm mkă ti hnơ̆ng hđeh hriăm hră. Kyuadah hŏng boh klei anei mâo leh dŭm boh čar akâo srăng lŏ mkŏ mjing klei bi lông ti gưl tal 3 lĕ. Ƀiădah boh sĭt dah mkŏ mjing klei bi lông ti gưl tal 3, êjai klei ruă tưp dôk đĭ ktang snăn bruă mkŏ mjing ăt lĕ hlăm klei dleh dlan mơh. Mơ̆ng anăn Phŭn bruă ăt adôk tĭng mkă kơ klei srăng ksiêm ti hnơ̆ng hđeh hriăm hră mơar yap kơ ênoh čuăn djăp klei dưi bi ruĕ jih gưl tlâo, lehanăn mâo hdră srăng đru kơ phung hđeh hlăm klei hrŏng mŭt gưl prŏng hŏng hdră djŏ guôp tui si klei bhiăn ară anei.

-Lač jăk kơ k’iăng khua phŭn bruă!