VOV4.Êđê- Hră mơar mjêč kơ bruă mjing klei găl kơ bruă tŭ mă ênoh prăk blei braih, mnơ̆ng dhơ̆ng kyua Khua phŭn bruă tuh tia mnia blei Nguyễn Hồng Diên bi siñê hruê 12/8/2021 lač klă: Čiăng đru kơ phung mnia blei, anôk bruă mnia blei, phung mkta mjing, mnia blei braih mdiê hlăm boh klei ruă Covid-19, Knơ̆ng prăk Knŭk kna Việt Nam mâo leh hră mơar mtă kơ dŭm Knơ̆ng prăk mnia blei leh anăn Knơ̆ng prăk knŭk kna dŭm čar, ƀuôn prŏng krĭng Dap mnai Krông Cưủ Long rơ̆ng prăk brei čan kơ bruă hrui blei, mkăm pioh mdiê, braih ti krĭng Dap mnai Krông Cửu Long hŏng lu hdră. Khădah. Mơ̆ng bruă ktuê dlăng boh klei anôk čhĭ mnia leh anăn klei hâo hưn bi trông hŏng Êpul hgŭm mnơ̆ng ƀơ̆ng huă Việt Nam leh anăn phung mnia blei ba čhĭ braih kơ ala tač êngao, bruă tŭ mă ênoh prăk đru hluê si hră mơar mrô 5747 ka dưi bi leh găl ênưih. Čiăng mjing klei găl hĭn kơ dŭm anôk bruă mnia blei hlăm bruă tŭ mă ênoh prăk brei čan hrui blei mdiê, braih kơ ƀĭng ngă lŏ hma, Phŭn bruă tuh tia mkra mjing akâo kơ Khua Knŭk kna jao kơ Knơ̆ng prăk Knŭk kna ala čar Việt Nam ksiêm dlăng, gĭt gai dŭm Knơ̆ng prăk mnia blei đru bi mklă kơ hnơ̆ng prăk mnga kơ dŭm anôk bruă mnia blei; mjing klei găl kơ dŭm anôk bruă mnia blei dưi mgơ̆ng čan prăk hŏng mnơ̆ng dhơ̆ng srăng hrui blei./.

Pô mblang: H’Zawut Ƀuôn Yă