VOV4.Êđê- Ktuê dlăng klei êmuh hruê 11/11 hlăm Klei bi kƀĭn tal 2, Bruă kƀĭn ala gưl XV, Ksor Yin, pô bi ala ti ƀuôn hgŭm Đống Đa, Ƀuôn prŏng Plei Ku, čar Gia Lai lač, Khua phŭn bruă sang hră mtô bi hriăm Nguyễn Kim Sơn wĭt lač ƀhĭ klĭ klei êmuh, hlăm ai tiê dlăng hlăm klei êdu kƀah mơ̆ng bruă sang hră. Hlăm anăn, Ksor Yin mđing hĭn kơ klei kƀah nai mtô, ƀiădah grăp thŭn bruă sang hră dŭm alŭ wăl ăt ngă klei bi hrŏ nai mtô. Ksor Yin čang hmăng, Phŭn bruă sang hră mtô bi hriăm mâo klei blŭ hŏng Knŭk kna brei ba yua klei bhiăn mdê hjăn, čiăng rơ̆ng leh anăn mđĭ hnơ̆ng jăk bruă sang hră mtô bi hriăm hlăm wưng kơ anăp. Bi Y-Khut Niê, K’iăng khua êpul bi ala hđăp bruă kƀĭn ala čar Dak Lak gưl 14 lač: Khua phŭn bruă wĭt lač jih klei phung bi ala êmuh hlăm klei bi kƀĭn leh anăn wăt boh phŭn adôk mâo mơ̆ng klei bi kƀĭn êlâo, leh anăn čang hmăng Khua phŭn bruă hnưm hŏng bruă sang hră hgao klei dleh dlan kyua klei ruă Covid-19:

 “Mơ̆ng klei phung bi ala êmuh kâo ƀuh Khua phŭn bruă wăt tơdah mrâo ƀiădah ƀuh jih bruă ngă, păn kjăp boh klei leh anăn dưi msir mgaih klei mâo. Khădah hlăm wưng kơ anăp ăt mâo sa bruă prŏng prĭn leh anăn dleh d;an kơ khua phŭn bruă jing brei mkŏ mjing, dăp mmông hriăm hră , boh nik phung hđeh gưl 1 anei jing bruă brei tĭng mkă bi klă mngač, bi klă klơ̆ng.”

Pô mblang: H’Zawut Ƀuôn Yă