VOV4.Êđê - Hlăm dŭm hruê êgao, ti Dak Lak mâo nanao phung ruă Covid-19 mrâo. Hŏng ai tiê “ti anôk mâo klei čiăng tinăn mâo phung êdam êra”, dŭm êpul êdam êra ƀuôn prŏng Ƀuôn Ama Thuôt, čar Dak Lak, hlăk ƀrư̆ hruê mguôp ai tiê hŏng dŭm êpul mkăn đru gang mkhư̆ klei ruă Covid-19. Anôk dlăng bruă êdam êra čar Dak Lak gĭt gai leh dŭm gưl bruă êdam êra lŏ dơ̆ng mđĭ lar bruă ngă mơ̆ng 270 êpul đru gang mkhư̆ klei ruă Covid-19.

Dôk gak ti êlan nao mŭt hlăm ƀuôn prŏng Ƀuôn Ama Thuôt mơ̆ng nah Dhŭng, anôk ksiêm dlăng klei ruă tưp ti kban mrô 14, êlan Hồ Chí Minh (Êlan dơ̆ng prŏng mrô 14 kdrêč găn să Hoà Phú) grăp hruê mlam tŭ drông dŭm êbâo čô mnuih nao ngă hră m’ar hưn mthâo klei suaih pral. Mbĭt hŏng dŭm êpul mkăn, mâo lu phung đoàn viên êdam êra ba anăp nao hgŭm hlăm hdră dôk gak răng, ktrâo atăt êlan klông, đru kơ mnuih ƀuôn sang ngă hră m’ar nao hưn mthâo klei suaih pral lehanăn čih klei hâo hưn. Ayŏng Y-Phong Êban, Khua bruă Đoàn să Hoà Phú, ƀuôn prŏng Ƀuôn Ama Thuôt brei thâo:“Êpul êdam êra mơ̆ng să nao hgŭm mơ̆ng tlam hruê 31/5 dơ̆ng mơ̆ng mphŭn mâo anôk gak răng kñăm ksiêm dlăng klei ruă tưp ti Êlan dơ̆ng prŏng mrô 14 găn alŭ wăl să. Leh gưl bluh mâo mrâo anei ti ƀuôn prŏng Ƀuôn Ama Thuôt ăt mâo klei hưn mdah mơ̆ng Anôk bruă Đoàn ƀuôn prŏng Ƀuôn Ama Thuôt lŏ ba nao phung đoàn viên đru bruă ti êpul êya mrô 1. Ară anei, grăp êpul êya lŏ mâo 3 čô nao đru bruă, knŏng êpul đoàn să êlâo adih 2 čô ară anei đĭ 3 čô. Nao hgŭm hlăm hdră anei jih jang diñu ăt bi ktlah mơh hŏng gŏ sang.

Mbĭt hŏng phung êdam êra alŭ wăl, ti anôk gak êlan dơ̆ng prŏng mrô 14 lŏ mâo 8 čô êdam êra ba anăp mơ̆ng ƀuôn prŏng Ƀuôn Ama Thuôt nao đru. Amai Trần Thị Huyền Thương, đoàn viên Sang hră gưl krah Công nghệ Tây Nguyên, brei thâo:“Kyua mnuih ƀuôn sang kluh wĭt wăt hruê lehanăn mlam kyua anăn hmei ngă bruă jih hruê mlam bi mbha mnuih dôk gak răng mơh. Kơ hdră bi mjĕ mjuk, huă ƀơ̆ng lehanăn mdei săn msĕ si bi kƀĭn tinei yơh. Ăt dleh dlan mơh, ƀiădah hŏng ai tiê phung êdam êra ba anăp snăn hlăm wưng ti anăp hmei srăng gĭr ktưn hrăm mbĭt lehanăn sa ai hŏng bruă sang čư̆ êa alŭ wăl, hŏng lăn čar đru gang mkhư̆ klei ruă tưp lehanăn čang hmăng drei srăng tŭ dưi.

Ară anei, jih 21 să, ƀuôn hgŭm ti ƀuôn prŏng Ƀuôn Ama Thuôt mkŏ mjing leh s’aĭ êpul êdam êra ba anăp, hluê ngă hdră mtô mblang gang mkhư̆ klei ruă tưp kơ mnuih ƀuôn sang, đru kơ dŭm anôk gak răng ti krĭng kwang dar, ksiêm dlăng kjăp klei ruă tưp ti dŭm ktuê êlan lehanăn tŭ mă, kah mbha mnơ̆ng dhơ̆ng đru kơ mnuih ƀuôn sang lehanăn dŭm êpul bruă dôk mă bruă ti krĭng kwang dar. Amai Nguyễn Tuyết Sinh, K’iăng khua bruă Đoàn ƀuôn hgŭm Thành Công, ƀuôn prŏng Ƀuôn Ama Thuôt, čar Dak Lak lač snei:“Hmei čiăng lar bra sa klei hâo hưn jing ară anei klei ruă tưp dôk mâo dleh dưi ksiêm dlăng kyua anăn phung êdam êra ti alŭ wăl brei mâo ai tiê ba anăp čiăng mŭt hlăm êpul ba anăp mơ̆ng ƀuôn prŏng, tơdah ƀuôn prŏng čiăng snăn pô dưi nao hgŭm jăk hĭn.

Hluê si Amai H’Hương B.Krông, K’iăng khua bruă Đoàn ƀuôn prŏng Ƀuôn Ama Thuôt, hlăm wưng klei ruă tưp dôk mâo dleh dưi ksiêm dlăng ară anei, boh nik mơ̆ng knhal jih mlan 5 truh kơ ară anei, bruă Đoàn ƀuôn prŏng Ƀuôn Ama Thuôt ăt iêu mthưr klei đru mguôp mnơ̆ng dhơ̆ng mkăp kơ mnuih ƀuôn sang hlăm krĭng bi ktlah, krĭng kwang dar lehanăn đru kơ êpul dôk mă bruă klam. Sa ai hŏng klei mĭn “Mdrơ̆ng hŏng klei ruă tưp msĕ si bi kdơ̆ng hŏng phung roh”, phung êdam êra ƀuôn prŏng Ƀuôn Ama Thuôt dôk mđĭ lar bruă klam ba anăp, jih hruê mlam hrăm mbĭt hŏng bruă sang čư̆ êa alŭ wăl lehanăn êpul djŏ tuôm čiăng hluê ngă hdră hiu ksiêm dlăng, tui duah, ba bi ktlah, čuăl krĭng gang mkhư̆ klei ruă tưp msĕ si mtô mblang, mtrŭt mjhar mnuih ƀuôn sang hluê ngă kjăp hdră gang mkhư̆ klei ruă tưp:“Ti anăp anei, Anôk bruă Đoàn ăt msĕ mơh Êpul hgŭm êdam êra Việt Nam ti ƀuôn prŏng srăng pŏk ngă dŭm êpul kăp đru. Tal sa iêu mthưr, mtrŭt mjhar êpul êdam êra ba anăp ti anôk gak răng să Hoà Phú, bi klin ênoh đoàn viên, êdam êra dôk ngă bruă ti anôk kwang darhlăm alŭ wăl ƀuôn prŏng, hlăm čar čiăng mâo hdră đru. Tal dua iêu mthưr čiăng mtrŭt mjhar mkŏ mjing “Anôk tŭk knă êsei djam mlam”. Gưl bluh mâo klei ruă thŭn 2020, êpul  “Anôk tŭk knă êsei djam mlam” đru mguôp leh tŭ dưn hlăm hdră đru tŭk knă mnơ̆ng ƀơ̆ng huă kơ jih jang êpul dôk ngă bruă ti anôk kwang dar hlăm alŭ wăl ƀuôn prŏng.

Hrăm mbĭt hŏng phung êdam êra ƀuôn prŏng Ƀuôn Ama Thuôt, mrâo anei, Êpul êdam êra kahan ksiêm čar Dak Lak bi hgŭm leh hŏng Anôk bruă êdam êra ƀuôn prŏng Ƀuôn Ama Thuôt mbĭt hŏng phung mâo ai tiê kmah nao čuă êmuh,  mđĭ ai lehanăn mđup brei dŭm êbâo giêt êa mnăm, dŭm pluh thŭng ƀung hdang krô, dŭm êtuh boh mnŭ lehanăn ală kĭng gang kơ êpul hluê ngă bruă klam gang mkhư̆ klei ruă tưp ti 4 anôk ksiêm dlăng klei ruă tưp ti să Hoà Phú, Čư̆ Êbur, anôk bi ktlah mklin sa anôk ti Sang hră gưl krah Công nghệ, êlan điêt Hà Huy Tập lehanăn kahan ksiêm ƀuôn hgŭm Tân An, ƀuôn prŏng Ƀuôn Ama Thuôt.

Ti anăp klei mâo dleh dưi ksiêm dlăng mơ̆ng klei ruă Covid 19, anôk kriê dlăng bruă Đoàn čar Dak Lak gĭt gai leh dŭm gưl bruă Đoàn lŏ dơ̆ng krơ̆ng kjăp hdră ngă bruă mơ̆ng 270 êpul đru kơ hdră gang mkhư̆ klei ruă Covid 19 ti alŭ wăl, hluê ngă klei gĭt gai mơ̆ng Anôk bruă sang čư̆ êa čar Dak Lak hlăm bruă hluê ngă hdră gang mkhư̆ klei ruă tưp. Hlăm anăn, mđing mtrŭt mđĭ hdră hâo hưn, mtô mblang kơ mnuih ƀuôn sang hluê ngă kjăp hdră gang mkhư̆ klei ruă tưp hluê hŏng dŭm bruă msĕ si: Mbha čhiăm guôm ƀô̆, êa rao kngan amâo mă prăk kơ krĭng bi ktlah, kwang dar, anôk lu mnuih, đru prăk kăk, mnơ̆ng dhơ̆ng yua kơ phung knuă druh, mnuih mă bruă ti anôk bi ktlah, đru kơ mnuih ƀuôn sang hưn mthâo klei suaih pral; mbha hră mtô mblang, đru hưn mthâo klei suaih pral, đru răng mgang klei êđăp ênang ti dŭm anôk ksiêm dlăng klei ruă tưp./.