VOV4.Êđê- Hŏng hdră êlan “Pral hâo hưn, pral lar bra, pral bi mkŏ hgŭm”, phung êdam êra čar Gia Lai mtrŭt mjhar leh lu klei dưi, ai mâo čiăng đru kdrăp mnơ̆ng yua hlăm bruă mdrao mgŭn lehanăn mnơ̆ng ƀơ̆ng huă kơ dŭm krĭng bi ktlah, anôk gạk răng kñăm ksiêm dlăng klei ruă Covid 19 lehanăn mnuih ƀuôn sang ti krĭng dôk mâo klei ruă.

Mơ̆ng leh bluh mâo klei ruă gưl 4 truh kơ ară anei, phung đoàn viên, êdam êra čar Gia Lai mâo iêu mguôp leh êbeh 9.800 ală kĭng gang, êbeh 450 êbâo blah čhiăm guôm ƀô̆, kdrăp mnơ̆ng răng mgang asei mlei, êa rao bi mdjiê kman, mbĭt hŏng lu mta mnơ̆ng mkăn mâo ênoh jih jang êbeh 3 êklai prăk. Klei ba anăp mơ̆ng phung êdam êra čar Gia Lai hlăm wưng êgao mâo leh klei sa ai mơ̆ng lu phung mâo ai tiê kmah hgŭm kngan gang mkhư̆ klei ruă Covid 19./.

Pô mblang: H’Nêč Êñuôl