VOV4.Êđê- Kdriêk Đăk Tô gĭt gai leh dŭm êpul êya bruă nao hlăm klei hâo hưn, mtrŭt mjhar jih jang mnuih gang mkhư̆ klei ruă tưp. Anei jing klei gĭt gai mơ̆ng k’iăng khua knơ̆ng bruă sang čư̆ êa čar Kontum Y Ngŏk, leh nao ksiêm dlăng bruă gang mkhư̆ klei ruă tưp kơ mnuih ti alŭ wăl kdriêk Đăk Tô jing alŭ wăl mâo ênoh mnuih mâo klei ruă êngoh bi ƀlĕ êrah lu hĭn hlăm čar truh 22 čô mnuih ruă, hlăm ênoh jih jang jing 33 čô mơ̆ng kluôm čar yap mơ̆ng akŏ thŭn truh kơ ară anei. Phung khua kiă kriê kdriêk Đăk Tô lŏ brei thâo, êngao kơ 22 čô mâo klei ruă êngoh bi ƀlĕ êrah, hlăm kdriêk lŏ mâo truh 69 čô mnuih mâo klei ruă bi čut. Ară anei, kdriêk Đăk Tô hlăk dôk ngă hdră gang mkhư̆ djăp mta klei ruă tưp, hlăm anăn mâo klei ruă tưp êngoh bi ƀlĕ êrah; klei ruă jơ̆ng kngan ƀăng êgei. Bi hŏng klei ruă tưp covid 19, dŭm să, wăl krah hlăm kdriêk Đăk Tô mkŏ mjing leh klei ksiêm dlăng, gĭt gai bruă mdrơ̆ng hŏng klei ruă tưp ti dŭm anôk ênưih mâo klei ruă./.

Pô mblang: Y-Khem Niê