VOV4.Êđê- Bi hdơr 74 thŭn hrue kahan êka êkeh, phung êngiă asei (27/7/1947 – 27/7/2021) aguah mbrue (27/7) phung khua kiă kriê, Khua kiă kriê Đảng êlâo dih, lăn čar, bruă mặt trận čar kwar gưl dlông Việt Nam nao dưm leh kwang mnga, čuh brui mngưi bi hdơr kơ phung jhŏng ktang djiê êngiă ti Knưng bi hdơr kơ phung djiê êngiă (Êlan Bắc Sơn – Hà Nội), lehanăn nao čuă msat khua gĭt gai Hồ Chí Minh. Nao ti anôk bi hdơr Khua lăn čar Nguyễn Xuân Phúc; Khua knŭk kna Phạm Minh Chính, Khua Bruă kƀĭn ala Vương Đình Huệ; Khua knơ̆ng kiă kriê bruă mặt trận čar kwar gưl dlông Việt Nam Đỗ Văn Chiến, mbĭt hŏng phung khua kiă kriê, khua gĭt gai bruă Đảng, lăn čar êlâo dih, jih jang phung khua prŏng hlăm Phŭn bruă kđi čar, Khua prŏng hlăm Êpul kiă kriê bruă Đảng, k’iăng khua Bruă kƀĭn ala, k’iăng khua knŭk kna lehanăn phung khua kiă kriê dŭm phŭn dhar bruă, êpul êya bruă knơ̆ng phŭn. Ti knưng bi hdơr kơ phung jhŏng ktang djiê êngiă ktue êlan Bắc Sơn, jih jang phung khua prŏng dưm leh kwang mnga bi hdơr kơ phung jhŏng ktang, bi êdah ai tiê hdơr knga hŏng phung săn leh asei mlei kơ djuê ana tuh êrah mčah klang kmlăn ai tiê bi blah, djiê hdĭp čiăng sua mă klei êngiê kơ djuê ana, bi hluh liê lăn čar, kyua klei hnŭk êngiê, kyua klei jăk yâo kơ djuê ana, kơ phung ƀuôn sang. Leh kơ anăn, Phung khua prŏng nao dưm kwang mnga, nao mŭt čuă msat khua gĭt gai Hồ Chí Minh./.

Pô mblang: Y-Khem Niê