VOV4.Êđê - Hlăm dŭm thŭn êgao, phung êdam êra čar Dak Lak hrăm mbĭt leh hŏng Hdră mkŏ mkra krĭng ƀuôn sang mrâo hŏng lu bruă ngă klă sĭt. Ară anei, phung êdam êra alŭ wăl dôk mtrŭt mđĭ hdră pla ana kyâo, răng mgang wăl hdĭp mda, mâo mta kñăm pla mrâo 120 êbâo phŭn ana kyâo mtah – mđing truh asăp iêu mthưr pla 1 êklai ana kyâo mtah mơ̆ng Khua knŭk kna. Mbĭt hŏng anăn jing bruă răng mgang wăl hdĭp mda, đru mkŏ mkra krĭng ƀuôn sang mrâo.

Hlăm bruă ngă Knăm kjuh mtah mrâo mkŏ mjing, Bruă êdam êra kdriêk Čư̆ Mgar bi hgŭm leh hŏng Knơ̆ng bruă Sang êa čư̆ êa wăl krah Quảng Phú leh anăn sang Yơng Hoa Nghiêm pŏk ngă hdră “Êklăk phŭn kyâo - kyua sa Việt Nam mtah”. Mbĭt hŏng klei hâo hưn iêu mthưr mnuih ƀuôn sang hrăm mbĭt răng mgang, kriê dlăng leh anăn mđĭ bi lar ana kyâo, krŭ wĭt dliê akŏ êa, phung êdam êra hlăm kdriêk ăt trŭn ngă bruă kih mdoh wăl hdĭp mda, čuh rơ̆k rung, huai mdoh êlan mnuôr, mđoh êa ktuê êlan leh anăn pla mrâo dŭm êtuh ana kyâo. Ayŏng Y Wal Mlô, Khua dlăng bruă Đảng êdam êra kdriêk Čư̆ Mgar brei thâo, khă gơ̆ hmaĭ mơ̆ng klei ruă Covid-19  ngă kơ dŭm bruă pŏk ngă hŏng hnơ̆ng điêt, ƀiădah kluôm kdriêk pla mrâo giăm 14.600 ana kyâo dŭm mta.“Hlăm wưng êgao snăn ăt iêu mthưr jih jang phung êdam êra hlăm kdriêk ngă bruă klam pô hlăm bruă răng mgang wăl hdĭp mda hŏng bruă ngă klă klơ̆ng, sĭt êdi. Hlăm anăn hmei pŏk ngă grăp čô êdam êra hlăm anôk bruă nah gŭ leh anăn gưl kdriêk pla leh anăn kriê dlăng ƀiă êdi 1 phŭn ana kyâo čiăng bi lar bruă pla 1 êklai ana kyâo mơ̆ng Knŭk kna, tal dua jing bi lar bra klei thâo săng răng mgang wăl hdĭp mda hlăm phung êdam êra leh anăn mnuih ƀuôn sang.”

Kluôm čar Dak Lak, hlăm thŭn anei, êpul êdam êra kčah leh hdră kñăm srăng pla mrâo 120 êbâo ana kyâo. Dŭm gưl bruă êdam êra mâo leh hdră ngă mdê mdê čiăng rơ̆ng dưi ngă hdră kčah leh anăn pla jih jang dưi hdĭp leh anăn hriê kơ prŏng. Ayŏng Nguyễn Văn Hà, Khua bruă êdam êra kdriêk Krông Pač lač kơ hdră ngă mơ̆ng phung êdam êra alŭ wăl. “Jao kơ dŭm êpul bruă êdam êra rơ̆ng čiăng mguôp hŏng bruă pla leh anăn ƀuăn rơ̆ng kriê dlăng, răng mgang. Mbĭt anăn pŏk ngă nanao snăn hmei mâo dŭm hdră kơ grăp čô knuă druh, phung êdam êra, phung êdam êra ngiêk 1 phŭn ana kyâo čiăng pla leh anăn kriê dlăng, răng mgang, mjing dŭm wăl ana kyâo mtah  doh, jăk siam leh anăn boh nik mguôp hŏng anăn jing răng mgang wăl hdĭp mda.”

Mbĭt hŏng bruă pla ana kyâo mtah, phung mda asei Dak Lak ngă leh anăn hlăk mđĭ lar bruă klam pô hlăm bruă răng mgang wăl hdĭp msa mơ̆ng ƀuôn prŏng truh krĭng ƀuôn sang. Phung mda asei dŭm alŭ wăl hlăm čar mâo lu bruă ngă, ba klei yuôm bhăn klă sĭt. Si tô hmô msĕ bruă êdam êra kdriêk Čư̆ Mgar pŏk ngă leh Hdră “čih kač rup - knhuah jăk siam Lăn Dap Kngư” kñăm mkra mlih wăl hdĭp mda hlăm kdriêk, lăm dŭm anôk khăng mâo djah djâo, mbĭt anăn mđĭ klei thâo săng răng mgang wăl hdĭp mda mnuih ƀuôn sang. Hdră anei mâo dŭm boh phŭn: čih kač rup 3D hŏng 30 pŏk rup mâo akŏ “Krŭ wĭt wăl hdĭp mda” ti Sang hră hđeh điêt Hoa Hồng, wăl krah Quảng Phú; čih kač rup hlăm 150 gơ̆ng pui kmlă, êlan êa êpul êya ti kdriêk. Ti ƀuôn prŏng Ƀuôn Ama Thuôt, Êpul hgŭm êdam êra ƀuôn hgŭm Thống Nhất hluê ngă hdră “War mnga phung êdam êra” kñăm lăm lui klei hwiê djah djâo, đru mkra mlih wăl hdĭp mda. Leh bruă “war mnga êdam êra” dưi hluê ngă, mjing djah êlâo dih jing sa đang kyâo mâo lu ana kyâo, hŏng lu mta mnga blang siam. Mbĭt hŏng anăn Êpul êdam êra lŏ dơ̆ng mkŏ mjing dŭm mta bruă msĕ si: tŏ mnga mơ̆ng mnơ̆ng lŏ mkra mjing, čih kač rup hâo hưn răng mgang wăl hdĭp mda… mjing wăl hdĭp mda jăk siam, doh mngač, ba klei mơak kơ mnuih ƀuôn sang riêng gah.

Ayŏng Y Lê Pas Tơr, K’iăng Khua bruă êdam êra čar Dak Lak brei thâo, bruă răng mgang wăl hdĭp mda, đru mkŏ mkra krĭng ƀuôn sang mrâo jing bruă klam mơ̆ng êpul êdam êra. Grăp thŭn, êpul êdam êra alŭ wăl mâo leh hnơ̆ng kčah klă klơ̆ng leh anăn ksiêm dlăng knhal jih thŭn kơ klei pla mrâo leh anăn kriê dlăng ana kyâo. Boh nik thŭn anei hnơ̆ng kčah dưi mđĭ hĭn dŭm thŭn êlâo. Bruă pla leh anăn kriê dlăng ana kyâo mâo dŭm anôk bruă pŏk ngă jăk, mơ̆ng akŏ thŭn truh ară anei dưi pla leh êbeh 60 êbâo phŭn ana kyâo dŭm mta, lu jing ana bi kơup êyui. “Čiăng dưi pla hŏng hnơ̆ng prŏng snăn brei mâo krĭng lăn prŏng leh anăn  brei ngă lu hră mơar djŏ tuôm kơ bruă pla kyâo, pla kyâo pioh bi msiam. Ară anei dŭm gưl êpul êdam êra êngao kơ pla dŭm anôk prŏng snăn lŏ pla hlăm djiêu êlan, pla hlăm dŭm anôk bruă, đang mnga. Mơ̆ng ară anei truh thŭn 2022, truh jih wưng păn bruă anei srăng gĭr bi blŭ hrăm, ksiêm hriăm leh anăn ktuê dlăng čiăng pla ƀiă êdi 1 krĭng wăl dliê pioh dlăng.”

Ăt hluê si ayŏng Y Lê Pas Tơr, čiăng dŭm hdră pla leh anăn kriê dlăng ana kyâo ba wĭt klei tŭ dưn, brei mâo klei tŭ ư mơ̆ng gưl bruă Đảng, bruă sang čư̆ êa leh anăn hrăm mbĭt đru mguôp mơ̆ng mnuih ƀuôn sang, klei bi hgŭm mơ̆ng dŭm êpul bruă, grăp čô mnuih. Amâo djŏ knŏng đru mguôp bi leh hdră kñăm 1 êklai phŭn ana kyâo mơ̆ng knŭk kna ôh, bruă pla ana kyâo srăng đru mguôp răng mgang wăl hdĭp mda, mkra mlih wăl jăk siam leh anăn mdrơ̆ng hŏng klei bi mlih yan adiê, mđĭ klei thâo săng mnuih ƀuôn sang, boh nik phung mda asei hlăm bruă răng mgang wăl hdĭp mda leh anăn ngăn dŏ čŏng mâo.