VOV4.Êđê- Hlăm gưl bluh đĭ tal 4 mơ̆ng klei ruă tưp Covid-19, mâo leh dŭm êtuh čô lĭng kahan bruă mdrao mgŭn nao đru kơ dŭm čar mâo klei ruă tưp krĭng dhŭng. “Jih klei ruă kơh wĭt” jing boh blŭ bi klă mơ̆ng dŭm čô lĭng kahan bruă mdrao mgŭn hlăm klei bi blah amâo mâo ênai phao ktuang hŏng klei ruă tưp. Pô ngă bruă klei mrâo mơ̆ng sang mđung asăp blŭ Việt Nam čih yap leh klei khăp lehanăn klei hmăng hmưi mơ̆ng dŭm čô knuă druh, êa mdrao, nai mdrao êlâo kơ mmông nao truh ti dŭm čar nah dhŭng, mđĭ ênoh mnuih mă bruă kơ dŭm sang êa drao jing êjai ti ƀuôn prŏng Hồ Chí Minh.

100 čô phung aê mdrao, nai mdrao, mnuih đa hriê mơ̆ng Sang hră ksiêm hriăm bruă nai êa drao kahan, đa hriê mơ̆ng Sang êa drao kahan mrô 7, Sang êa drao kahan mrô 103, lehanăn Anôk ksiêm hriăm kơ bruă mdrao mgŭn hlue knhuah đưm mơ̆ng lĭng kahan, mơ̆ng aguah ưm mtam truh kơ anôk bi kčah ti Lữ đoàn Dŭ mdiăng mrô 971 Sóc Sơn mprăp kơ klei đuĕ nao. Jih jang čŭt hơô čhum ao kahan sơăi, gui ti rŏng săkđô khuăt hdjul, anăn yơh jing jih jang mnơ̆ng mprăp nao hlăm bruă mdrơ̆ng hŏng klei ruă tưp.

Êlâo kơ đuĕ nao truh hlăm dŭm čar nah Dhŭng, nao đru bruă, phung nai aê mdrao kahan knŏng hmao iêu mă đĭng blŭ hŏng găp djuê bhiâo đuič. Kyuadah mâo asăp mtrŭn mjêč hlăk êjai krah mlam mprăp truh aguah đuĕ nao kơ ƀuôn prŏng Hồ Chí Minh, jih jang phung nai aê mdrao kahan ka hmao mprăp ôh jih jang mnơ̆ng mnuă pô ba êjai dôk gak, amâo lŏ hmao weh kơ pưk sang ôh. Tơl đa đa Thiếu tá mniê Nguyễn Thị Kiên, mơ̆ng Sang êa drao kahan mrô 7, kăn lŏ hmao hưn hŏng găp djuê rei:

“Ung kâo ka thâo mơh, kyuadah kâo dôk gak mlam anăn, snăn amâo lŏ hmao wĭt hưn ôh, ung kâo nao mă bruă mơh, ñu dôk hlăm êpul kahan ksiêm”.

Klei đuĕ nao hŏng klei mjêč anei năng ai truh kơ 15 hrue, thâodah sui hĭn kơ anăn, amâo mâo pô êmuh ôh kơ hruê srăng wĭt, kyuadah lu snăk sơưn mnuih dôk găn hlăm klei ruă tưp, lehanăn phung ƀĭng kahan nao leh êlâo ăt hlăk dôk mhjĭt m’uăt dŏng mdrao mnuih ruă hlăm dŭm boh sang êa drao jing jai lu hrue kăm hŏng anei leh, dôk hlăm klei dleh dlan, lehanăn adiê hlơr, ƀiădah jih jang mnuih hŏng klei gĭr kñăm čiăng bi msưh kdŭn klei ruă tưp. Lehanăn diñu thâo săng leh hơô hlăm asei pô dua mta ao mơ̆ng lĭng kahan, aô aê mdrao snăn ti mmông dleh dlan mơ̆ng klei ruă tưp, anei yơh jing mmông phung ƀuôn sang dôk čiăng kơ pô, lăn čar dôk čiăng kơ pô. Hŏng klei mĭn bi pral truh hlăm krĭng mâo klei ruă tưp, Đại uý aê mdrao Đặng Văn Ba ngă bruă anôk bruă bi krŭ klei suaih pral, mơ̆ng sang êa drao kahan mrô 103, lač:

Dlăng hlăm klei hâo hưn ƀuh, lehanăn ƀĭng nai êa drao kahan bi hưn lač, hlăm anăn ênoh mnuih mâo klei ruă tưp đuĕ nao kơ kjham lu êdi, asei mlei hmei pô ƀuh ktrŏ ai tiê mơh, čiăng bi pral truh mtam, kñăm hmao đru hrăm mbĭt hŏng ayŏng adei nai aê mdrao kơ anăn, đru kơ mnuih ruă tui si klei dưi pô”.

Bi klă anei jing bruă čuăn bi blah hlăm ênuk êđăp ênang, wăt hŏng phung mrâo dôk hriăm mda asei msĕ si trung sỹ Phạm Công Kim, ti sang hră ksiêm hriăm kơ bruă êa drao kahan ăt mprăp duh myơr ai tiê pô, nao đru kơ dŭm boh sang êa drao jing jai ti ƀuôn prŏng Hồ Chí Minh:

“Hmei mâo mjuăt bi hriăm 3 gưl leh, mjuăt bi hriăm kơ klei mă kman, lehanăn mkă dlăng kman, lehanăn bruă mdrao mgŭn mnuih ruă ăt hmei srăng ngă jih”.

Phung aê mdrao kahan hmư̆ asăp mtrŭn êlâo kơ nao mă bruă

Lui kơ tluôn mô̆ anak, ung kjar, amĭ ama, êpul kmha, ƀiădah phung dôk kơ tluôm hŏng lĭng kahan jing yuôm bhăn snăk, dưi thâo săng kơ bruă phung lĭng kahan, čiăng kơ jih jang sa ai ktuh êyuh kơ anôk dôk ngă bruă. Snăn yơh phung lĭng kahan hơĭt ai tiê, hur har đuĕ nao amâo mâo klei lŏ ktrŏ hnĭng kơ bruă ti tluôn ôh. Boh nik, dŭm gŏ sang jih dua ung mô̆ ngă bruă hlăm lĭng kahan sơăi, jing phung nao hlăm kdrăn jih. Nai mdrao kahan Nguyễn Thị Kiên lač:

“Sa čô anak dôk hriăm adŭ 10, sa čô anak dôk hriăm adŭ 4, bi amĭ ama kreh dôk ngă bruă truh mlam, ung mô̆ hmei ară anei dôk hlăm anôk bi ktlah, hŏng bruă kiă kriê hlăm alŭ wăl bi ktlah, snăn yơh dua čô anak mâo mjuăt bi hriăm leh mơ̆ng điêt, mưng leh hdĭp hlăm klei kbưi hŏng amĭ ama, dua ayŏng adei čŏng bi dlăng ba mă hjăn hlăm klei huă ƀơ̆ng”.

Msĕ snăn mâo Thiếu tá aê mdrao Đỗ Mai Phương ăt mâo dua čô anak kơ sang knŏng bi dlăng kriê mă hjăn mơh, bi amĭ nao kơ kwar Dhŭng đru gang mkhư̆ klei ruă tưp, ƀiădah amâo mâo klei rŭng răng ôh hlăm klei hdĭp.

“Dua amai adei dôk kơ sang čŏng bi dlăng ba mă hjăn, kâo nao hrăm mbĭt hlăm bruă mdrơ̆ng hŏng klei ruă tưp hŏng phung ƀuôn sang ti kwar Dhŭng, kâo amâo lŏ bư̆ ban ôh klei mĭn kâo kơ klei anei”.

Thiếu Tá Đỗ Mai Phương, Sang êa drao kahan 7 nao ti ƀuôn prŏng Hồ Chí Minh mdrơ̆ng hŏng klei ruă tưp

Dưn yua jih knhuah klei bhiăn mâo leh mơ̆ng đưm hlăm êpul lĭng kahan, hŏng klei mĭn ai tiê kyua kơ phung ƀuôn sang kwar Dhŭng thung k’ŭt, hŏng bruă ngă “Mdrơ̆ng hŏng klei ruă tưp, msĕ si bi kdơ̆ng hŏng roh”, bi ksŭng ktang hĭn, hur har hĭn, brei drei mâo klei thâo gĭr prŏng, mprăp ai tiê tŭ mă bruă kčah jao, bi leh jăk bruă knuă. Êlâo anăn, phŭn bruă lĭng kahan mâo gĭt gai leh dŭm anôk bruă, êpul êya nao mkŏ mjing truh 7 boh sang êa drao jing jai hlăm dŭm čar lehanăn ƀuôn prŏng nah Dhŭng hŏng mta kñăm mâo tŭ jum, mdrao mgŭn truh 3.500 čô mnuih ruă, lehanăn srăng lŏ pŏk mlar, čiăng dưi djăp tŭ jum truh 10 êbâo čô mnuih ruă.

Klei phung ayŏng amai adei lĭng kahan ngă klei bi ktlah đuĕ nao kơ Dhŭng bŏ hŏng klei mgei ai tiê mơh, amâo mâo ƀuh găp djuê, knŏng hdơ̆ng hjăn ƀĭng kahan djă kngan mđĭ ai brei gĭr êjai lu mnuih ruă dôk guôn. Diñu đuĕ nao lŏ čuê kru dŭm êtuh čô knuă druh, aê mdrao kahan hlăk dôk leh ti 7 boh sang êa drao jing jai mâo lĭng kahan mkŏ mjing ti krĭng mâo klei ruă tưp dŭm čar nah Dhŭng, anôk hlăm dôk mdrao kơ dŭm êbâo čô mnuih ruă Covid hŏng klei gĭr jing răng mgang klei hdĭp, klei suaih pral phung ƀuôn sang, kyua kơ hrue mgi amâo lŏ mâo klei ruă tư̆p ôh./.

Pô mblang: Y-Khem Niê