VOV4.Êđê – Hŏng klei mĭn čiăng kriê pioh kjăp lehanăn lŏ mtô bi hriăm bruă pơ̆k mñam djuê ana mơ̆ng đưm kơ ênuk gưl hđeh mrâo, pô mbruă H’Blŏng Knul (Aduôn Jim) ti ƀuôn Êa Trul, kdriêk Krông Bông, čar Dak Lak nao hgŭm leh sĭt êmĭt hlăm bruă mtô bi hriăm bruă kơ phung êdam êra dưi mkŏ mjing ti alŭ wăl. Ñu ăt čŏng kngan pô mñam leh dŭm mta mnơ̆ng dưi ba yua hlăm gŏ sang lehanăn hluê si klei kuôl kă čiăng blei mnơ̆ng kñăm krơ̆ng kjăp bruă lehanăn mđĭ ênoh mâo ba wĭt.

Hlăm dŭm hrue dôk hlăm klei bi ktlah yang ƀuôn, čiăng mdrơ̆ng hŏng klei ruă tưp Covid 19, snăn bruă nao kơ pưk hma mơ̆ng gŏ sang amai H’Yang Knul ti ƀuôn Ja, să Êa Trul, kdriêk Krông Bông, čar Daklak pioh lu hruê mmông hŏng bruă giêng mñam. H’Yang brei thâo, bruă anei kreh ngă êjai dôk amâo mâo bruă knuă mă, čiăng lŏ mjut thiăm prăk kăk. Lu thŭn hŏng anei, mnơ̆ng leh mâo mñam gŏ sang ñu mâo ba čhĭ, lehanăn mâo lu mnuih akâo blei. Kyua anăn yơh, jih 3 amai adei bi krăp, mđrăm mbĭt dôk bi mñam, dlăng diñu mñăm bi kthuăt mbruă sơăi: “Mâo amĭ pô thâo mñam lŏ mtô bi hriăm hmei. Phŭn tal êlâo hriăm ăt dleh, ƀiădah ƀrư̆ ƀrư̆ thâo raih, hlăm jih jang bruă giêng đêč, mñam, thâo siêt jhĭt knhal âo, mkra gru grua anak Êđê”.

H’Yang jing anak mniê tal 3 mơ̆ng aduôn Jim (H’Blŏng Knul). Ti ƀuôn Ja, lehanăn hlăm jih kdriêk krông Bông, hing sơăi kơ Aduôn Jim jing mnuih mbruă thâo mñam, hŏng lu mta mnơ̆ng mâo mñam jăk siam, msĕ si abăn msăm, abăn ƀă, m’iêng, ao, kpin... Aduôn Jim lŏ mñam čhiăm lang jhưng, hŏng gru grua mnga đêč pioh bi msiam hlăm dŭm boh sang čhĭ mnia, sang jưh hlăm čar lehanăn mơ̆ng êngao čar akâo blei. Ñu yăl dliê, dŭm thŭn êlâo, ñu mâo leh lu mnuih hriê akâo blei, mơ̆ng anăn mơh ñu jak mbĭt hŏng jih jang phung anak mniê ñu bi đru mñam čiăng pral mâo mnơ̆ng jao kơ tue, thŭn anei kyua klei ruă tưp snăn hrŏ leh mơh mnuih akâo blei. Snăn, hlăm dŭm hrue êgao, ăt mâo hruê mmông dôk pơ̆k mñam m’iêng ao pioh hĕ kơ anăn. Anăn yơh jing klei mưng leh, lehanăn ăt jing wưng čiăng mjuăt nanao kngan pô, lehanăn ală pô êmăt hĭn: “kâo thâo mñam mơ̆ng hlăk kâo mâo 15 thŭn, truh kơ ară anei anak čô kâo diñu riah leh sơăi mơh mñam, lehanăn kâo čang hmăng dưi lŏ mtô bi hriăm kơ puhng hđeh gưl mrâo kñăm čiăng kriê pioh mđĭ bi lar knhuah gru dhar kreh mơ̆ng aduôn aê pô đưm, boh nik hŏng bruă pơ̆k mñam anei”.

Tui si Châu Phan, k’iăng khua adŭ bruă Dhar kreh hâo hưn kdriêk Krông Bông, čar Daklak, ti să Êa Trul, lehanăn dŭm să jĕ giăm hlăm kdriêk krông Bông, hlăm dŭm thŭn giăm anei, knư̆ hrue knư̆ mâo lu phung amai adei thâo mñam. Mâo hĕ klei msĕ snăn anăn jing mâo klei đru yuôm bhăn mơ̆ng Aduôn Jim, asei ñu pô mtam yơh djă ti kngan ktrâo ti bruă kơ puhng čô anak hriăm mñam. Wưng leh êgao, Aduôn Jim hur har mtô bi hriăm kơ êbeh 100 čô amai adei ti dŭm să thâo raih leh bruă pơ̆k mñam.“Aduôn Jim thâo lu knhuah gru dhar kreh djuê ana, thâo mtô phung hđeh kdŏ knhuah djuê ana pô, mtô mmuiñ ei rei. Lehanăn ñu amâo mâo dưi lui mtam bruă pơ̆k mñam, mâo pŏk leh lu boh adŭ mtô bi hriăm kơ phung hđeh êra Daklak, mkŏ mjing ti să Êa Trul msĕ si ti ƀuôn Čư̆ Mil, Ƀuôn Ja, Ƀuôn Plum, Ƀuôn Băng Kung, lehanăn Ƀuôn Mnang Dơng, ti să Yang Mao pioh mtô bi hriăm bruă pơ̆k mñam”.

Aduôn Jim yăl dliê, bruă mơ̆ng aduôn aê pô đưm sĭt nik bi kriê pioh, lehanăn lŏ mtô bi hriăm kơ hđeh gưl mrâo, čiăng kơ mgi dih, djuê ana Êđê pô amâo mâo luič ôh knhuah gru dhar kreh đưm. Kyuanăn yơh, hlăm wưng leh êgao, amâo mâo djŏ knŏng dôk mtô bi hriăm kơ čô anak pô hlăm sang ôh, ƀiădah lŏ gĭr đru mtô bi hriăm kơ hlei pô mâo ai tiê thâo khăp kơ bruă pơ̆k mñam, lehanăn mâo klei čiăng hriăm bruă anei.

Hŏng klei thâo gĭr, klei hur har hlăm bruă mtô bi hriăm, Aduôn Jim mâo tŭ mă leh lu hră bi mni mơ̆ng dŭm gưl, lehanăn mâo mă klei pah mni mơ̆ng dŭm klei bi lông prŏng, bi lông điêt hlăm čar. Ñu lŏ mâo klei myun tuôm hŏng klei khua lăn čar mđup brei anăn knăl “Mnuih mbruă êdi” thŭn 2019, lehanăn mâo duh myơr leh jih ai tiê kơ bruă kriê pioh, bi lar knhuah gru dhar kreh djuê ana pô./.