VOV4.Êđê- Mmăt hruê 2/7, bruă sang čư̆ êa čar Lâm Đồng mkŏ mjing leh klei kƀĭn online hŏng dŭm anôk bruă djŏ tuôm, bruă sang čư̆ êa dŭm kdriêk, ƀuôn prŏng čiăng mkŏ mjing dŭm hdră êlan ksiêm dlăng klei ruă tưp êjai mâo sa čô mnuih mâo klei ruă tưp Covid-19 hlăm alŭ wăl. Pô mâo klei ruă tal êlâo ti čar Lâm Đồng jing sa čô mniê (46 thŭn, ti kdriêk Dă Teh). Pô ruă anei mbĭt hŏng ung ñu N.M.H čhĭ boh kroh ti sang mnia mblei Hóc Môn lehanăn wĭt kơ sang ti alŭ Phú Hòa, să Mỹ Đức, kdriêk Dă Teh čar Lâm Đồng.

Truh kơ 10h krah ti mlam 30/6, mô̆ ñu mâo klei mtŭk lehanăn êngoh, lehanăn diñu nao hưn mdah klei suaih pral ti anôk bruă mdrao mgŭn să Mỹ Đức. Knơ̆ng bruă mdrao mgŭn ngă pral dŭm hdră êlan bi ktlah, mă mta mkă kman lehanăn ƀuh pô anei mâo kman Sars CoV 2. Tui si Tống Giang Nam, khua kiă kriê bruă sang čư̆ êa kdriêk Dă Teh brei thâo, 2 čô ung mô̆ anei wĭt mơ̆ng Hóc Môn, nao găn anôk ksiêm mkă klei ruă tưp ƀiădah diñu hưn amâo sĭt klei suaih pral. klei mâo boh tŭ dưn mơ̆ng klei ksiêm mkă kman ƀuh mnuih anei mâo kman Sars CoV 2, kdriêk ngă mjêč leh dŭm hdră êlan čuăl krĭng alŭ Phú Hòa lehanăn ngă dŭm hdră êlan gang mkhư̆ klei ruă tưp. ară anei, bruă tui duah, bi ktlah, mă mta ksiêm mkă kman kơ dŭm čô mâo klei tuôm jĕ giăm hŏng pô ruă anei dưi mâo klei dôk ngă mơ̆ng čar Lâm Đồng.

Pô mblang: Y-Ƀel Êban