VOV4.Êđê- Khă gơ̆ thŭn khua leh leh anăn kngan amâo lŏ đei mbruă, êdu ênun msĕ si hlăk ai ôh, ƀiădah pô thâo mbruă Y Hươt ti ƀuôn Kon Trang Long Loi, wăl krah Đăk Hà, kdriêk Đăk Hà, čar Kon Tum ăt mđĭ lar bruă mñam kdrăp djuê ana msĕ si sa klei hur har hŏng klei čang hmăng đru mguôp kriê pioh leh anăn răng mgang klei jăk siam dhar kreh djuê ana  mnuih Bahnar.

Aduôn Y Hươt brei thâo: “Hŏng mnuih djuê ana Ba Na, bruă đêč mñam mâo leh mơ̆ng đưm đă. Dŭm mnơ̆ng dhơ̆ng đêč mñăm mơ̆ng mnuih Ba Na mâo đêč mnga bi siam, êa mil lehanăn boh tŭ dưn dhar kreh mdê hŏng dŭm djuê ana mkăn. Hŏng dŭm êa mil yua lu hĭn jing êa hrah, êa kñĭ, êa jŭ mbĭt hŏng dŭm êa mil mkăn, hlăm sa mnơ̆ng dhơ̆ng đêč mñam mơ̆ng mnuih Ba Na čiăng bi êdah klei hmăng hmưi mơ̆ng anak mnuih srăng dưi ñŭ kma hŏng yang, lăn adiê leh anăn čiăng mâo klei k’up mgang. ”

Dưi  mâo klei hriăm lehanăn thâo kơ kdrăp đêč mñam mơ̆ng 12 thŭn, aduôn Y Hươt đêč mñam lu tơl amâo lŏ hdơr mâo mñam leh dŭm mnơ̆ng đêč mñam, mnơ̆ng dhơ̆ng yua mơ̆ng bruă đêč mñam. Ñu lač, kdrăp đêč mñam, lehanăn aruăt mrai jing mnơ̆ng ƀơ̆ng huă hlăm ai tiê, tơdah mâo hruê amâo mâo đêč mñam srăng ƀuh klei amâo jăk hlăm ai tiê, msĕ si kƀah sa mta mnơ̆ng.

Mơ̆ng ñu hlăk điêt, grăp hruê ƀuh nanao amĭ lehanăn aduôn dôk đêč mñam. Kyua klei anăn brei kơ ñu mâo klei khăp čiăng hŏng bruă đêč mñam. Ƀrư̆ ƀrư̆ truh đĭ hriê kơ prŏng, dưi mâo klei mtô bi hriăm mơ̆ng amĭ lehanăn dŭm čô mduôn khua hlăm ƀuôn, mbĭt hŏng klei khăp čiăng mâo leh êlâo, ñu hmar thâo kơ bruă anei lehanăn yap bruă anei jing klei mơak hlăm grăp hruê. Phŭn kčưm ñu mñam lehanăn đêč mơ̆ng dŭm mnga đêč ênưih, ƀrư̆ ƀrư̆ lŏ thâo dŭm mnga đêč dleh hĭn, dŭm pŏk mnal prŏng hĭn. Bruă mtô kơ bruă, sơnăn ñu hmar thâo jih dŭm êlan đêč mnga lehanăn mñam.

Aduôn Y Hươt bi hriăm anak čô mñam kdrăp djuê ana

Hŏng klei thâo bruă mơ̆ng pô, pô thâo bruă aduôn Y Hươt dưi mñam lŭ mnơ̆ng dhơ̆ng đêč mñam, lehanăn gŏ sang dưi ba čhĭ kơ tač êngao. Dŭm mnơ̆ng dhơ̆ng đêč mñam mơ̆ng ñu dưi ba čhĭ hŏng ênoh lu hĭn 2 - 3 blư̆  mkă hŏng dŭm mnơ̆ng dhơ̆ng mñam hŏng măi, ƀiădah ăt mâo lu mnuih duah blei.

Tui hlue  aduôn Y Hươt, êlâo dih, čiăng mâo mnơ̆ng đêč mñam siam srăng mâo lu dŭm bruă ngă lehanăn mâo klei thâo kơ bruă đêč mñam. Kyuanăn dưi mñam dŭm  blah  mnal jăk hĭn, hơ ô mâo klei jăk mơh. Ară anei mnuih Ba Na ăt dôk mñam msĕ si klei đêč mñam đưm, ƀiădah aruăt mrai blei mơ̆ng sang mnia blei. Kơ klei đêč mnga lehanăn êa mil ăt dôk djă pioh msĕ si knhuah gru djuê ana pô.

Hlăm sang điêt pô, aduôn Y Hươt ăt pioh sa kjhiêt điêt čiăng dưm kdrăp đêč mñam. Leh mâo klei akâo brei lông mñam, kngan ñu hmar lehanăn nga djŏ. Dôk ti djiêu jing dŭm klei ktuê dlăng mơ̆ng phung anak čô.

Aduôn y Hươt brei thâo: Hlăm grăp alŭ wăl pŏk leh sơaĭ adŭ hriăm bruă đêč mñam ti sang roong hlăm ƀuôn lehanăn mâo klei iêu ñu nao mtô hlăm dŭm adŭ hriăm anăn. Dŭm blư̆ arăng iêu nao mtô sơnăn, khădah amâo mâo lu prăk ôh, ƀiădah ñu mâo klei mơak hlăm ai tiê kyua bruă đêč mñam mơ̆ng djuê ana pô dưi mâo klei truăn mĭn, klei yap yuôm bhăn leh anăn dưi djă pioh amâo mâo huĭ kơ klei rai luič.

Aduôn Y Hươt yăl dliê: “Êlâo dih, hlăm klei dôk dơ̆ng ƀơ̆ng huă grăp hruê mơ̆ng mnuih djuê ana Ba Na, Ao, m’iêng, čhiăm, băn dưi mâo klei đêč mñam mơ̆ng phung mniê hlăm gŏ sang. Kyuanăn hlăm wưng anăn, grăp boh gŏ sang mâo sơaĭ kdrăp đêč mñam. Leh mnuih mduôn khua ƀrư̆ hruê brư̆ ƀiă, bruă  đêč mñam ăt ƀrư̆ hruê brư̆ luič kyua mâo lu kdrăp m’iêng ao mñam hŏng maĭ. Leh anăn êpul hđeh amâo jăk lŏ mâo klei khăp hŏng bruă đêč mñam ôh. Dŭm kdrăp m’iêng ao mơ̆ng bruă đêč mñam ară anei dôk dưi yua ƀiă hlăm dŭm knăm hlăm ƀuôn amâo dah mnuih mduôn khua dôk čŭt hơ ô hlăm ƀuôn. Dleh sơnăk čiăng kơ ênŭk hđeh ară anei lŏ mâo klei khăp kơ bruă đêč mñam.”

Hŏng klei khăp čiăng hlăm bruă đêč mñam mơ̆ng pô thâo bruă Y Hươt ti ƀuôn Kon Trang Long Loi, wăk krah Dak Hà, kdriêk  Dak Hà, čar Kon Tum srăng đru kơ bruă đêč mñam knhuah gru djuê ana Ba na dưi mâo klei djă pioh lehanăn bi lar kơ ênŭk êdei.