VOV4.Êđê- Aguah mbrue (15/7), ti Hà Nội, Bruă êdam êra Cộng sản Hồ Chí Minh, Êpul hgŭm bruă êdam êra gưl dlông Việt Nam lehanăn knơ̆ng bruă hlăm Êpul grŭp Yeah1 mkŏ mjing leh bruă pŏk klei đru ênoh mnơ̆ng yua aguah tlam kơ mnuih ngă bruă lehanăn phung ƀuôn sang. Tui si hdră mâo kuôl kă, mnuih ngă bruă knơ̆ng bruă, lehanăn mnuih ngă bruă êngiê, phung ƀuôn sang tuôm hŏng klei dleh dlan kyua hmăi amâo mâo jăk mơ̆ng klei ruă tưp, tơdah nao blei mnơ̆ng yua hŏng App blei mprăp MEGA1 amâodah blei ti dŭm anôk hiu čhĭ mơ̆ng hdră anei mâo anăn “Bi đru hŏng klei khăp, hrăm mbĭt găn bi dưi klei ruă tưp anei” srăng mâo phung čhĭ mnia đru bi hrŏ truh 50% ênoh ênil mnơ̆ng anăn. Hdră anei dưi mkŏ mjing mơ̆ng ară anei hlŏng truh jih mlan 6 thŭn êdei, hlăm 63 boh čar, ƀuôn prŏng, tal êlâo jing kơ dŭm čar, ƀuôn prŏng hlăk dôk găn klei ktrŏ êdi mơ̆ng klei ruă tưp covid 19. Ngă bruă anei kñăm đru ngă bruă mdua, mdrơ̆ng hŏng klei ruă tưp êjai, lehanăn mđĭ kyar klei hdĭp mda êjai, kñăm krŭ wĭt bruă duh mkra mnia mblei./.

Pô mblang: Y-Khem Niê