VOV4.Êđê- Tlam mbruê, ti ƀuôn prŏng Hồ Chí Minh, k’iăng khua knŭk kna Vũ Đức Đam mbĭt hŏng êpul ngă bruă mơ̆ng knŭk kna kơ bruă gang mkhư̆ klei ruă tưp Covid-19 nao ngă leh bruă čuă dlăng, mbha êa drao kơ dŭm čô mâo klei ruă tưp Covid-19 dôk bi ktlah, mdrao mgŭn ti sang. Leh ngă bruă ksiêm dlăng ti kdriêk čar mrô 11 lehanăn kdriêk čar mrô 8, k’iăng khua knŭk kna Vũ Đức Đam mtă kơ klei sĭt hlăm hruê mmông êgao ti dŭm alŭ wăl mâo dŭm čô phung F0 hriê kơ kjham hmar amâo mâo klei nao čuă dlăng, hmao ƀuh, kyuanăn djiê leh ti sang. Kyuanăn, hrô kơ bruă knŏng blŭ êmuh kña hlăm đĭng ƀlŭ, êpul êya lĭng kahan bruă mdrao mgŭn lŏ bi mguôp hŏng bruă mdrao mgŭn alŭ wăl ngă nanao bruă nao čuă dlăng F0, boh nik dŭm gŏ sang amâo mâo mnuih mda asei, suai pral kriê dlăng mnuih ruă. K’iăng khua knŭk kna Vũ Đức Đam mtă hlăm 24 mmông kơ anăp, êpul êya lĭng kahan bruă mdrao mgŭn srăng bi kƀĭn, hưn mdah klei mbha êa drao gŭn kơ phung F0. Tơdah êa drao ka truh kơ phung F0 srăng nao ba mtam, dah kƀah srăng bi mbŏ mtam.

Pô mblang: Y-Ƀel Êban