VOV4.Êđê -Sa klei kƀĭn trông ksiêm dlăng bruă răng kriê, răng mgang, bi lar dưm knhuah gru dhar kreh čing čhar Lăn Dap Kngư dưi anôk bruă ngăn drăp dhar kreh, phŭn bruă dhar kreh, mjuăt asei mlei leh anăn hiu čhưn ênguê mkŏ mjing hruê 12/4. Ti ƀuôn prŏng KonTum, čar KonTum. Nao hgŭm hlăm anăn mâo dŭm pô ksiêm dlăng, ksiêm duah knhuah gru dhar kreh, pô bi ala kơ bruă dhar kreh leh anăn knŏng bruă dhar kreh, mjuăt asei mlei leh anăn hiu čhưn ênguê 5 čar ti Lăn Dap Kngư. Hlăm dŭm thŭn leh êgao phŭn bruă dhar kreh, mjuăt asei mlei leh anăn hiu čhưn ênguê, knŭk kna leh anăn dŭm anôk bruă dhah kreh ngă leh lu hdră êlan čiăng kriê pioh leh anăn bi lar dŭm boh tŭ dưn dhar kreh. Hlăm anăn mâo dŭm knăm, klei ngă yang ăt dôk dưi djă pioh mơ̆ng mnuih djuê ƀiă ti alŭ wăl, dôk ba yua hlăm klei hdĭp grăp hruê.

Mbĭt hŏng anăn, dưi pŏk truh kơ êtuh adŭ hriăm klei tông čing, kdŏ čhuang, klei thâo kơ čing čhar… hŏng klei nao hgŭm truh kơ dm êbâo čô mnuih. Êngao kơ dŭm boh tŭ dưn jăk anăn, dŭm čô bi ala nao hgŭm hlăm klei kƀĭn trông anăn ăt brei ƀuh lu klei lông dlăn hlăm bruă răng kriê, răng mgang leh anăn mđĭ lar dhar kreh čing čhar Lăn Dap Kngư msĕ si: anôk anei mâo klei bi rai, êpul phung mnuih thâo kơ bruă anei knư̆ hruê knư̆ ƀiă leh anăn phung hđeh ênuk anei amâo mâo khăp kơ bruă anei ôh, klei jĕ giăm mơ̆ng klei đĭ kyar bruă duh mkra leh anăn mđĭ kyar dhar kreh ka mâo klei bi kna ôh.

Y Khem pô mblang