VOV4.Êđê- Aguah mbruê, ti Hà Nội, phŭn bruă lŏ hma lehanăn mđĭ kyar krĭng ƀuôn sang mâo leh klei kƀĭn online hŏng dŭm alŭ wăl lehanăn êpul hgŭm bruă čiăng bi trông ruh mtlaih klei dleh dlan mâo hnơ̆ng ba čhĭ mnơ̆ng dhơ̆ng mơ̆ng kyâo hlăm thŭn anei. Gưl bluh đĭ klei ruă tưp Covid-19 tal 4 ngă klei hmăi lehanăn dôk ngă klei hmăi kjham kơ bruă mkra mjing hlăm dŭm knơ̆ng bruă mkra mjing kyâo, boh nĭk dŭm alŭ wăl krĭng dhŭng, anôk mâo 70% knơ̆ng bruă ti năn hŏng ênoh ba čhĭ kơ ala tač êngao mâo giăm 80% ênoh ba čhĭ kyâo lehanăn mnơ̆ng dhơ̆ng mơ̆ng kyâo hlăm ala čar. Tĭng knăl mâo leh mkrah wah ênoh knơ̆ng bruă mdei êjai klei mă bruă amâo dah kđăl ƀăng lehanăn bi hrŏ hnơ̆ng mkra mjing kyua klei ruă tưp. čiăng ruh mgaih klei dleh dlan kơ dŭm knơ̆ng bruă, bi kơ tĭng phung bruă lŏ hma lehanăn mđĭ kyar krĭng ƀuôn sang mâo leh klei kčĕ hŏng knŭk kna lehanăn êpul gĭt gai ala čar bruă gang mkhư̆ klei ruă tưp Covid-19 srăng ba vaccine tal êlâo kơ dŭm anôk mâo knơ̆ng bruă dôk ngă bruă. Mbĭt anăn đru lehanăn mtô bruă mdrao mgŭn čiăng kơ dŭm knơ̆ng bruă čŏng blei lehanăn čŏng ksiêm mkă kman hmar lehanăn ksiêm mkă hŏng kdrăp PCT đru bi hrŏ ênoh prăk, brei dŭm knơ̆ng bruă čŏng tui duah vaccine kơ mnuih mă bruă.

Pô mblang: Y-Ƀel Êban