VOV4.Êđê- Hlăm dŭm thŭn êgao, êpul lĭng kahan čar Lâm Đồng gĭr mkŏ mkra krĭng ƀuôn sang mrâo. Boh nik, dŭm anôk bruă lĭng kahan hrăm mbĭt hŏng mnuih ƀuôn sang krĭng taih kbưi, ktrâo lač kơ mnuih ƀuôn sang mâo klei tŭ dưn, mbĭt anăn đru mă bruă, mkŏ mjing dŭm mta bruă krĭng ƀuôn sang mrâo. Mơ̆ng anăn, klei khăp lĭng kahan - ƀuôn sang ƀrư̆ sĭt suôr, jiă kma knhuah gru “Lĭng kahan Awa Hồ” hlăm klei hdĭp yang ƀuôn.

Đại tá Nguyễn Văn Sơn, K’iăng khua bruă kđi čar hlăm knơ̆ng bruă gĭt gai lĭng kahan čar Lâm Đồng brei thâo, dŭm thŭn leh êgao, êpul răng mgang klei êđăp ênang hlăm čar ngă jăk na nao hdră êlan “Lĭng kahan hrăm mbĭt mkŏ mra krĭng ƀuôn sang mrâo ”. Boh nĭk kñăm uêñ mĭn lehanăn duh bi liê anôk dôk mâo lu mnuih djuê ƀiă.

Klă klơ̆ng, mơ̆ng thŭn 2015 truh kơ ară anei, knơ̆ng bruă gĭt gai lĭng kahan čar Lâm Đồng iêu mkrum leh truh kơ dŭm êtuh êklai prăk čiăng mkŏ mkra, êlan pui mklă, êlan klông, sang hră mơar, anôk bruă, mnuôr êa ngă lŏ…iêu jak truh kơ êbeh 15.300 hruê mă bruă mơ̆ng dŭm čô lĭng kahan, kahan ƀuôn, kahan mprăp mơ̆ng dŭm anôk bruă, êpul êya hlăm êpul răng mgang klei êđăp ênang. Đru kơ mnuih ƀuôn sang Kdriêk Dam Rông, kdriêk Lâm Hà mjeh ana boh kroh, mnơ̆ng dhơ̆ng yua lehanăn mnơ̆ng dhơ̆ng mkra mjing. Tui hluê anăn, lŏ đru kơ mnuih ƀuôn sang hlăm 11 să dưi mđĭ kyar bruă lŏ hma, mđĭ bruă mkra mjing, ênoh prăk ba wĭt, tĭng knăl dưi truh kơ 5,5 êklai prăk. Dưi đru kơ 2.000 gŏ sang ƀun ƀin, hlăm anăn mâo lu gŏ sang mnuih djuê ƀiă mơ̆ng hdră êlan đru hlăm bruă mkŏ mkra krĭng ƀuôn sang mrâo.

 Hlăm 5 thŭn giăm anei, knơ̆ng bruă gĭt gai lĭng kahan čar Lâm Đồng dưi rŭ mdơ̆ng lehanăn mđup brei 85 boh sang bi đru kơ dŭm gŏ sang knŭk kna dlăng ba lehanăn dŭm gŏ sang mâo bruă tŭ dưn hŏng lăn čar. Ênoh đru kah knar hlăm ƀrô 80 êklăk prăk/sa boh sang. Êngao kơ năn, êpul răng mgang klei êđăp ênang ti čar lŏ hrăm mbĭt hŏng dhar bruă, anôk bruă djŏ tuôm ngă bruă kriê dlăng klei suaih pral kơ mnuih ƀuôn sang, boh nĭk jing dŭm alŭ wăl mnuih djuê ƀiă, alŭ wăl taih kbưi. Klă klơ̆ng, ngă leh bruă nao ksiêm mkă klei ruă, mbha êa drao amâo mă prăk ôh kơ mnuih ƀuôn sang hlăm ƀrô 15.500 čô mnuih hŏng ênoh prăk 360 êklăk prăk.

Khua mduôn Kră Jăn Ha Siêng, ti êpul anôk dôk Đăng Gia Rít B, wăl krah Lạc Dương, kdriêk Lạc Dương, čar Lâm Đồng lač: Bruă mkŏ mkra krĭng ƀuôn sang mrâo mơ̆ng Đảng lehanăn knŭk kna jing klei djŏ êdi, hlăm anăn mâo klei đru mguôp prŏng mơ̆ng êpul lĭng kahan ala čar Việt Nam. Dŭm čô lĭng kahan hlăm kdriêk, hlăm čar hrăm mbĭt leh hŏng dŭm čô knuă druh, mnuih mă bruă knŭk kna lehanăn mnuih mă bruă jing mnuih djuê ƀiă hmei, dưi pŏk phai êlan klông hlăm alŭ wăl lehanăn doh siam hĭn, bi msiam sang hră mơar lehanăn anôk kƀĭn hlăm alŭ ăt dưi mkra wĭt jăk hĭn, ngă klei găl kơ mnuih ƀuôn sang mâo anôk ngă bruă yang ƀuôn jăk. Tui hluê anăn, lŏ đru bi mlih klei jing kơ krĭng ƀuôn sang hlăm anôk hmei dôk mâo klei mngač siam hĭn.

Êpul lĭng kahan čar Lâm Đồng đru mkra êlan krĭng ƀuôn sang mrâo hlăm krĭng mnuih djuê ƀiă

Sa bruă klam yuôm bhăn jing hrăm mbĭt mkŏ mkra krĭng ƀuôn sang mrâo ti anôk mnuih djuê ƀiă dôk, anăn jing klei đru kơ mnuih ƀuôn sang hlăm bruă lŏ hma, êpul răng mgang klei êđăp ênang hrăm mbĭt hŏng dŭm knơ̆ng bruă, dhar bruă lŏ hma, dŭm kdriêk, ƀuôn prŏng, dŭm êpul êya bruă kđi čar - yang ƀuôn ngă leh klei hâo hưn lehanăn mtô kơ mnuih ƀuôn sang kơ klei mkra mjing bruă lŏ hma. Dŭm hdră êlan đru mkŏ mjing msĕ si: klei thâo hlăm bruă pla mdiê lŏ, kriê dlăng ana boh, ana mnơ̆ng pla ƀiă hruê, đru ngă 12 klei bi hmô kơ bruă pla lehanăn kriê dlăng ana kphê, klei bi hmô mkra mjing hbâo brŭ doh… Bi mguôp hŏng knơ̆ng bruă mtrŭt mjhar bruă lŏ hma, knơ̆ng bruă mtrŭt mjhar bruă lŏ hma dŭm kdriêk, knuă druh bruă lŏ hma hlăm dŭm să lehanăn dŭm anôk bruă mkăn mkŏ mjing 11 adŭ hriăm ba jao klei thâo, 5 klei bi hmô pla mjing ana Macka… Mơ̆ng anăn dưi pŏk sa klei duh ƀơ̆ng mrâo, mtrŭt mjhar bruă mđĭ kyar bruă duh ƀơ̆ng, mđĭ hĭn klei thâo, ênoh prăk ba wĭt, mđĭ klei hdĭp mnuih ƀuôn sang, boh nĭk kơ mnuih djuê ƀiă.

            Sa bruă klam yuôm bhăn êdi hlăm bruă hrăm mbĭt mkŏ mkra krĭng ƀuôn sang mrâo, mâo klei gĭr mơ̆ng êpul răng mgang klei êđăp ênang dưi bi leh lehanăn kđăm  hlăm ai tiê mnuih ƀuôn sang jing đru hlăm hdră êlan klei hdĭp mda lehanăn mtô mjuăt, lăm lui klei amâo thâo hră mơar, klă klơ̆ng êpul bruă duh mkra mơ̆ng lĭng kahan krĭng dưr čar Lâm Đồng đru leh kdrăp, mnơ̆ng dhơ̆ng yua kơ dŭm sang hră mtô mjuăt hđeh điêt hlăm alŭ wăl mâo 11 să hlăm anôk pô kriê dlăng, hŏng ênoh prăk êbeh kơ 2,7 êklai prăk. Pŏk adŭ hriăm lehanăn dưi bi leh bruă lăm lui klei amâo thâo boh hră kơ mnuih ƀuôn sang jing mnuih djuê ƀiă, hlăm sa adŭ mâo hlăm ƀrô 25-30 čô mnuih hriăm ti alŭ Păng Pă (Kdriêk Dam Rông), alŭ Tân Lập, să Tân Thành, kdriêk Lâm Hà, đru kơ 420 čô mnuih djuê ƀiă thâo răk lehanăn thâo čih hră. Êngao kơ năn, lŏ mkŏ mjing truh kơ dŭm pluh gưl hâo hưn kơ mnuih ƀuôn sang mâo klei hdĭp dhar kreh mrâo, ƀơ̆ng mnăm doh…

Mơ̆ng dŭm boh tŭ dưn anăn brei ƀuh, bruă klam mơ̆ng êpul răng mgang klei êđăp ênang hlăm bruă hrăm mbĭt mkŏ mkra krĭng ƀuôn sang mrâo anôk dôk mnuih djuê ƀiă dưi čih yap jing klei yuôm bhăn. Tui hluê anăn đru mguôp kơ klei tŭ dưn mbĭt mơ̆ng čar Lâm Đồng hlăm bruă mkŏ mkra krĭng ƀuôn sang mrâo - ƀuôn prŏng jăk siam. Bi mlih klei jing krĭng ƀuôn sang, boh nĭk jing krĭng mnuih djuê ƀiă, mâo lu klei mlih mrâo, lehanăn klei jăk hĭn hlăm klei bi hmô “Lĭng kahan Awa Hồ” hlăm ai tiê mnuih ƀuôn sang.

Pô mblang: Y-Khem Niê