VOV4.Êđê- Leh 10 thŭn gĭr ktưn, truh ară anei, gŏ sang amai Y Glar leh anăn ayŏng A Dâu, djuê ana Sêdang, ti să Sa Bình, kdriêk Sa Thầy, čar Kon Tum amâo djŏ knŏng tlaih ƀun ôh, ƀiădah gĭr ktưn mâo klei hdĭp jăk hĭn. Mơ̆ng ênhă pla ana ksu, hbei ƀlang leh anăn rông êmô, kan, grăp thŭn gŏ sang diñu mâo dŭm êtuh  êklăk prăk.

Kkiêng thŭn 1993 hlăm sa gŏ sang knap mñai, mâo lu ayŏng amai dei, kyuanăn leh jih klei hriăm sang hră gưl 2, amai Y Glar dôk ti sang lehanăn đru kơ amĭ ama hlăm bruă duh mkra. Truh ti thŭn 2021, Amai Y Glar bi kuôl jing ung mô̆ hŏng ayŏng A Dâu lehanăn amĭ ama dua nah brei kơ diñu mâo 1 ha lăn hma. Klei hdĭp mâo lu klei dleh dlan. Thŭn 2014, 2 čô ung mô̆ ñu dưi mâo klei mtô mơ̆ng bruă sang čư̆ êa alŭ wăl lehanăn mâo klei găl brei diñu čan lĭng mơ̆ng knơ̆ng prăk đru ba yang ƀuôn hŏng ênoh 30 êklăk prăk čiăng mđĭ kyar bruă duh mkra. Mơ̆ng ênoh prăk anei, diñu pla 1 ha đang ksu lehanăn blei 2 drei êmô ana mđai, êngao kơ anăn diñu lŏ mưn 2 ha lăn lehanăn pla ana hbei ƀlang.

Lăn lŏ tla wĭt klei kriăng mơ̆ng diñu, kyua dưn yua djŏ klei pla mjing, 1 ha ksu đĭ hriê jăk lehanăn mâo leh prăk ba wĭt, 2 drei êmô ana mđai leh mâo 3 drei êđai, gŏ sang ñu ba čhĭ dŭm drei êđai anei lehanăn lŏ blei thiăm 1,5 ha lăn čiăng pla ana hbei blang, pla ana kđuič. Truh kơ ară anei, gŏ sang dưi tlaih mơ̆ng klei knap mñai lehanăn dưi mâo klei hdĭp trei mđao. Mơ̆ng ênhă lăn pla ksu, blei ƀlang lehanăn rông êmô, rông kan… grăp thŭn hlăm gŏ sang dưi mâo truh 100 êklăk prăk mnga. Êngao kơ năn, tơdah mâo mmông wăn, hruê mdei, gŏ sang ñu lŏ hiu mă bruă arăng čiăng mđĭ ênoh prăk hlăm gŏ sang. Mrâo anei, gŏ sang diñu dưi rŭ mdơ̆ng leh sa boh sang kdrăm k’ah.

Ayŏng A Dâu lač: hlăm hruê mmông kơ anăp, hmei mâo klei mĭn srăng lŏ blei lăn lehanăn lŏ lĭng čan prăk knŭk kna, mbĭt hŏng prăk mkiêt mkuôm, bi mlih 1 ha pla hbei ƀlang lŏ pla ana kphê. Ară anei, 2 čô ung mô̆ hmei nao hgŭm leh hlăm dŭm adŭ hriăm kơ klei pla mjing ana, kriê dlăng ana kphê. Ayŏng A Dâu lač: čiăng mđĭ kyar bruă duh mkra, êlâo hĭn čiăng mâo klei mĭn čiăng tlaih kơ klei knap mñai, mâo klei thâo kreh knhâo - thâo ngă bruă, thâo mđing hmư̆, tui hriăm lehanăn djă pioh klei thâo. Êngao kơ anăn, čiăng lŏ ksiêm dlăng dŭm ana boh kroh anăn djŏ mơh hŏng klei jing ti lăn anei, si ngă ênoh ênil hlăm êngao tač.

Amâo knŏng mdei kơ thâo ngă bruă duh mkra, Amai Y Glar lehanăn ayŏng A Dâu ăt hur har đru kơ dŭm gŏ sang mkăn dôk hlăm klei ƀun ƀin. Grăp thŭn, mkŏ mjong bruă mă kơ 3 - 4 čô mnuih mkăn, kah mbha klei thâo, mtô klei duh bơ̆ng kơ pô mkăn.

            Tui si ƀuh hlăm gŏ sang amai Y Glar lehanăn ayŏng A Dâu, Nguyễn Minh Thuận, khua bruă Đảng ti să Sa Bình, kdriêk Sa Thầy, čar Kon Tum brei thâo: anei jing gŏ sang mâo klei bi hmô gĭr tir čŏng pô tlaih mơ̆ng klei knap mñai hlăm alŭ wăl. Êngao kơ anăn, gŏ sang ñu ăt hur har nao hgŭm hlăm djăp mta bruă alŭ wăl msĕ si: myơr lăn, đru hruê ai mă bruă mkŏ mkra êlan klông, mkŏ mkra krĭng ƀuôn sang mrâo, ngă bruă mkŏ mjing gŏ sang mâo klei thâo săng, trei mđao. Thŭn 2020, anei jing gŏ sang klưn hĭn, dưi mâo klei pah mni hlăm bruă “Jih jang mnuih ƀuôn sang hrăm mbĭt mkŏ mjing klei hdĭp dhar kreh” mơ̆ng bruă Đảng nah gŭ lehanăn bruă sang čư̆ êa./.