VOV4.Êđê- Êpul knuă druh, phung ngă bruă klei mrâo mơ̆ng sang mđung asăp blŭ Việt Nam čŏng nao ngă leh bruă hlăm dŭm čar krĭng dhŭng hlăm dŭm hruê krĭng nah dhŭng dôk hlăk jih ai gang mkhư̆ klei ruă tưp. Amâo knŏng djŏ bruă klam ƀiădah grăp čô mă bruă klei mrâo nao ngă bruă ba nao wăt kơ bruă ngă, mprăp nao truh grăp anôk čiăng hâo hưn dŭm boh klei hlăm ala čar hŏng ai tiê mơ̆ng pô ngă bruă klei mrâo sang mđung asăp blŭ Việt Nam:

Êpul knuă druh, phung ngă bruă klei mrâo ba anăp tal anei mâo 12 čô mnuih, nao kơ ƀuôn prŏng Hồ Chí Minh lehanăn dŭm čar nah Dhŭng mâo Phạm Mạnh Hùng, K’iăng khua knơ̆ng kiă kriê sang mđung asăp blŭ Việt Nam ngă khua êpul. Êpul mâo bruă čuăn đru kiă kriê, hâo hưn, mtô mblang kơ bruă mdrơ̆ng hŏng klei ruă tưp Covid 19, lehanăn dŭm bruă phŭn hlăm hdră mđung asăp mơ̆ng sang mđung asăp blŭ Việt Nam hâo hưn.

Čŏng nao mđĭ ai êpul knuă druh, phung ngă bruă klei mrâo nao ngă bruă ti dŭm čar kwar Dhŭng, Khua knơ̆ng kiă kriê sang mđung asăp blŭ Việt Nam Đỗ Tiến Sỹ čang hmăng kơ phung knuă druh ngă bruă klei mrâo ktuh êyuh ai tiê mghaih msir klei dleh dlan hŏng găp djuê, mjing djăp klei găl, nao đru mdrơ̆ng hŏng klei ruă tưp, đru klam djăp mta klei dleh dlan, klei luič liê mơ̆ng mah jiăng, ƀĭng ngă bruă lehanăn phung ƀuôn sang, kñăm čiăng hrăm mbĭt msưh kdŭn klei ruă tưp.

Khua knơ̆ng kiă kriê sang mđung asăp blŭ Việt Nam ăt bi êdah klei myưng m’ang kơ phung knuă druh, phung ngă bruă klei mrâo, čang hmăng kơ digơ̆ mâo klei gĭr amâo mâo djŏ knŏng thâo săn asei mlei, gĭr mđrăm mbĭt hŏng phung nai aê mdrao, kahan ksiêm, lĭng kahan hrue mlam jih ai tiê hlăm bruă mdrơ̆ng hŏng klei ruă tưp, lehanăn lŏ mă klei hriăm čiăng dưi mâo dŭm klei čih bi djŏ hŏng klei lăn čar dôk găn hlăm klei dleh dlan ară anei:

“Êpul ngă bruă ba anăp jing klei mâo bruă Đảng sang mđung asăp blŭ bi êdah ai tiê klei gĭr mơ̆ng phung khua kiă kriê sang mđung asăp blŭ. Lehanăn jih jang phung nga bruă ba anăp pral mâo dŭm klei čih klă sĭt jing djŏ hŏng klei dôk găn. Kâo đăo knang hlăm klei đuĕ nao anei diih srăng mâo mă lu mta boh klei lač djŏ hŏng klei hdĭp, klei dôk găn pioh mkăp kơ sang mđung asăp blŭ Việt Nam, lehanăn dŭm anôk bruă hâo hưn mâo lu mta boh klei čih pioh yuôm bhăn”.

Ti knăm trŭn nao kơ bruă, phung knuă druh ba anăp, phung ngă bruă klei mrâo mơ̆ng Sang mđung asăp blŭ Việt Nam bi êdah leh sơăi ai tiê mprăp hrăm mbĭt bi đuĕ nao hlăm anôk mâo klei ruă tưp, jih ai tiê hâo hưn kơ klei ruă tưp. Čang hmăng mâo lu klei hâo hưn, dưi mâo mă păn kjăp mơ̆ng djăp kiêng thâo ƀuh, hŏng klei hdĭp klă mngač hlăm bruă gang mkhư̆ klei ruă tưp ti lăn čar pô. Pô ngă bruă klei mrâo Thành Lương, hlăm Ban Văn Hoá, xã hội VOV2 lač:

“Klei kâo čang hmăng hĭn jing phung hmư̆ hdră mđung asăp blŭ Việt Nam, leh hmư̆ ya mta klei čih mơ̆ng hmei. Dlăng dŭm mta rup hmei mâo mă yăl dliê mơ̆ng anôk dôk găn klei ruă tưp snăn srăng mâo klei mđĭ ai, klei bi juh, hdĭp mâo klei đăo knang hĭn kơ mgi dih”.

Bi pô čih klei mrâo mniê Thi Uyên, mơ̆ng hră klei mrâo Điện tử Sang mđung asăp blŭ Việt Nam VOV.VN lač:

“Kâo čang hmăng srăng mơĭt truh djăp mta rup lač kơ sa boh ƀuôn prŏng hlăk hdĭp lehanăn mdrơ̆ng hŏng klei ruă tưp. Kâo mprăp leh ai tiê msĕ hŏng phung aê ama pô êlâo hlăm ênuk bi blah. Čăng hmăng kơ asei mlei kâo pô dưi găn jih klei dleh dlan anei, lehanăn dưi jing mnuih mâo ƀuh jih ya mta klei dôk găn hlăm hƀuê ênuk anei”./.

Pô mblang: Y-Khem Niê