VOV4.Êđê- Êpul êdam êra gưl dlông Hồ Chí Minh, Êpul phung êdam êra Việt Nam mrâo mkŏ mjing Hdră đru ênoh mnơ̆ng yua aguah tlam kơ phung êdam êra mă bruă leh anăn mnuih ƀuôn sang mâo anăn “bi kah mbha klei khăp, hrăm mbĭt găn klei ruă tưp”. Anei jing bruă ngă mđing truh asăp iêu mthưr mơ̆ng Khua knŭk kna hlăm bruă hrăm mbĭt mguôp ai tiê, bi êdah ai tiê bi đru, bi khăp  kơ phung êdam êra mă bruă leh anăn gŏ sang hlăk tuôm hŏng klei dleh dlan kyua hmaĭ kjham mơ̆ng klei ruă Covid-19.

Hdră dưi pŏk ngă mơ̆ng hruê 15/7/2021 truh kơ hruê 30/6/2022. Klă klơ̆ng, tơdah blei dŭm mta mnơ̆ng yua aguah tlam hluê kdrăp App mua sắm MEGA1  amâo dah dŭm anôk hiu čhĭ mnơ̆ng mơ̆ng hdră anei, phung êdam êra kahan ksiêm, mnuih ƀuôn sang srăng mâo anôk bruă duh mkra, anăn knăl mnơ̆ng dhơ̆ng nao hgŭm hlăm hdră bi mtrŭn ênoh čhĭ truh 50% mkă hŏng ênoh yuôm mnơ̆ng dhơ̆ng.

Ară anei, hdră anei mâo klei đru, hrăm mbĭt mơ̆ng lu anôk bruă duh mkra hlăm ala čar. Nguyễn Ảnh Nhượng Tống – Khua Êpul hgŭm kriê dlăng Anôk bruă mguôp hnư êpul group Yeah1, êpul bi hgŭm hluê ngă hdră anei brei thâo, hdră dôk mkăp dŭm mta mnơ̆ng dhơ̆ng yua aguah tlam msĕ si braih, êa msĭn, êa praĭ, êa ksâo… Êngao anăn, kñăm hgŭm kngan mbĭt hŏng dŭm êpul bruă, anôk bruă duh mkra, mnuih mâo klei čiăng mkŏ mjing bruă đru kơ mnuih ƀuôn sang mâo klei dleh dlan kyua klei ruă Covid 19. Anôk bruă mguôp hnư êpul group Yeah1 mă leh bruă hŏng dŭm êpul êya mkra mjing mnơ̆ng dhơ̆ng nao blei ti anôk mkra mtam, mơ̆ng anăn dưi bi hrŏ ênoh čhĭ kơ mnuih ƀuôn sang:

“Hmei čih mkra leh dŭm combo si bĕ ngă čiăng kơ mnuih blei yua grăp mlan knŏng tĭng tla mơ̆ng 100 – 200 êbâo prăk dưi blei yua leh mnơ̆ng dhơ̆ng hlăm sa mlan, hmei ăt hưn mdah dŭm klei êdu kƀah čiăng kơ mnuih blei yua dưi blei 1 combo/mlan. Ară anei hnơ̆ng mkra mjing mnơ̆ng dhơ̆ng hlăm mlan anei ka truh mơh 50 êbâo combo, mta kñăm mlan êdei srăng đĭ êbeh 200 êbâo combo/hruê lehanăn lŏ mđĭ ƀrư̆ ƀrư̆.

Ayŏng Ngô Văn Cương, Khua dlăng bruă Đảng êpul êdam êra blŭ hrăm hlăm hdră

Nguyễn Ngọc Dũng, K’iăng khua kiă kriê Êpul hgŭm bruă mnia mblei mơ̆ng điện tử Việt Nam brei thâo: Êpul hgŭm srăng hrăm mbĭt hŏng hdră anei hluê hŏng bruă srăng bi mklin dŭm anôk mnia mblei mnơ̆ng dhơ̆ng điện tử prŏng hlăm ala čar lehanăn dŭm anôk bruă duh mkra hlăm anôk bruă hiu ba mnơ̆ng đru ba truh kiê kngan mnuih čiăng blei yua.

“Êngao kơ bruă Êpul hgŭm mnơ̆ng dhơ̆ng điện tử đru kơ bruă ba mnơ̆ng dhơ̆ng truh kơ mnuih blei yua pral hĭn, ară anei anôk mkŏ mjing ăt dôk bi mƀĭn jih jang ayŏng amai adei si srăng ngă čiăng mkŏ mjing êpul bi mklă hnơ̆ng tŭ jăk mnơ̆ng dhơ̆ng, ƀuăn rơ̆ng kơ ênoh čhĭ lehanăn nao ba truh kơ mnuih blei yua, amâo mâo klei bi kpleh kơ hnơ̆ng tŭ jăk amâo dah amâo lui mnuih ƀuôn sang bi mĭn mđĭ ênoh mâo mƀlir bi mklă leh kơnăn lŏ mtrŭn ênh čhĭ.

Pŏk ngă ti 63 čar, ƀuôn prŏng hlăm kluôm ala, khă snăn, hdră anei mđing pŏk ngă ti dŭm čar, ƀuôn prŏng dôk mâo klei ruă Covid 19 dleh dưi ksiêm dlăng. Klă klơ̆ng, hlăm mlan 7,8,9, hdră srăng mkăp kơ ƀuôn prŏng Hồ Chí Minh, Bình Dương lehanăn dŭm čar jĕ giăm. Hnơ̆ng hluê ngă hdră anei srăng pŏk mlar anôk ngă bruă hluê si boh klei dôk mâo sĭt.

Êlâo anăn, kñăm đru kơ mnuih ƀuôn sang blei yua mnơ̆ng lŏ hma, djŏ guôp hŏng klei dôk mâo mơ̆ng klei ruă Covid 19, bruă Đoàn êdam êra Cộng sản Hồ Chí Minh gưl dlông mkŏ mjing leh hdră ngă bruă “Bi hgŭm mnơ̆ng bruă lŏ hma – Thâo bi đru, čung ba – Hgŭm kngan hgao klei ruă tưp”. Dŭm anôk bruă duh mkra, êpul êya ƀuăn srăng hgŭm kngan bi h’ĭt klei hdĭp ala ƀuôn, đru kơ mnuih ƀuôn sang hgao klei ruă Covid 19, mbĭt anăn pŏk ngă tŭ dưn Hdră mtrŭt mjhar Mnuih Việt Nam mđing ba yua mnơ̆ng Việt Nam.

Hluê si Khua tal sa bruă êdam êra Cộng sản Hồ Chí Minh gưl dlông Nguyễn Anh Tuấn, bruă bi hgŭm mnơ̆ng dhơ̆ng lŏ hma hluê hdră čhĭ klă anăp lehanăn čhĭ hluê êlan online, Êpul êdam êra bi hgŭm leh hŏng dŭm Phŭn, dŭm anôk bruă kđi čar yang ƀuôn ba yua ai ktang mơ̆ng jih anôk bruă, ba yua klei găl mơ̆ng kdrăp mrâo čiăng đru hrui blei, ba čhĭ mnơ̆ng lŏ hma tŭ dưn kơ mnuih ƀuôn sang hlăm wưng bluh mâo klei ruă tưp msĕ ară anei:

“ Hmei čang hmăng hŏng klei mĭn mrâo, ai tiê ba anăp anei srăng lŏ dưi mđĭ lar hlăm wưng ti anăp amâo djŏ knŏng bi hgŭm hlăm mnơ̆ng bruă lŏ hma, thâo bi đru hgao klei ruă tưp ƀiădah lŏ đru mbĭt hŏng Phŭn bruă Lŏ hma mđĭ kyar krĭng ƀuôn sang hluê ngă tŭ dưn bruă klam kơ kdrăp mrô lehanăn mđĭ kyar bruă lŏ hma hlăm wưng mrâo.

Hŏng bruă klam đru gui klei ktrŏ mbĭt hŏng dŭm êklăk gŏ sang hŏng bruă đru blei yua dŭm mta mnơ̆ng yua aguah tlam, hdră ăt đru mguôp hluê ngă bruă klam mdua, gang mkhư̆ tŭ dưn klei ruă tưp, mđĭ kyar bruă duh mkra mnia mblei hluê hŏng bruă đru dŭm êklăk čô mnuih mă bruă ti dŭm sang mkra mjing, krĭng duh mkra mnia mblei dŭm mta mnơ̆ng yua aguah tlam dưi krơ̆ng kjăp, bi hrŏ klei luič bruă mă kyua hmăi mơ̆ng klei ruă Covid 19, đru lŏ krŭ wĭt bruă duh mkra, blei yua mnơ̆ng dhơ̆ng./.

                                                    Pô mblang: H’Nêč Êñuôl