VOV4.Êđê- Phung hđeh sang hră kluôm ala mŭt leh thŭn hriăm mrâo 2021-2022.  Wăt tơdah dŭm alŭ wăl bi mklă srăng gĭr msir mgaih klei dleh dlan kyua klei ruă Covid-19 čiăng mtô leh anăn hriăm djŏ guôp, ƀiădah ăt adôk lu klei rŭng răng hŏng dŭm anôk bruă sang hră leh anăn phung hđeh.

Ƀuôn prŏng Hồ Chí Minh jing anôk dôk mâo klei ruă tưp lu hĭn hlăm ala čar, khă bruă sang čư̆ êa lehanăn dŭm anôk bruă bi klă srăng mkŏ mjing klei mtô lehanăn hriăm online truh jih mkrah gưl hriăm tal 1, ƀiădah bruă dŭ mdiăng, ba mbha hdruôm hră hriăm truh kơ phung hđeh sang hră dôk mâo lu klei dleh dlan. Hlăm anăn, hdruôm hră hriăm adŭ 1, adŭ 2 lehanăn adŭ 6 dưi hriăm tui si hdră mtô mrâo, dŭm anôk bruă knŏng mrâo mkăp brei êbeh 60% hdruôm hră truh kơ dŭm sang hră mơar. Kyuanăn, mbĭt hŏng bruă duah hdră êlan mbah hdruôm hdră hriăm kơ phung hđeh sang hră, dŭm kdriêk čar, kdriêk lehanăn sang hră mơar srăng mkăp brei hdruôm hră điện tử mơ̆ng adŭ 1 truh kơ adŭ 12 hlăm mbah internet kơ phung hđeh čiăng yua êjai hlăm mmông mrâo kčưm thŭn hriăm mrâo. Dương Anh Đức k’iăng khua bruă sang čư̆ êa ƀuôn prŏng Hồ Chí Minh brei thâo:

Ƀuôn prŏng gĭt gai leh kơ dŭm sang hră mơar hâo hưn kơ phung amĭ ama, thâo săng klă klei jing čiăng dưi yap jih jang phung hđeh sang hră dôk dleh dlan kơ bruă nao sang hră mơar hŏng êlan internet. Mơ̆ng anăn mâo dŭm hdră đru msĕ si: bi mguôp phung mâo ai tiê kmah bi mguôp ngăn prăk, mnơ̆ng yua kơ hđeh sang hră, mơĭt hră mtô mjuăt, hdruôm hră čiăng phung hđeh čŏng hriăm. Phung hđeh srăng mâo klei ksiêm dlăng lehanăn čŏng hriăm hjăn leh mâo ênŭm klei găl nao hriăm klă anăp.)

Jing thŭn tal 3 knơ̆ng bruă mtô mjuăt mkŏ mjing hdră mtô lehanăn hriăm online hlăm wưng gang mkhư̆ klei ruă tưp Covid-19, ƀiădah dŭm alŭ wăl lač, mâo dưi ngă klei hriăm online na nao, kyuadah srăng hmăi amâo jăk kơ hnơ̆ng tŭ hlăm klei mtô mjuăt, klei suai pral, ai tiê phung hđeh, boh nik jing phung hđeh điêt lehanăn hđeh gưl 1. Bruă brei phung hđeh hriăm online ăt mđĭ klei ktrŏ kơ phung amĭ ama kyua lŏ blei thiăm dŭm kdrăp yua hlăm bruă hriăm online hlăm wưng amâo mâo prăk kăk kyua klei hmăi mơ̆ng klei ruă tưp Covid-19. Boh nik jing hdră hriăm anei dleh, tơdah amâo čiăng lač jing amâo dưi ngă ôh hlăm dŭm alŭ wăl čư̆ čhiăng, anôl bruă duh mkra, ala ƀuôn dôk mâo lu klei dleh dlan. Kyuanăn, lu alŭ wăl mâo klei akâo dŭm anôk bruă srăng ksiêm dlăng, tlŏ mgang Việt Nam tal êlâo kơ phung nai lehanăn phung hđeh hlăm ala čar. Vũ Đại Thắng khua bruă Đảng čar Quảng Bình lač sơnei:

Klei ruă tưp ăt dôk dleh dưi ksiêm dlăng, ară anei drei dôk ngă bruă tlŏ mgang vaccine kơ jih jang mnuih ƀuôn sang. Hmei mâo klei uêñ min jing bruă hriăm hră mơar kơ phung hđeh mâo klei găl, drei srăng mĭn kơ hdră tlŏ mgang vaccine hlăm sang hră mơar kơ phung hđeh sang hră, boh nĭk phung hđeh sang hră gưl 3)

Klei ruă tưp Covid-19 hŏng klei dleh dưi ksiêm dlăng hlăm thŭn 2020 lehanăn 8 mlan thŭn 2021 ăt hmăi truh kơ bruă mkŏ mjing klei hriăm hdră hriăm mrâo lu alŭ wăl. Boh nik dleh dlan kơ bruă mkăp brei ênoh prăk duh bi liê mnơ̆ng yua, kdrăp yua hlăm klei hriăm hră mơar. Hlăm klei kƀĭn trông bi mklin thŭn hriăm lehanăn mkŏ mjing bruă klam thŭn hriăm mrâo mơ̆ng knơ̆ng bruă mtô mjuăt lehanăn sang hră mơar mrâo anei, mâo đa đa alŭ wăl akâo kơ anôk bruă ksiêm dlăng, bi kdung hĕ klei hriăm hdră hriăm mrâo hŏng adu 10. Nguyễn Đức Trung, khua bruă sang čư̆ êa čar Nghệ An lač sơnei:

Akâo kơ phŭn bruă mtô mjuăt ksiêm dlăng, hưn klă klei jing lehanăn bi kdung hdră klei hriăm hdruôm hdră adŭ 10 mơ̆ng wưng thŭn hriăm 2022-2023 jing wưng thŭn hriăm 2025-2026 hŏng 2 mta phŭn sơnei. Sa jing klei ruă tưp Covid-19, alŭ wăl amâo mâo ôh klei găl čiăng mprăp, mkŏ mjing hdră mtô mjuăt hdruôm hră mrâo, lehanăn bruă mtô mjuăt êpul ngă bruă ăt dleh êdi kơ alŭ wăl. Tal 2, čiăng rơ̆ng ngă bruă hrăm mbĭt, thŭn anei drei srăng ngă hdră hruôm hră hriăm alŭ 6, truh kơ 3 thŭn êdei srăng ngă kơ adŭ 10 jing ñu djŏ hĭn, rơ̆ng hnơ̆ng tŭ jăk, mâo klei ngă hrăm mbĭt.)

Aduôn Nguyễn Thị Quyên Thanh, k’iăng khua bruă sang čư̆ êa čar Vĩnh Long lač:

Hđeh sang hră adŭ 9 thŭn anei nao sang hră hlăm wưng klei ruă tưp dôk dleh dưi ksiêm dlăng. Êjai drei mâo hdră êlan mtô mjuăt jing tur knơ̆ng, jing hdră mtô mjuăt ară anei, sơnăn thŭn êdei nao hriăm hdră mtô mjuăt mlih mrâo, phung hđeh mâo mơh tur knơ̆ng đăo knang dưi mlih klei hriăm mrâo. Hmei mâo klei akâo kơ phŭn bruă mâo klei ksiêm dlăng klă, kyua klei jăk kơ phung hđeh sang hră kơ hnơ̆ng tŭ dưn êjai ngă hdră mtô mjuăt mrâo, tui hluê anăn mâo leh klei ksiêm dlăng akâo kơ bruă kƀĭn ala bi mlih amâo dah mkra wĭt klei bi klă mrô 51)

Khă thâo klă hlăm wưng ala čar dôk tuôm hŏng lu klei ldeh dlan kyua klei ruă tưp Covid-19, lu boh klei hlăm hdră êlan ka dưi mgaih msir ôh, ƀiădah hmăng hmưi dŭm anôk bruă ksiêm dlăng, bruă sang čư̆ êa lehanăn knơ̆ng bruă mtô mjuăt, sang hră mơar alŭ wăl lŏ tui duah hdră ruh mtlaih, čiăng phung hđeh dưi hnưm nao sang hră mơar hlăm anôk hriăm mâo klei êđăp ênang lehanăn hdĭp mbĭt hŏng klei ruă tưp sui hruê.

Pô mblang: Y-Ƀel Êban