VOV4.Êđê- Thŭn hriăm mrâo 2021-2022 giăm truh, ƀiădah klei ruă tưp dôk mâo ăt dleh dưi ksiêm dlăng. Lu čar, ƀuôn prŏng mâo leh hdră kčah mkŏ mjing knăm mphŭn pŏk thŭn hriăm mrâo hluê hdră online lehanăn mtô bi hriăm hluê hdră online. Hŏng phung hđeh gưl dua, gưl tlâo năng ai juăt mưng lehanăn pral thâo ba yua hdră hriăm online hlăm thŭn hriăm mrâo. Hŏng phung hđeh gưl sa, lu phung amĭ ama ăt dôk mđing uêñ kơ klei anei hŏng phung anak aneh pô. Čiăng thâo săng klă hĭn klei hmăi mơ̆ng klei ruă anei truh kơ phung hđeh adŭ 1 lehanăn klei ktrâo lač mơ̆ng Phŭn bruă Sang hră m’ar lehanăn mtô bi hriăm, pô čih klei mrâo kơ Sang mđung asăp blŭ Việt Nam mâo leh klei bi blŭ hrăm hŏng Thái Văn Tài, Khua knơ̆ng bruă mtô bi hriăm gưl sa mơ̆ng Phŭn bruă Sang hră m’ar lehanăn mtô bi hriăm:

-Ơ Thái Văn Tài, klei ruă tưp Covid-19 dôk dleh êdi dưi ksiêm dlăng ti lu čar, ƀuôn prŏng. Mâo đa đa čar, ƀuôn prŏng mâo klei bi klă hruê mmông nao sang hră mơar jing hruê 1/9, mâo đa đa alŭ wăl mkăn bi kdung leh hruê nao sang hră kyua ka thâo klă klei ruă tưp Covid-19. Dưi mơ̆ ih brei thâo hdră êlan thŭn hriăm mrâo kơ phung hđeh sang hră gưl 1, boh nĭk si klei hmăi kơ phung hđeh adŭ 1?

Thái Văn Tài: Hlăm klei hưn mdah hruê mmông kơ thŭn hriăm mrâo, phŭn bruă mtô mjuăt lehanăn sang hră mơar ăt tĭng mkă leh bruă ngă tui si klei găl hlăm hruê mmông thŭn hriăm anei hŏng sang hră gưl 1 lehanăn adŭ 1 si srăng ngă. Bi kơ sang hră gưl 1, bruă sang čư̆ êa dŭm alŭ wăl mâo leh bruă čŏng ngă lehanăn ngă tui si klei găl lu hĭn. Hlăm klei dưi mơ̆ng bruă sang čư̆ êa čar, dưi bi mklă hruê mmông kčưm nao sang hră lehanăn hruê mdei hlăm thŭn hriăm, hruê mmông bi kpleh jing hnưm hĭn amâodah sui hĭn mkă hŏng hdră mâo leh jing 15 hruê. Kyuanăn hŏng hruê mmông msĕ sơnăn, dŭm alŭ wăl dưi bi mklă hruê mmông brei phung hđeh nao sang hră hlăm grăp alŭ wăl mdê mdê, kdlưn hĭn jing truh kơ grăp sang hră. Dŭm alŭ wăl jing anôk êđăp ênang, drei srăng brei hđeh nao sang hră djŏ hruê. Dŭm anôk mkăn dôk mâo klei hyưt kyua klei ruă tưp srăng mĭn êlâo hĭn kơ klei suaih pral lehanăn êđăp ênang kơ phung hđeh. Kyuanăn, hŏng dŭm čô hđeh adŭ 1, êngao kơ bruă rơ̆ng kơ hruê mmông msĕ sơnăn, dŭm klei jing mơ̆ng phung hđeh adŭ 1 drei srăng mâo klei mđing kơ hnơ̆ng tu dưn lehanăn ai mĭn diñu jing ka mprăp ôh kơ klei hriăm hră, mlih anôk hriăm mơ̆ng sang hră kơ hđeh điêt đĭ gưl 1.

- Msĕ hŏng ih mrâo lač leh, dŭm čô hđeh adŭ 1 jing phung năng mđĭng êdi. Diñu bi mlih anôk hriăm mơ̆ng sang hră kơ phung hđeh điêt nao hriăm gưl sa hlăm đa đa alŭ wăl mâo klei hmăi kyua klei ruă tưp Covid-19, sơnăn ka dưi hrăm mbĭt hŏng phung nai mtô nao sang hră thŭm hriăm mrâo mtam ôh. Sơnăn si ngă klei mtă kơ phung hđeh adŭ 1 hlăm thŭn hriăm mrâo anei?

Thái Văn Tài: Bi kơ klei thơ̆ng kơ bruă, hmei mâo leh hdră mtrŭn mtô kơ bruă mkŏ mjing hdră êlan hlăm sang hră, hdră êlan thŭn hriăm mrâo. Bi kơ phung nai mtô, ti anăp jing čiăng mkŏ mjing kơ pô hdră mtô dŭm mta hriăm, mđing hĭn kơ hđeh adŭ 1 kơ dŭm mta hriăm jing atur knơ̆ng msĕ si klei yuăn, Toán. Bi kơ dŭm mta hriăm mkăn drei srăng bi mguôp čiăng bi hrŏ ƀiă hruê mmông hriăm lehanăn phung hđeh dưi yua lu mmông hriăm dŭm mta hriăm jing atur. Sa klei bhiăn mkăn jing dưn yua hruê mmông yuôm bhăn čiăng mđĭ mmông hriăm kơ phung hđeh adŭ 1. Lehanăn tơdah klei ruă tưp dôk sui, hđeh sang hră dôk mdei ti sang drei srăng ngă hră êlan “Mdei nao sang hră ƀiădah amâo mdei hriăm ôh”. Lehanăn bi kơ phung hđeh adŭ 1, adŭ 2 drei srăng kñăm kơ hdră thâo dưn yua kdrăp mrâo mrang čiăng ênưih hĭn kơ phung amĭ ama, ênưih hĭn kơ phung hđeh sang hră lehanăn ngă bruă kñăm rơ̆ng kơ klei hriăm hră mơar. Dưi đru sa kdrêč hlăm klei hriăm hră lehanăn diñu mâo klei mưng rơ̆ng bruă hriăm hră lehanăn dŭm klei hriăm jing atur.

Thái Văn Tài - Khua knơ̆ng bruă mtô bi hriăm gưl sa mơ̆ng Phŭn bruă Sang hră m’ar lehanăn mtô bi hriăm.

- Ti anăp klei ruă tưp msĕ sơnei, mĭn tĭng srăng ngă klei hriăm online, amâo dưi nao hriăm ti sang hră ôh, ƀiădah tơdah sơnăn, hriăm online hŏng phung hđeh sang hră gưl sa jing dleh dlan êdi. Sơnăn ya klei mtă mơ̆ng phŭn bruă mtô mjuăt lehanăn srăng hră mơar kơ dŭm alŭ wăl, boh nĭk dŭm alŭ wăl mâo klei dleh dlan kơ krăp mrâo mrang ară anei?

Thái Văn Tài: Phŭn bruă mtô mjuăt lehanăn sang hră mơar mkŏ mjing leh sa hdră hriăm mâo 51 mrô hŏng 51 akŏ hriăm hlăm anôk mđung rup lehanăn dưi mđung hlăm mbah internet čiăng đru kơ phung hđeh sang hră êjai mmông dôk ti sang drei srăng yua 51 akŏ klei hriăm hră anei, dưi yua kơ djăp hdruôm hră mdê mdê. Lehanăn nai mtô, sang hră mơar čiăng mtô kơ phung amĭ ama hlăm hruê mmông dôk ti sang brei kơ phung hđeh hriăm klei yuăn hŏng kdrăp anei. Tal 2, jing dŭm alŭ wăl dôk hlăm klei dleh dlan drei srăng mâo lu klei bi hriăm. Năng ai jing mbha hră, klei bi trông plah wah dŭm alŭ wăl čiăng rơ̆ng kơ phung hđeh dưi čŏng hriăm. Lehanăn drei thâo sơăi, tơdah drei ngă jăk, anei ăt jing mmông găl dưi đru kơ phung hđeh čŏng hriăm lehanăn hrăm mbĭt hŏng amĭ ama phung hđeh bi mguôp hĭn hŏng drei.

Sơnăn yơh jing, drei srăng dưn yua hruê mmông yuôm bhăn lehanăn mđing êlâo hĭn kơ hđeh adŭ 1, adŭ 2. Bi kơ dŭm mta mâo mdê mdê, tơdah mâo sa alŭ wăl hlăm hruê mmông mâo klei găl dưi brei drei bi leh hdră hriăm hlăm thŭn hriăm, alŭ wăl anăn srăng hưn mdah hŏng phŭn bruă mtô mjuăt lehanăn sang hră mơar lŏ bi kdung hruê mmông lŏ ngă bruă anei. Drei čiăng mđing êlâo hĭn kơ hnơ̆ng tŭ dưn, mđing kơ ênuk thŭn, mâo ngă ôh hŏng hdră yua ai đei lehanăn ngă knŏng sa hdră huĭ dah hmăi truh kơ hnơ̆ng tŭ dưn lehanăn ai mĭn phung hđeh.

- Lač jăk kơ ih lu

Pô mblang: Y-Ƀel Êban