VOV4.Êđê - Amâo djŏ knŏng jing sa čô khua kiă kriê jăk, jih ai tiê kơ bruă, Thượng tá Y- Miên Ktul, K’iăng khua đru kčĕ, Knơ̆ng gĭt gai lĭng kahan čar Dak Lak lŏ jing gru mngač êdah êdi hlăm bruă tui hriăm lehanăn hluê ngă klei mĭn, knhuah mă bruă lehanăn knhuah hdĭp mngač Hồ Chí Minh. Ñu mrâo mâo Knơ̆ng gĭt gai lĭng kahan krĭng 5 bi mni kyua mâo boh tŭ kdlưn hĭn hlăm bruă tui hriăm lehanăn hluê ngă klei mĭn, knhuah mă bruă lehanăn knhuah hdĭp mngač Hồ Chí Minh wưng thŭn 2016 – 2021.

Mơ̆ng hruê lŏ bluh đĭ klei ruă tưp Covid-19 ti Dak Lak, bruă mă mơ̆ng Thượng tá Y Miên Ktul jing lo lu hĭn. Mbĭt hŏng bruă klam ti adŭ bruă đru kcĕ, ñu lŏ mâo bruă klam gĭt gai bruă ngă lĭng kahan ti anôk bi ktlah mbĭt ti sang hră bruă kđi čar ti čar Dak Lak. Ară anei, anôk bi ktlah anei dôk drông jum êbeh 400 mnuih ƀuôn sang mrâo wĭt mơ̆ng anôk mâo klei ruă tưp. Thượng tá Y Miên Ktul ngă nao nao bruă gĭt gai lehanăn ksiêm dlăng, mđĭ ai phung lĭng kahan dôk ngă bruă klam. Lĭng kahan Phan Phạm Phúc yăl dliê kơ khua gĭt gai pô:Thượng tá Y- Miên Ktul - khua kiă kriê adŭ bruă dru kčĕ jing sa čô gĭt gai mâo klei bi hmô, mâo na nao klei uêñ mĭn, jĕ giăm lehanăn mđĭ ai phung knuă druh, lĭng kahan êjai tuôm hŏng klei dleh dlan, suăi êmăn hlăm klei mă bruă čiăng kơ hmei mâo boh kdrŭt, ai tiê ngă bruă klam mơ̆ng anôk bruă.

Hŏng bruă klam jing k’iăng khua đrŭ kčĕ knơ̆ng bruă gĭt gai lĭng kahan čar Dak Lak, khua bruă Đảng hlăm adŭ bruă đru kčĕ, hruê mmông êgao, Thượng tá Y -Miên Ktul mâo leh lu hdră êlan đru kơ bruă Đảng čar, knơ̆ng bruă gĭt gai lĭng kahan čar ngă klei gĭt gai, ksiêm dlăng, ngă djŏ bruă klam bruă lĭng kahan. Kdlưn hĭn jing klei đru kčĕ ngă jăk bruă mprăk kơ klei bi blah, klei hriăm, klei hriăm mblah, mkŏ mjing knuih lĭng kahan mâo klei mtô mjuăt, ksiêm dlăng klei jing lĭng kahan, rơ̆ng bruă ksiêm dlăng kriê pioh, mkra jăk dŭm kdrăp yua. Ñu ăt mâo klei đru kčĕ bruă mkŏ mjing klei mtô mjuăt lu kdriêk, lu să kơ phung knuă druh, lĭng kahan ngă bruă, êpul êya kahan ƀuôn, kahan mkăp. Hlăm mmông ngă bruă, Thượng tá Y -Miên Ktul hrăm mbĭt nanao hŏng dŭm anôk bruă đru kơ dŭm alŭ wăl mkŏ mkra, bi kluôm ênŭm êpul kahan ƀuôn, hrŏng ruah, iêu mthưr kơ mnuih ƀuôn sang nao kahan mâo klei kjăp lehanăn mâo boh tŭ dưn.

Thượng tá Y -Miên Ktul yăl dliê, čiăng kơ bruă hriăm lehanăn ngă tui si Awa Hồ jing knuih mă bruă lehanăn hdĭp grăp hruê, ñu rơ̆ng nanao kơ anôk bruă, ngă nanao bruă “Grăp hruê sa klei mtô mơ̆ng Awa Hồ”, “Sa hruê kăm sa klei bhiăn”, Mkŏ mjing klei hriăm mbĭt, grăp čô bi klă bi ktưn klei hriămNgă dŭm klei gĭt gai mơ̆ng gưl dlông, tui si dŭm hră mơar, hdră mtrŭn, mta mtrŭn mơ̆ng gưl dlông ba mtrŭn, kâo pô ăt mâo klei ksiêm duah lehanăn lŏ hlăk mblang kơ gưl nah gŭ dưi thâo sang ênưih hĭn, dưi hriăm hmar hĭn. Boh nĭk jing phung lĭng kahan mrâo, ka mâo lu klei thâo ôh, kyuanăn pô srăng mtô klă kơ diñu čiăng kơ diñu dưi ngă djŏ. Klei jĕ giăm, ngă bruă jăk jing klei kâo dưi hriăm mơ̆ng Awa Hồ.

Lač kơ bruă bi ktưn tui hriăm lehanăn hluê ngă tui si gru mngač Hồ Chí Minh mơ̆ng êpul êya lĭng kahan čar Dak Lak, Thượng tá Trần Minh Trọng, khua bruă kđĭ čar hlăm knơ̆ng bruă gĭt gai lĭng kahan čar Dak Lak brei thâo, hlăm dŭm thŭn êgao, anôk bruă hyuă kjăp nanao, tui ngă lehanăn ngă kluôm ênŭm hdră mtrŭn mrô 05 mơ̆ng phŭn bruă kđi čar, hdră mtrŭn mrô 87 mơ̆ng khua kiă kriê knơ̆ng lĭng kahan gưl dlông kơ jih jang phung knuă druh, lĭng kahan. Mơ̆ng klei tui hriăm lehanăn hluê ngă tui si gru mngač Awa Hồ dưi mâo lu bruă ngă jăk, klei bi hmô mâo boh tŭ dưn lehanăn phung mâo bruă ngă kdlưn. Bi kơ nhân thượng tá Y -Miên Ktul, khua bruă kđĭ čar hlăm knơ̆ng bruă gĭt gai lĭng kahan čar lač sơnei: “Hŏng bruă klam jing k’iăng khua đru kčĕ mơ̆ng knơ̆ng bruă gĭt gai lĭng kahan čar, ñu lehanăn êpul êya ngă leh bruă hrăm mbĭt, mâo boh tŭ dưn bruă klam jing kahan, boh nik jing mđĭ hnơ̆ng tŭ jăk bruă mtô kjuăt, mprăp klei bi blah, mâo bruă ngă kdlưn hĭn hlăm dŭm bruă, mta phŭn yuôm bhăn čiăng mâo dŭm klei bi mlih hlăm bruă mtô mjuăt klei bi blah hlăm dŭm anôk bruă. Ñu rơ̆ng kjăp nanao hlăm klei kƀĭn êngiê hlăm bruă Đảng, jing knhal krah klei bi mguôp, jĕ giăm hŏng knuă druh, lĭng kahan hlăm anôk bruă, mâo klei khăp lehanăn klei đăo knang mơ̆ng grăp čô.”

Jĕ giăm, kluôm ênŭm jing mta phŭn mơ̆ng Thượng tá Y Miên Ktul dưi hriăm lehanăn hluê ngă tui si gru mngač Awa Hồ. Hŏng bruă ngă hlăm grăp hruê, ñu dưi bi lar leh klei bi mguôp, klei ktang hlăm êpul êya hlăm bruă mkŏ mka anôk bruă kjăp ktang kluôm ênŭm “mâo klei bi hmô, klei kdlưn hĭn”, jing čhiăm gru ba anăp hlăm klei bi ktưn mơ̆ng êpul lĭng kahan čar Dak Lak. Thượng tá Y- Miên Ktul mâo lu klei pah mni mơ̆ng bruă sang čư̆ êa čar Dak Lak lehanăn knơ̆ng gĭt gai lĭng kahan kđông kahan 5. Mrâo anei, ñu dưi mâo klei pah mni mơ̆ng knơ̆ng bruă gĭt gai lĭng kahan kđông kahan 4 hlăm bruă tui hriăm lehanăn hluê ngă gru mngač Hồ Chí Minh wưng thŭn 2016-2021.